ՆԱՏՕ-ն շարունակում է Հարավային Կովկասի երկրներին իր ազդեցության գոտի ներքաշելու կուրսը. ՌԴ ԱԳՆ

Հյուսիսատլանտյան դաշինքի ցանկացած գործողություն Հարավային Կովկասում ուղղված է այդ տարածաշրջանում անկայունության գոտի ստեղծելուն: Այս մասին, ըստ ռուսական Ինտերֆաքս գործակալության, այսօր հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Ապրիլի 28-ից Վրաստանում անցկացվում են ՆԱՏՕ-ի մասնակցությամբ հերթական հրամանատարաշտաբային զորավարժությունները: Ըստ առկա տեղեկությունների, միջոցառմանը մասնակցում են ռազմական բլոկի գործընկեր 17 երկրներ, այդ թվում՝ Հայաստանն ու Ադրբեջանը: Այսպիսով, դաշինքը շարունակում է Հարավային Կովկասի հանրապետությունները իր ազդեցության ուղեծիր ներքաշելու ընթացքը»,- հայտարարել է Զախարովան։

Նա նշել է, որ «որպես կանոն, փոխգործակցության նման ձևաչափերի միջոցով է, որ ՆԱՏՕ-ն տարածաշրջանային ուժերին պարտադրում է իր չափանիշներն ու գաղափարախոսությունը, պայմաններ է ստեղծում պաշտպանական համալիրի վերափոխման, զինված ուժերի զարգացման և արտաքին քաղաքականության գործընթացի նկատմամբ վերահսկողություն սահմանելու համար»։

«Ոչ ոք չպետք է պատրանքներ ունենա: Հյուսիսատլանտյան դաշինքի ցանկացած գործողություն Հարավային Կովկասում ուղղված չէ անվտանգության ամրապնդմանը, այլ այնտեղ անկայունության և ռազմաքաղաքական լարվածության գոտի ստեղծելուն», - ընդգծել է Զախարովան։

Նա հույս է հայտնել, որ վերոնշյալ հանրապետությունները «վճռական մոտեցում կցուցաբերեն նման միջոցառումներին մասնակցելու հարցում»։

Այս թեմայով Ռուսական հարվածից հետո Կիևում փլուզվել Սլավուտիչի «Հարավային» կամուրջը Երեք տարի գերության մեջ. Արայիկ Հարությունյանը, Ռուբեն Վարդանյանն ու մյուս հայերը շարունակում են ապօրինի պահվել Ադրբեջանում Փաշինյանի տրանսֆորմացիան իրականում պայքար է այն հարցի շուրջ, թե Ռուսաստանը Հայաստանի համար լինելու է գործընկե՞ր, թե՞ համակարգային հենարան «Լեվ Գրուպը» շարունակում է փաստաբանական պրոֆեսիոնալիզմի մաստեր կլաս ցույց տալ Այս գիշերվանից Երկիրը գտնվում է հզոր մագնիսական փոթորկի մաքսիմալ ազդեցության տակ