ԱԺ-ում քննարկվել են էլեկտրոնային դեղատոմսով բաց թողնվող դեղերի ցանկի ընդլայնման հարցը և համակարգի խնդիրները

2024 թվականի մարտի 1-ից օրենքն արգելում է առանց բժշկի դուրս գրած էլեկտրոնային դեղատոմսի շուրջ 470 անուն դեղ գնել դեղատնից: Բացառապես էլեկտրոնային դեղատոմսով են վաճառվում հակաբիոտիկային, հակասնկային, հակամիկրոբակտերային, հակավիրուսային դեղերը, իմունային շիճուկները, պատվաստանյութերը, միզապրաստոլ պարունակող դեղերը: Կառավարությունը նախատեսում էր 2025 թվականի հունվարի 1-ից ընդլայնել էլեկտրոնային դեղատոմսերով բաց թողնվող դեղերի ցանկը, սակայն որոշումը հետաձգվել է մինչև ընթացիկ տարվա հուլիսի 1-ը:

Հետաձգման պատճառ են հանդիսացել համակարգի ներդրման գործընթացում ծագած խնդիրները: Վերջին տասն ամիսների ընթացքում պարզ է դարձել, որ տարբեր պատճառներով էլեկտրոնային տարբերակով դեղատոմսեր շատ քիչ են դուրս գրվում: Արդյունքում, Առողջապահական և աշխատանքի տեսչական մարմինն առանց էլեկտրոնային դեղատոմսի դեղ վաճառելու համար շատ մեծ չափսերի տուգանքներ է կիրառել դեղատների նկատմամբ, ինչն էլ առաջացրել է դեղատների դժգոհությունը: Խնդիրը ներկայացնելու նպատակով նամակով վերջիններս դիմել են Կառավարությանը, սակայն, ըստ նրանց, Առողջապահության նախարարությունից ստացված պատասխանը խնդրի լուծումներին չի անդրադարձել:

Համակարգի ներդրման գործընթացի վերաբերյալ հունվարի 8-ին աշխատանքային քննարկում էր կազմակերպել ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը: Պատգամավորը, ճիշտ որոշում համարելով ներդրվող նոր համակարգը, նշել է, որ պետք է հավելյալ և կոնկրետ ջանքեր գործադրվեն, որպեսզի համակարգը լիարժեքորեն աշխատի, ինչն այսօր այդպես չէ:

Քննարկմանը մասնակցել են պատգամավորներ, Կառավարությունից ներկայացուցիչներ, դեղատնային ցանցերի և դեղատների ներկայացուցիչներ, ոլորտի պատասխանատուներ:

Դեղատների ներկայացուցիչները, հորդորելով դադարեցնել տուգանքների կիրառումը, նշել են, որ իրենք չեն ուզում խախտել օրենքը, սակայն բժիշկները դուրս չեն գրում բավարար քանակությամբ դեղատոմսեր, իսկ իրենք բուժառուներին չսպասարկել չեն կարող:

Նշվել է, որ խնդրին լուծում չտալու դեպքում հնարավոր է տուգանքների հետևանքով սնանկանան դեղատները, մեծանա ստվերային շրջանառությունը և այլն:

Քննարկմանը մասնակցող դեղատան ներկայացուցչի խոսքով համակարգի արդյունավետ գործարկման նպատակով իրենց դեղատնային ցանցի ղեկավարությունն աշխատողների համար լրացուցիչ խրախուսման նորմ է սահմանել, այն է` մեկ էլեկտրոնային դեղատոմս դուրս գրելու համար սահմանելով 500 դրամ պարգևավճար: «180 դեղատուն և խրախուսում ունենալու պարագայում դեկտեմբեր ամսվա ընթացքում մենք սպասարկել ենք 104 էլեկտրոնային դեղատոմս»,- ընդգծել է զեկուցողը:

Առողջապահության փոխնախարար Արտակ Ջումայանն էլ փաստել է` էլեկտրոնային դեղատոմսերի դուրսգրման գործընթացը տեխնիկական առումով դյուրին է և արագ իրականացվող: Փոխնախարարի խոսքով համակարգի լավարկման նպատակով կշարունակվի բուժհաստատություններում վերապատրաստումների և այլ միջոցառումների իրականացումը:

Քննարկումը նախաձեռնող Արսեն Թորոսյանն առողջապահության նախարարությանն առաջարկել է բժիշկների կողմից տրվող դեղատոմսերի թվի աճին նպաստող կոնկրետ քայլեր մշակել ժամանակացույցի հետ մեկտեղ, որպեսզի խնդրին հնարավորինս սեղմ ժամկետներում լուծում տրվի և ամբողջ պատասխանատվությունը չմնա դեղատների ուսերին:

Հանդիպման ավարտին առաջիկայում հանդիպելու և առաջարկները քննարկելու պայմանավորվածություն է ձեռք բերվել:

Այս թեմայով ՀՐԱՏԱՊ.ԴՕԿ Կուսակցության պատվավոր նախագահ Վարդան Ղուկասյանն հանգամանալից կանդրադառնա ԵԽԽՎ-ում ՀՀ ԱԺ ընտրությունների վերաբերյալ հնչած գնահատականներին Ազգերի լիգա. Գոլառատ և գերլարված պայքարում Հայաստանի ընտրանին պարտություն կրեց(տեսանյութ) Ռուսները խոցել են Ուկրաինայի Գիտությունների ազգային ակադեմիայի շենքը (Տեսանյութ) Ո՛չ Կառավարությունը պետք է դառնա եկեղեցական ժողով, ո՛չ Եկեղեցին՝ կառավարություն Ազգերի լիգա. Հայաստանի հավաքականը հաղթանակով մեկնարկեց մրցաշարում (տեսանյութ)