Ադրինե Աճեմյանը կպայքարի 130 գեղեցկուհիների հետ Հնդկաստանում

ՀԱՅԱՍՏԱՆԸ ՎԵՐԱԴԱՌՆՈՒՄ Է «ՄԻՍՍ ԱՇԽԱՐՀ» ՄՐՑՈՒՅԹ

Հայաստանը երեք տարվա ընդմիջումից հետո կրկին կմասնակցի «Միսս աշխարհ» մրցույթին: Մայիսի 7-ից 31-ը Հնդկաստանի Թելանգանա քաղաքում կայանալիք շուրջ 200 միլիոն հեռուստադիտող ունեցող մրցույթին Հայաստանը ներկայացնելու է 19-ամյա Ադրինե Աճեմյանը: Նա զբաղվում է երգով, պարով եւ նկարահանվում է սերիալներում, ուսանում է Երեւանի թատրոնի եւ կինոյի պետական ինստիտուտի երկրոդ կուրսում:

Ադրինեն այս տարի լինելու է 130 պետությունների ներկայացուցիչներից մեկը, նա տրամադրված է պատվով կատարել իր առաքելությունը՝ լավագույնս ներկայանալ այդ հեղինակավոր բեմում՝ իր կարողությունների չափով ավելի ճանաչելի դարձնելով հայկական մշակույթը։ Այս մասին «Իրավունք»-ը զրուցել է հենց ԱԴՐԻՆԵ ԱՃԵՄՅԱՆԻ հետ:

— Նախ շնորհավորում ենք Ձեզ՝ Հնդկաստանում կայանալիք միջազգային մրցույթում Հայաստանը ներկայացնելու պատվին արժանանալու համար: Ինչպե՞ս կատարվեց ընտրությունը եւ ի՞նչ սկզբունքներով:

— Անչափ շնորհակալ եմ «Իրավունք»-ին՝ նման ուշադրության համար: Քանի որ «Միսս աշխարհի» արտոնագիրը ձեռք է բերվել համեմատաբար վերջերս, Հայաստանի մասնակիցը ընտրվել է ոչ թե ազգային գեղեցկության մրցույթի, այլ` քասթինգի միջոցով, եւ ընտրվեցի ես, ինչի համար շատ ուրախ եմ: Կարծում եմ՝ գլխավոր սկզբունքը եղել է հայի կերպարը, եւ դա տեսել են ավելի շատ իմ մեջ: Ասեմ, որ իմ տիտղոսը կոչվում է «Միսս աշխարհ-Հայաստան»:

— Ի՞նչ եք զգում այս պահին:

— Հպարտության մեծ զգացողություն ունեմ, ինչպես նաեւ պատասխանատվության մեծ զգացողություն:

— Ի՞նչ հագուստով եք ներկայանալու մրցույթին, եւ ո՞վքեր են հեղինակները:

— Ողջ ընթացքում հանդես եմ գալու մոդելավորող-դիզայներ Գեւորգ Շադոյանի կարած զգեստներով, ինչպես նաեւ պարելու եմ Սերոժ Բաղդասարյանի «Մուսա լեռան Դաբկի» երաժշտության տակ՝ Երեւանի ազգային տարազով:

— Ո՞վքեր են ուղեկցելու Ձեզ Հնդկաստանում:

— Հնդկաստան կմեկնեմ մորս հետ, սակայն 25 օրվա ընթացքում կգան նաեւ «Միսս Երեւան Փրոդաքշն»-ի տնօրենն ու կազմակերպիչները:

—Դեռ փուլեր կան, որոնք պետք է հաղթահարե՞ք՝ մինչեւ եզրափակիչ:

— Այո, մրցույթը անցկացվելու է փուլերով, իսկ վերջում լինելու է կիսաեզրափակիչ եւ եզրափակիչ փուլ: Լինելու են նաեւ տաղանդի փուլեր, եւ ես մասնակցելու եմ երկու փուլերի՝ երգի եւ պարի: Գլխավոր մրցույթները լինելու են մայիսի 29-ին, 30-ին եւ 31-ին:

— Պատրաստվո՞ւմ եք բարձրաձայնել Հայաստանի եւ Արցախի խնդիրները լայն հասարակության առաջ:

— Ես մասնակցում եմ գեղեցկության մրցույթի եւ կարծում եմ, որ այդ հարցերին շատ ճիշտ կլինի պատասխանեն ոլորտի ներկայացուցիչները, քաղաքագետները: Սակայն, եթե հաղորդավարն ինձ նման հարց տա, չնայած չեմ կարծում, որ նման հարց կտա, բայց այնուամենայնիվ, ես կպատասխանեմ: Իմ գլխավոր հղումը, ինչպես որ եղել է նախորդ հարցազրույցների ժամանակ, մնում է անփոփոխ, դա խաղաղությունն է, եւ որ աշխարհի ուշադրության կենտրոնում լինեն փոքր երկրները, որոնք որ պատերազմական իրավիճակում են հայտնվում: Աշխարհը նման դեպքերում չպետք է լռի: Շատ կարեւորում եմ, որ Հայաստանը ներկայացնեմ` որպես հին մշակութային երկիր: Ներկայացնեմ Տիգրան Մեծի, Գարեգին Նժդեհի Հայաստանը: Ուզում եմ ներկայացնել, թե ինչ հզոր պետություն ենք մենք եղել, կանք ու դեռ ավելի պիտի հզորանանք:

— Կրթություն, աշխատանք եւ վերջապես՝ Միսս Հայաստանի ներկայացուցիչ, դժվար չէ՞, հասցնո՞ւմ եք:

— Իհարկե, մեծ դժվարությամբ եմ հասցնում: Կարող եմ ասել, որ տանն ինձ չեն տեսնում: Ես կա՛մ դասի եմ, կա՛մ նկարահանման եմ, կա՛մ այս նախապատրաստական փուլի մեջ եմ եւ փորձերի եմ: Սակայն, փորձում եմ ամեն բան հասցնել: Ինձ համար շատ կարեւոր է կրթությունը: Ես համարում եմ, որ պետք է լինել կրթված դերասանուհի: Նկարահանումներս էլ են շարունակվում, այսինքն՝ փորձում եմ ամեն բան հասցնել:

ՆԱՆԱ ՍԱՐԳՍՅԱՆ

Այս թեմայով Թագուհիները չեն մրցում, այլ՝ փոխում են խաղի կանոնները. Ադրինե Աճեմյան Խիստ կասկածում եմ, որ Փաշինյանն Առաքելական եկեղեցու հետեւորդ է. Գեւորգ Աճեմյան «Միսս Աշխարհ» մրցույթին ինչ հագուստով է ներկայացել Հայաստանը ներկայացնող գեղեցկուհին Չկա ավելի մեծ ջերմություն դերասանի համար, քան հանդիսատեսի սերը. Արա Դեղտրիկյանը հավերժ կմնա մեր սրտերում Ինչ են պատրաստում Ռուսաստանն ու Իրանը, հետո ճաշի հոտը կառնենք. Շահե Աճեմյան