Հայաստանում ընտանեկան բռնության դեպքերը կտրուկ աճել են՝ շուրջ 2.5 անգամ. դատախազություն

Հայաստանում 2024 թվականին ընտանեկան բռնության դեպքերը հանրապետությունում զգալի աճ են արձանագրել։ Այս մասին նշված է ՀՀ գլխավոր դատախազության 2024 թվականի գործունեության հաշվետվության մեջ։ Հատկապես կտրուկ ավելացել են ֆիզիկական և հոգեկան ներգործության դեպքերը։

Ըստ պաշտոնական տվյալների՝ 2024 թվականին արձանագրվել է ընտանեկան բռնության 934 դեպք՝ ֆիզիկական ներգործությամբ, այն դեպքում, երբ 2023 թվականին այդ թիվը կազմել էր 372։ Աճը կազմել է 562 դեպք կամ 151 տոկոս։ Հոգեկան ներգործության դեպքերը 2024-ին կազմել են 166, իսկ 2023-ին՝ 46։ Այս ցուցանիշը ևս աճել է 120 դեպքով կամ 261 տոկոսով։

Ընդհանուր առմամբ, 2024 թվականին արձանագրվել է ընտանեկան և կենցաղային բռնության 1360 դեպք, որոնցից 1100-ը (81 տոկոսը) եղել են ֆիզիկական և հոգեկան բռնության դրսևորումներ։ Նմանատիպ պատկեր է եղել նաև 2023 թվականին՝ 508 դեպքից 418-ը (82 տոկոս)։

Արձանագրվել է նաև բռնության առանձնապես ծանր դեպքերի աճ։ Եթե 2023 թվականին ընտանեկան և կենցաղային բռնության հետևանքով սպանության 3 դեպք էր արձանագրվել, ապա 2024 թվականին՝ 13։ Առողջությանը դիտավորությամբ ծանր վնաս պատճառելու դեպքերն էլ աճել են՝ 8-ից հասնելով 15-ի։

Դատախազությունը կարևորում է պետական մարմինների համագործակցությունը ընտանեկան բռնության դեմ պայքարի գործում։ Ըստ հաղորդման՝ 2024 թվականին Դատախազության ներկայացուցիչները շարունակել են մասնակցել ընտանեկան և կենցաղային բռնության հարցերով աշխատանքային քննարկումներին՝ կապ պահելով տարածքային ստորաբաժանումների և Ոստիկանության միջև՝ կոնկրետ քրեական վարույթների շրջանակում արդյունավետ արձագանք ապահովելու նպատակով։

2025 թվականի հունվարի 17-ին ընտանեկան բռնության դեմ պայքարի արդյունավետության բարձրացման նպատակով ձևավորվել է աշխատանքային խումբ՝ Դատախազության, Քննչական կոմիտեի և ՆԳ նախարարության ներկայացուցիչների մասնակցությամբ։

Բացի այդ, Արդարադատության ակադեմիայում 2024 թվականին 35 դատախազ մասնակցել է վերապատրաստման ծրագրերի՝ բռնության ենթարկված անձանց հետ աշխատանքի, կանխարգելման և իրավական արձագանքի թեմաներով։

Այս թեմայով Երևանում բռնություն են կատարել ամուսինների և նրանց աղջկա նկատմամբ. հնչել են կրակոցներ Նախաքննական մարմնին ուղղակի պետք էր փակի տակ պահել. Նոր մանրամասներ նախկին վարչապետի որդու գործով Կինը հայտնել է, որ ցերեկը ամուսինը պլաստմասե խողովակով հարվածել է իրեն, երեկոյան իր կամքին հակառակ սեռական հարաբերություն ունեցել 42-ամյա տղամարդն իր բնակարանում 9-ամյա տղայի հետ անհատական պարապմունքների ժամանակ դրսևորել է uեքunւшլ բնույթի գործողություններ Ընտանեկան և կենցաղային բռնության մասին ՆԳՆ ոստիկանություն ստացված հաղորդումները 78-ով ավելացել են