«ԱՄԵՆԱՄԵԾ ՀԱՂԹԱՆԱԿՍ ԱՇԽԱՐՀԻ ՉԵՄՊԻՈՆԻ ՏԻՏՂՈՍԸ ՆՎԱՃԵԼՆ ԷՐ». ԾԱՆՐԱՄԱՐՏԻ ԵՐԻՏԱՍԱՐԴՆԵՐԻ ԱՇԽԱՐՀԻ ՉԵՄՊԻՈՆ, ՄԻՆՉԵՎ 20 ՏԱՐԵԿԱՆՆԵՐԻ ԵՎՐՈՊԱՅԻ ՉԵՄՊԻՈՆ ԷՄՄԱ ՊՈՂՈՍՅԱՆ

Iravunk. com-ի մարզական թղթակիցը զրուցել է Ծանրամարտի երիտասարդների Աշխարհի չեմպիոն, մինչև 20 տարեկանների Եվրոպայի առաջնության հաղթող ԷՄՄԱ ՊՈՂՈՍՅԱՆԻ հետ։

- Ողջույն, Էմմա ։Անցած տարի փառահեղ հաղթանակով դարձար երիտասարդների Աշխարհի չեմպիոն ու Եվրոպայի մինչև 20 տարեկանների առաջնության հաղթող։ Տարեվերջին էլ առաջին անգամ ճանաչվեցիր տարվա լավագույն երիտասարդ մարզուհի։

- Իսկապես, անցած տարին, 2024 թվականը, շատ ստացված, հաջող տարի էր ինձ համար։ Երկու մեծ մրցաշարերում դարձա չեմպիոն։ Մարզիչների հետ շատ ենք պարապել, ջանք ու եռանդ չենք խնայել և հասանք մեր նպատակին։ Սրանով չենք բավարարվելու, պետք է ավելացնել ու ավելի մեծ հաղթանակների հասնել։ Ինձ ամենաշատը ուրախացրեց Աշխարհի առաջնությունում տարածս հաղթանակը։

- Դա ես համարում անցած տարվա քո ամենամեծ նվաճումը։

- Համեմատության կարգով ամենամեծ հաղթանակս երիտասարդների Աշխարհի չեմպիոնի տիտղոսը նվաճելն էր։ Ճիշտն ասած, չէի սպասում, որ կկարողանամ հաղթել։ Պատրաստ էի, լավ մարզավիճակում էի գտնվում, սակայն հառակորդներս բավականին ուժեղ էին, ես էլ մրցումներից առաջ հոգեպես լավ վիճակում չէի։ Մարզիչներիս օգնությամբ ու աջակցությամբ հավաքվեցի և հաղթեցի։ Իսկապես, շատ թեժ պայքար էր ընթանում իմ քաշային կարգում։ Եվրոպայի առաջնության ժամանակ ավելի հեշտ էր, ընդամենը մեկ ծանրորդ էր մրցակիցս։ Հենց այդ պատճառով էլ առանձնացնում եմ Աշխարհի առաջնությունը։ Ամենահիշարժան օրս 2024 թվականի սեպտեմբերի 25-ն էր, այդ օրը ես հռչակվեցի Աշխարհի չեմպիոն։ Շատ տպավորիչ էր, հատկապես պարգևատրման արարողությունը, շատ աննկարագրելի զգացողություններ ունեցա այդ պահին։ Կուզենամ, որ այդպիսի հաղթանակներ միշտ ունենանք։

- Էմմա, իսկ ինչ նպատակներ ունես այս նոր տարում։

- Շատ մեծ երազանքներով եմ դիմավորել 2025 թվականը և մեծ հույս ունեմ, որ այս տարի նույնպես հաջողությունների տարի կլինի բոլորի համար։ Արդեն սկսել ենք մեր հաղթանակները, պետք է ամեն ինչ անենք, որ պարտություններ չլինեն։ Ուզում եմ այս տարի կանանց ծանրամարտում շատ չեմպիոններ ունենանք, շատ Աշխարհի չեմպիոններ։

- Շնորհակալություն, Էմմա, մեզ ժամանակ տրամադրելու համար։

- Ես էլ եմ շնորհակալ, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Բռնցքամարտի Եվրոպայի մեծահասակների առաջնությունից երկու բրոնզե մեդալ Հերթական կորուստն ազգային հավաքականում Շախմատի համաշխարհային օլիմպիադա. Հայաստանի հավաքականը 6 խաղափուլից հետո 3-րդ տեղում է Եվրոպայի առաջնությունում այսօր ռինգ դուրս կգա Հայաստանի երեք ներկայացուցիչ Սիրո անունը Հայաստան է․ Սպարտայի ջերմ գրառումը Արարատ-Արմենիայի հետ խաղից հետո