Ինչ հանգուցալուծում ունեցավ Պատանի հանդիսատեսի թատրոնում բարձրացված աղմուկը. Քաղաքապետարանից փակագծեր են բացում

Մշակութային 15 Հունիս, 2025 15:55

Ուղիղ մեկ ամիս առաջ թատերական կրքեր բորբոքվեցին Պատանի հանդիսատեսի թատրոնի շուրջ: Դերասանները բողոքի ձայն էին բարձրացրել՝ քաղաքապետարանի կողմից թատրոնի տնօրեն Էմին Թորոսյանի պաշտոնավարումը դադարեցնելու հետ կապված: Իսկ վերջինս էլ հայտարարել էր. «Պարտավորված եմ զգում տեղեկացնել բոլոր սրտացավ մարդկանց. Երեւանի քաղաքապետարանից ստացած որոշումն առ այն, որ մայիսի 13-ից, հիմք ընդունելով մշակույթի վարչության պետ Գոշ Սարգսյանի հիմնազուրկ զեկուցագիրն ուղղված Երեւանի քաղաքապետին, աշխատանքային պայմանագրի միակողմանի խզմամբ, դադարեցվում է գործունեությունս Պատանի հանդիսատեսի թատրոնի տնօրենի պաշտոնում: Մեկնաբանություններն ավելորդ եմ համարում...»:

Եվ թեպետ մեկնաբանությունները Թորոսյանն ավելորդ էր համարում, բայցեեւ շնորհակալ էր, որ դրանց պակասը չեղավ. թատրոնի ստեղծագործական կազմը հանրային մեծ աղմուկ բարձրացրեց: Հատկանշական էր, որ քննադատությունների մեջ ավելի շատ հնչում էր Երեւանի քաղաքապետարանի մշակույթի եւ տուրիզմի վարչության պետ Գոշ Սարգսյանի անունը, քան անձամբ քաղաքապետ Տիգրան Ավինյանի: Ամեն դեպքում, տրամաբանությունը հուշում էր, որ եթե կա ծագած վեճ, ապա պետք է վիճարկվի ոչ թե բեմում՝ թողնելով այն թատրոնի դերասանների դատաստանին, այլ՝ դատարանում, բայց, կարծես թե, քաղաքապետարան-Թորոսյան կոնֆլիկտը դրան չհասավ: Իսկ աղմուկը լռեց, երբ քաղաքապետարանը հանդես եկավ հայտարարությամբ, որ առաջիկայում թատրոնի կոլեկտիվի հետ կկազմակերպվի հանդիպում, որի ընթացքում կներկայացվի թատրոնի տնօրենի ժամանակավոր պաշտոնակատար Գոռ Մարգարյանը՝ Աշտարակի դրամատիկական թատրոնի գեղարվեստական ղեկավարը: Ռեժիսոր, որին հաջողվել է նույն Աշտարակի դրամատիկական թատրոնը զրոյից հասցնել ֆենոմենալ հաջողությունների, իսկ իր բեմադրած, օրինակ, «Մեղրի համը» ներկայացումը, ժամանակին 6 անվանակարգում հաղթող է ճանաչվել ՀԹԳՄ «Արտավազդ» մրցանակաբաշխությունում: «Իրավունք»-ի տեղեկություններով՝ նրան արդեն իսկ Երեւանի փոխքաղաքապետ Լեւոն Հովհաննիսյանը ներկայացրել է աշխատակազմին, խոսել առաջիկա ծրագրերի մասին:

Այդուհանդերձ, նշենք, որ մի շարք փշոտ հարցերի պատասխաններ «Իրավունք»-ը փորձել էր ստանալ Երեւանի քաղաքապետարանի մշակույթի եւ տուրիզմի վարչության պետ ԳՈՇ ՍԱՐԳՍՅԱՆԻՑ: Քաղաքապետարանի լրատվության վարչությունը խնդրել էր սպասել 30 օր եւ ահա տեւական լռությունից հետո՝ ներկայացնում ենք պատասխանները:

— Պատանի հանդիսատեսի թատրոնի արդեն նախկին տնօրեն Էմին Թորոսյանը հայտարարել էր, թե իրեն աշխատանքից ազատել են՝ հիմք ընդունելով Ձեր «հիմնազուրկ զեկուցագիրն» ուղղված Երեւանի քաղաքապետին, աշխատանքային պայմանագրի միակողմանի խզմամբ: Իրականում ի՞նչ է տեղի ունեցել:

— Երեւանի քաղաքապետարանի աշխատակազմի մշակույթի եւ տուրիզմի վարչությունն, իրեն վերապահված լիազորությունների եւ գործառույթների շրջանակներում, իրականացնում է Երեւանի ենթակայության մշակութային կազմակերպությունների գործունեության հսկողությունը:

— Այս հարցը քննարկվե՞լ է Երեւանի քաղաքապետ Տիգրան Ավինյանի հետ: Առհասարակ՝ թատրոնի տնօրեն նշանակել-հանելու իրավասությունը ո՞ւմն է եւ ինչո՞ւ եք Դուք հայտնվել թիրախում:

— Այս, ինչպես նաեւ աշխատակազմի մշակույթի եւ տուրիզմի գործառույթներին վերաբերող այլ հարցերն անհրաժեշտության դեպքում քննարկվում են ինչպես Երեւանի քաղաքապետի, այնպես էլ ոլորտը համակարգող քաղաքապետի տեղակալի, աշխատակազմի քարտուղարի, քաղաքապետարանի այլ ստորաբաժանումների ղեկավարների հետ: «Երեւան քաղաքում տեղական ինքնակառավարման մասին» օրենքի 52-րդ հոդվածի 1-ին մասի 6-րդ կետի համաձայն՝ Երեւանի ենթակայության կազմակերպությունների ղեկավարներին պաշտոնի նշանակում եւ պաշտոնից ազատում է Երեւանի քաղաքապետը:

— Ի վերջո, ի՞նչ է սպասվում Պատանի հանդիսատեսի թատրոնին: Անգամ կային մեկնաբանություններ, թե «քաղաքապետարանը քանդում է թատրոնը»:

— Այս օրերի ընթացքում տարատեսակ, աբսուրդին հասնող տեղեկություններ են տարածվել՝ իբրեւ թե թատրոնը լուծարվելու է, շենքը վաճառվելու է եւ այլն: Նմանատիպ անհեթեթ տեղեկություններին անդրադառնալու կարիք չկա, քանի որ Երեւանի քաղաքապետարանը չի պատրաստվում լուծարել, միավորել եւ նմանատիպ այլ գործողություններ իրականացնել շուրջ 1 դար պատմություն ունեցող, իր տեսակով եզակի թատերական հաստատության նկատմամբ: Թատրոնը եւ շենքը Երեւան համայնքինն են, որտեղ դեռ տասնամյակներ պետք է ստեղծվի արվեստ երեխաների համար, եւ Երեւանի քաղաքապետարանն ունի հանձնառություն՝ ապահովել համապետական նշանակության թատրոնի անխաթար գործունեությունն ու շարունակական զարգացումը:

— Հիմա, փաստորեն, տնօրենի ժամանակավոր պաշտոնակատար է նշանակվել, իսկ տնօրենի մրցույթ սպասվո՞ւմ է:

— Սահմանված կարգի համաձայն՝ առաջիկայում կհայտարարվի մրցույթ՝ տնօրենի թափուր հաստիքը զբաղեցնելու համար:

— Իսկ թատրոնի ձգձգված վերանորոգման. աշխատավարձերի ուշացման առումով ի՞նչ կարող եք ասել, թե՞ այս հարցն արդեն նոր տնօրենի հետ կորոշվի:

— Առաջիկայում նոր թափով կշարունակվեն կազմակերպության շենքի հիմնանորոգման աշխատանքները, որից հետո կիրականացվի թատրոնի տեխնիկական ամբողջական վերազինման ծրագիրը: Մհեր Մկրտչյանի անվան արտիստական թատրոնում իրականացված վերազինման եւ արդիականացման ծրագրի նմանությամբ, Պատանի հանդիսատեսի թատրոնը նույնպես կվերազինվի նոր ձայնային եւ լուսային տեխնիկայով: Շենքի հիմնանորոգման եւ արդիականացման ամբողջական ծրագրի համար համայնքային բյուջեից հատկացվել է շուրջ 2 մլրդ ՀՀ դրամ:

Թատրոնի շենքի հիմնանորոգման ժամանակահատվածում քաղաքապետարանը նախատեսում է թատրոնի անձնակազմին գործուղել մարզային հյուրախաղերի՝ ապահովելով թատրոնի անձնակազմի ծանրաբեռնվածությունը: Ս/թ հունիսից ավելացվել է թատրոնի սուբսիդավորումը շուրջ 100 մլն ՀՀ դրամով՝ աշխատավարձերի բարձրացման համար, եւս 50 մլն ՀՀ դրամ կհատկացվի նոր ծրագրերի եւ բեմադրությունների իրականացման համար: Նմանատիպ ծրագրերն արդեն իսկ իրականացվել են նաեւ քաղաքապետարանի ենթակայության Հր. Ղափլանյանի անվան դրամատիկական եւ Մհեր Մկրտչյանի անվան արտիստական թատրոններում:

Ի դեպ, մենք նաեւ հարցադրում էինք հղել շատ չարչրկված հրավիրատոմսերի հետ կապված, քանի որ առկա քննադատություններից մեկն էլ այն էր, որ քաղաքապետարանը սահմանափակումներ է մտցրել՝ թատրոնի բարեկամներին հրավիրատոմսեր չտալով: Եվ, ըստ էության, ասվում էր, որ Էմին Թորոսյանին էլ «մեղադրում են» հենց հրավիրատոմսեր «շռայլելու» մեջ: Ի վերջո, այլ ավելի ծանրակշիռ պատճառներ կա՞ն, որո՞նք են դրանք, փորձեցինք պարզել քաղաքապետարանից, սակայն այս հարցը մնաց անպատասխան:

ՀՐԱՆՏ ՍԱՐԱՖՅԱՆ