«Թատերական շաբաթ» ծրագրի շրջանակում թատրոնները հանդես կգան յուրօրինակ միջոցառումներով

ՀՀ կրթության, գիտության, մշակույթի և սպորտի նախարարությունը հայտարարում է «Թատերական շաբաթ» ծրագրի մեկնարկի մասին, որը կանցկացվի մարտի 22-30-ը:

Ծրագրին կմասնակցեն ԿԳՄՍ նախարարության, Երևանի քաղաքապետարանի և մարզերի համայնքային ենթակայությամբ գործող թատրոնները։

Թատրոնի միջազգային օրվան՝ մարտի 27-ին ընդառաջ և հետո թատրոններում դպրոցականների և ուսանողների համար կիրականացվեն տարաբնույթ կրթամշակութային ծրագրեր, ինտերակտիվ ներկայացումներ, խաղեր, հանդիպումներ, շրջայցեր թատրոններում:

Յուրաքանչյուր թատրոն առաջարկում է իր ծրագիրը, որին մասնակցելու համար անհրաժեշտ է նախապես գրանցվել։

«Թատերական շաբաթ» ծրագրի շրջանակում դպրոցականներն ու ուսանողները վարպետության դասերի, թատրոնի տեխնիկական և ստեղծագործական կազմերի հետ հանդիպումների, զրույցների, շրջայցերի միջոցով կբացահայտեն թատրոնի չերևացող կողմերը՝ հետնաբեմը, դիմահարդարման սենյակները, լուսաձայնային տեխնիկայի սենյակները, արտադրամասերը, որոնցում պատրաստվում են դեկորացիաներ, կարվում են բեմական հագուստներ: Ծրագրի մասնակիցները  հնարավորություն կունենան ներկա լինելու դերասանների փորձերին, մասնակցելու թատերական ընթերցումներին։ Նշված հանդիպումների  ընթացքում այցելուները կզրուցեն դերասանների, ռեժիսորների հետ, կծանոթանան թատերական ներկայացման կազմակերպման գործընթացին:

«Թատերական շաբաթ» ծրագրի անցկացումը համընկնում է դպրոցականների գարնանային արձակուրդի հետ և միջոցառումներին երեխաները կարող են մասնակցել ինչպես դպրոցական խմբերով, այնպես էլ ընտանիքների հետ՝ նախապես պայմանավորվելով տվյալ թատրոնի հետ:

Տեղեկացնենք, որ «Թատերական շաբաթ» ծրագրի շրջանակում շրջայցերն ու հանդիպումները թատրոնների անձնակազմերի հետ անվճար է:

Նշենք, որ «Թատերական շաբաթ» ծրագիրն առաջին անգամ իրականացվել է 2024 թվականին: Անցյալ տարի նախարարության ենթակայությամբ թատրոններ է այցելել  շուրջ 5000 մասնակից՝ աշակերտներ, ուսուցիչներ, ուսանողներ, ծնողներ:

Այս թեմայով Լոռու մարզի Ակներ գյուղի ժողովրդական թատրոնը նշեց հիմնադրման 100-ամյակը «Ժողովուրդ». Փաշինյանը կառավարության ծրագիրը պետք է ներկայացնի հաջորդ շաբաթ Ուիտկոֆը և Քուշները կարող են այցելել Կիև և Մոսկվա հաջորդ շաբաթ Ովքեր են Հայաստանը ներկայացրել Ավինյոնի միջազգային թատերական փառատոնում