Երևանի երկաթուղային կայարանում բացվել է «Նախաստեղծ Ռուսաստան» լուսանկարչական ցուցահանդեսը

Ցուցահանդեսում այցելուներին ներկայացվեցին մոտ երկու տասնյակ բարձրարվեստ լուսանկարներ, որոնք արտացոլում են Ռուսաստանի վեհաշուք բնաշխարհը՝ դրա բազմազան կենդանական ու բուսական աշխարհով, մաքուր լանդշաֆտներով և խորհրդավոր վայրերով։ Ամեն մի գործ հանդիսանում է բնության հրաշալիքների նկատմամբ լուսանկարիչների սրտացավ վերաբերմունքի և հոգևոր կապի արտահայտությունը։

 

Միջոցառման նախաձեռնողն է «Ռուսական երկաթուղիներ» ԲԲԸ-ն, իսկ այդ ամենի իրականացմանը գործուն աջակցություն է ցուցաբերել «Հարավկովկասյան երկաթուղի» ՓԲԸ-ն։ Այս համագործակցությունը ևս մեկ վկայությունն է երկու ընկերությունների նվիրվածության՝ ուղղված բնության պահպանությանն ու էկոլոգիական գիտակցության բարձրացմանը։

«Նախաստեղծ Ռուսաստան» փառատոնը համարվում է բնության լուսանկարչությանը նվիրված խոշորագույն և ամենահեղինակավոր ցուցահանդեսներից մեկը նաև ողջ Եվրոպայում։ Այն ոչ միայն ներկայացնում է բնության գեղատեսիլ պատկերները, այլև բարձրաձայնում է արդիական բնապահպանական խնդիրների մասին՝ ընդգծելով հազվագյուտ և վերացող բուսատեսակների ու կենդանիների պահպանման, ինչպես նաև էկոլոգիական տուրիզմի խթանման անհրաժեշտությունը։

 

Ցուցահանդեսի բացման ժամանակ «Հարավկովկասյան երկաթուղի» ընկերության գլխավոր տնօրեն Ալեքսեյ Մելնիկովն իր ողջույնի խոսքում նշեց. « «Ռուսական երկաթուղիներ» ԲԲԸ-ն երկար տարիներ հանդիսանում է այս փառատոնի վստահելի և ներգրավված գործընկերը։ Մեզ համար մեծ պատիվ է հյուրընկալել այս բացառիկ ցուցահանդեսը Երևանում։ Մենք հավատում ենք, որ այն անտարբեր չի թողնի Հայաստանի բնասեր հանրությանը։ Ամեն տարի «Նախաստեղծ Ռուսաստան» փառատոնն ավելի ու ավելի լայն լսարանի է հասնում՝ հորդորելով մարդկանց վերարժևորել բնության գեղեցկությունն ու գիտակցել դրա պահպանման կարևորությունը»։

 

Դիանա Մանուկյան