Իսկ հետաքրքիր է՝ մեկը չկա՞, որ Ալենին ասի. ԶԱՐՄԱՆՔ

Հնդկաստան այցն ու փիղ հեծնելը, կարծես թե, ծանր հետեւանքներ են ունեցել ԱԺ նախագահ ԱԼԵՆ ՍԻՄՈՆՅԱՆԻ վրա: Նա անհասցե քննադատել է նրանց, ովքեր խոսում են, ինչպես ինքն է նշում, «այս կամ այն պաշտոնյայի տղայական կամ դուխավիկ լինել-չլինելուց, եւ թե ով` ով է եղել հեղափոխությունից առաջ կամ ով է լինելու, եթե մի օր պաշտոն չունենա»: Եվ ահա Ալենը զարմացած հարց է բարձրացնում. «Մեկը չկա՞ սրանց սովորեցնի տարրական մարդկային ու կյանքի կանոններ, թե չէ երկու անգամ «Крёстный отец» ֆիլմն են նայել, էս վերջերս էլ «Слово пацана»-ն են նայել, հիմա տեսախցիկ են տեսնում կամ ինտերնետ մտնում, սկսում տուզիկի պես փղի վրա հաչալ, հաչալ` մտածելով, թե փղի կնճիթին է դա, կամ էլ կողքից նայողը կասի, դե ուրեմն՝ իրենից երեւի մի բան ներկայացնում է, որ փղի վրա կարողանում է հաչալ»: Իսկ հետաքրքիր է՝ մեկը չկա՞, որ Ալենին ասի՝ սա, ախր, հեչ ԱԺ նախագահի աթոռը զբաղեցնողի ոճ չէ, առավել եւս՝ փիղ երեւակայելը նույնիսկ վտանգավոր է: Ո՞վ իմանա, գուցե ինչ-որ մեկն ասվածը թարգամանի ՌԴ ԱԳ նախարար Լավրովի համար եւ կվադրոբերների գոյությամբ անհանգստացած դիվանագետը սխա՞լ հասկանա Ալենի նման համեմատությունը:

Երեւանի նախկին քաղաքապետ, տրանսպորտի թանկացման դեմ թունդ բոյկոտող ՀԱՅԿ ՄԱՐՈՒԹՅԱՆԸ լրատվամիջոցներից մեկի հետ զրույցում հայտարարել է. «Եթե կա մարդ այս աշխարհում, որը կբերի տեսանյութ, որտեղ ես ասում եմ՝ որ պետք է տրանսպորտը թանկանա, եւ ես թանկացնելու եմ տրանսպորտը, ես այդ մարդուն կվճարեմ 1000 ամերիկյան դոլար: Եթե չբերի, ինքը ինձ թող վճարի 100 դրամ »: Ամենեւին էլ չհավակնելով մարությանական 1000 դոլարին, այդուհանդերձ, թարմացնենք հիշողությունը, թե ինչ էր ասում 2018-ին՝ որպես քաղաքապետ, երդմնակալությունից հետո: «Ինչ-որ տեղ զարմանալի է, քանի որ թանկացել է ամեն ինչի գինը՝ լուցկու, կարագի։ Այն ժամանակ օբյեկտիվ էր, որ ասում էինք՝ մի թանկացրեք, իսկ հիմա որ չի թանկանում, դա արդեն օբյեկտիվ չէ։ Ինձ թվում է, որ նախկին իշխանությունները վախենում էին տրանսպորտի գինը բարձրացնել, որ նոր ալիք չբարձրանա բողոքի։ Բայց միգուցե օբյեկտիվության պահ կա` այն բարձրացնելու: Շատ կարեւոր է, որ պետք է փոխվեն տրանսպորտային միջոցները, եւ նոր խոսենք գների թանկացման մասին»,- ժամանակին նշում էր նա՝ ընդգծելով, որ եթե չթանկանա քաղաքացիների համար տրանսպորտի գինը, ապա մանկապարտեզների վերանորոգման եւ այլ հարցեր չեն լուծվի: Բա արժե՞ր հազար դոլարն այսպես քոռուփուչ անել:

Ի դեպ, անդրադարձանք Մարությանին, հիշեցինք նաեւ իր թիմակից Երեւանի ավագանու նախկին անդամ ԳՐԻԳՈՐԻ ԵՐԻՑՅԱՆԻՆ: Տրանսպորտի թանկացման դեմ բողոքի ակցիաներին միացած Երիցյանը բոյկոտի հետաքրքիր մեթոդ է առաջարկում՝ մետրոպոլիտենի համար: «Մենք ձեռք էինք բերել 9 հազար դրամանոց քարտ եւ շուրջ 500 մարդ քիչ առաջ անվճար անցավ… Փաստորեն, մեկանգամյա այս բազմակի օգտագործման մեկ ամսվա քարտով հնարավոր է անսահմանափակ մուտք գործել մետրոպոլիտեն: Ես հատուկ գնել եմ քաղաքացիներին անվճար թողնելու, որ մետրո մտնեն, եւ սա նույնպես ակցիայի մի տարբերակ է: Խորհուրդ եմ տալիս նաեւ, ովքեր նման հնարավորություն ունեն, առնեն այս քարտերը, քանի դեռ դրանք չեն փակել, որովհետեւ իմ քարտը, կարծես թե, արդեն 500-րդ անգամից արգելափակվեց: Սա էլ է հարց՝ իմ անսահմանափակ քարտը՝ պարզվում է սահմանափակ է»,-զարմանում է Երիցյանը, ու մենք էլ` իր հետ:

Զարմացած է «Իրավունք»-ը

Այս թեմայով Բաբուխանյանը բարձրացրեց Արցախի օկուպացված քաղաքների հարցը «Ժողովուրդ». Այսօր կորոշեն Հայկ Սարգսյանի ճակատագիրը ՔՊ-ի կեղտոտ սպիտակեղենը փռել են արեւին «Ժողովուրդ». Քննարկվում է Ավետ Կոնջոյանին և Հայկ Սարգսյանին ՔՊ-ից հեռացնելու հարցը Նոյեմբերի 9-ը Հայաստանի փրկօղակն էր․ Հայկ Այվազյան