5 տարի առաջ այս օրը սկսվեց 44–օրյա պատերազմը

Այսօր լրանում է 44-օրյա պատերազմի հինգերորդ տարելիցը։ Սեպտեմբերի 27-ի վաղ առավոտյան՝ ժամը 07:10-ի սահմաններում, Ադրբեջանը հարձակում սկսեց Լեռնային Ղարաբաղի շփման գծի ողջ երկայնքով, ինչպես նաև հայ-ադրբեջանական սահմանի որոշ հատվածներում։

Պատերազմի առաջին ժամերից կիրառվեցին ծանր հրետանի, անօդաչու թռչող սարքեր և ավիացիա։ Հայաստանում և Լեռնային Ղարաբաղում հայտարարվեց ռազմական դրություն և ընդհանուր զորահավաք։

Քառասունչորս օր շարունակ ընթանում էին ծանր մարտեր։ Երեք անգամ փորձ արվեց դադարեցնել պատերազմը, սակայն ապարդյուն․ պայմանավորվածությունները չէին պահպանվում, և ադրբեջանական զինված ուժերը շարունակում էին գրոհները։

Ադրբեջանը գրեթե ամբողջությամբ վերահսկողության տակ էր վերցրել Ղարաբաղը՝ հասնելով մինչև Շուշի։ Միայն նոյեմբերի 9-ի լույս 10-ի գիշերը, երբ Ռուսաստանի նախագահի միջնորդությամբ ստորագրվեց եռակողմ հայտարարությունը, ռազմական գործողությունները դադարեցվեցին, իսկ ԼՂ-ում ռուս խաղաղապահ զորախումբ տեղակայվեց։

Պատերազմի հետևանքով հայկական կողմը կորցրեց 3830 կյանք, որոնցից 3752-ը զինծառայողներ էին, 78-ը՝ քաղաքացիական անձինք։ Շարունակում է անհայտ մնալ 195 մարդու ճակատագիրը, այդ թվում՝ 175 զինծառայողի և 20 քաղաքացիականի։ Ադրբեջանի պաշտոնական տվյալներով՝ իրենք տվել են ավելի քան 2900 զոհ և ունեն 6 անհայտ կորած։

Սեպտեմբերի 27-ը դարձավ նորագույն պատմության ամենաողբերգական էջերից մեկի սկիզբը։

44-օրյա պատերազմից հետո ձևավորված ստատուս քվոն պահպանվեց մինչև 2023 թվականի սեպտեմբերի 19-ը, երբ Ադրբեջանը հարձակում գործեց արդեն ավելի քան ինը ամիս շրջափակման մեջ գտնվող Արցախի վրա։ Արցախի բնակչության հեռանալուց հետո Լեռնային Ղարաբաղը ամբողջությամբ անցավ Ադրբեջանի վերահսկողության տակ։

Այս թեմայով Financial Times. Մինչև հաջորդ տարի Ուկրաինայում ոչ մի ենթակառուցվածք չի մնա Փաշինյանը մի շարք նոր եվ ծանր հարցերի առաջ կանգնեց Իրանը մնում է` «պատերազմ, թե խաղաղություն» երկընտրանքի առաջ Եթե այս կիրակի ընտրություն լինի՝ ՔՊ՝ 24.3%, «Ուժեղ Հայաստան»՝ 8.5%, «Հայաստան»՝ 6.7%, ԲՀԿ՝ 3.3% Ընդդիմությունը չկարողացավ նույնիսկ կես քայլ առաջ լինել Նիկոլից․ Վահագն Չախալյանի կոշտ քննադատությունը