«Ժողովուրդ». Գյումրիում իշխանական ճնշումների ալիքը չի դադարում. Փարաքարի սցենարն են փորձում գործի դնել

«Ժողովուրդ» օրաթերթը գրում է. «Հայաստանի երկրորդ քաղաք Գյումրիում, ինչպես Փարաքարում, իշխանական ճնշումների ալիքը չի դադարում։ Քաղաքական ռեպրեսիաների կենտրոնում ոչ միայն Գյումրու գործող քաղաքապետ Վարդան Ղուկասյանն է, այլեւ ԱԺ պատգամավոր Մարտուն Գրիգորյանը։ Ընդ որում, Գյումրիում իրավիճակը փոխելու քաղաքական հրահանգը տվել է Նիկոլ Փաշինյանը ԱԺ ամբիոնից:

Հիշեցնենք, որ քարոզչական ու վարչական ճնշումներով Մարտուն Գրիգորյանի ավագանու «Մեր քաղաքը» դաշինքի խմբակցության անդամ Կարեն Բադալյանին գողացան. այդ մասին ահազանգել էին փաստաբանները: Անհետացումից հետո նա մանդատից հրաժարվելու դիմում գրեց, այնուհետեւ հեռավար դիմում գրեց մանդատը հետ վերցնելու համար, ի վերջո՝ դատարանում պարտություն կրեց, եւ Մարտուն Գրիգորյանը կարողացավ իր ստացած մանդատին տեր կանգնել:

«Ժողովուրդ» օրաթերթը տեղեկացավ, որ Մարտուն Գրիգորյանի երբեմնի մտերիմ Կարեն Բադալյանն այդ դեպքերից հետո ընտանիքով հեռացել է Գյումրուց։

ՔՊ-ի առանձնահատուկ թիրախում է պատգամավորի ավագ որդին` Կամո Գրիգորյանը, որը, չնայած երիտասարդ տարիքին, հեղինակություն ունի Գյումրիում, եւ իշխանությունը փորձում է նրան մեկուսացած պահել` չեզոքացնելու նպատակով։ Նույն տրամաբանությամբ փորձում են սահմանափակել Վարդան Ղուկասյանի որդի Սպարտակ Ղուկասյանի դիրքերը՝ նրան եւս զրկելով գյումրեցիների հետ շփումից, քանի որ նա էլ ազդեցիկ է համայնքում:

Մարտուն Գրիգորյանը լուռ է, չի արձագանքում բացահայտ հակադարձումներով։ Իսկ Վարդան Ղուկասյանը երեկ արդեն հրապարակավ ակնարկեց, թե «Մեզ ուզում են Մարտունի հետ «հագցնել իրար»»։ Ապա Փարաքարի հետընտրական լարումների օրինակով շարունակեց. «Ձեր ենիչերներին ուղարկում եք, սուտ էդ կյանքերի մեջ, նրանց դուխ եք տալիս, ձեռքին տալիս եք ավտոմատ, ինչ ուզում՝ պետականորեն կառուցում եք: Կամ ասեք՝ սա դեմոկրատական երկիր է, կամ ասեք՝ միանձնյա ղեկավարում է» երեկ հայտարարեց Ղուկասյանը:

Ասել է թե` Գյումրիում Փարաքարի սցենարն են փորձում գործի դնել` ցույց տալով, թե կան երկու խմբավորումներ, որոնք իրար ոչնչացնում են: Թերեւս Գյումրիում երկու ընտանիքներն էլ՝ ե՛ւ Գրիգորյանները, ե՛ւ Ղուկասյանները, կանխատեսում են, որ ինչ-որ քրեական պատմություն է եփվում ինչ-որ տեղ, որպեսզի կողմերից մեկին ֆիզիկապես ոչնչացնեն, մյուս կողմին էլ կալանավորեն»։

Առավել մանրամասն թերթի այսօրվա համարում

Այս թեմայով Բիզնես վարկի նախահաստատում՝ 5 րոպեում․ ի՞նչ առաջարկներ ներկայացրեց Յունիբանկը Գյումրիում 11։11. Ի՞նչ է ուզում ճակատագիրը մեզ ասել, կրկնվող թվերի օրը Թրամփը հայտարարել է, որ Ռուսաստանն ու Ուկրաինան առաջին անգամ ցանկանում են վերջ դնել հակամարտությանը Եվրոպան «ծածկել» է ուղևորատար ինքնաթիռների ահաբեկչական սպառնալիքների ալիքը. Bloomberg «Ժողովուրդ». Խորհրդարանում ընդդիմադիրներից ամենաընդդիմադիրը իշխանական Անդրանիկ Քոչարյանն էր