Բա այդպես շուստրի քանի՞ քույր ու եղբայր եք. ԶԱՐՄԱՆՔ

Իր ասուլիսում ուշագրավ հայտարարությամբ է հանդես եկել Մայր Աթոռի դիվանապետ Տ. ԱՐՇԱԿ արքեպիսկոպոս ԽԱՉԱՏՐՅԱՆԸ: Հանրային դաշտ նետված իրեն վերագրվող ինտիմ տեսանյութի առնչությամբ՝ բավական օբյեկտիվ հակափաստարկներ ներկայացնելուն զուգահեռ՝ նա հանկարծ նշեց. «Հիմա, ըստ էության, առաջարկվել է որ ես իմ ծառայությունը դադարեցնեմ, իրավական լեզվով ասած, խափանման միջոց կիրառվի։ Խափանման միջոցի նպատակը հետեւյալն է. առաջին, որպեսզի ես հնարավորություն չունենամ ազդելու հանձնաժողովի օբյեկտիվ քննության վրա, որի հնարավորությունը ես չունեմ, կամ համենայնդեպս այդ հնարավորությունը չի նվազելու իմ պաշտոնաթողությունից հետո, որովհետեւ ես այսպես, կամ այնպես հանձնաժողովի անդամների հետ հարաբերություններ ունեմ։ Ինձ մեղադրում են կուսակրոնության ուխտը խախտելու, կենակցելու մեջ եւ այլն: Հիմա եթե իմ պաշտոնավորությունը դադարեցնում եք, զավեշտական է, ես ավելի մեծ հնարավորություն եմ ունենում այդ նույն մեղքը գործելու: Նպատակը ո՞րն է: Պարզ է՝ քարոզչական»։ Ամեն ինչ հասկացանք, բայց «ես ավելի մեծ հնարավորություն եմ ունենում այդ նույն մեղքը գործելու» հայտարարությունը, համաձայնեք, որ բավական տարակուսելի ու խնդրահարույց է: Ավելին՝ հեչ զավեշտալի չէ: Հիմա մեղք գործե՞լ է, որ նույն մեղքը կարող է կրկնել: Համաձայնեք, որ խառը ժամանակներ են:

Տարօրինակ հայտարարություններով է հանդես գալիս նաեւ «Միասնության թեւեր» քաղաքական նախաձեռնության ղեկավար, նախկին ՄԻՊ ԱՐՄԱՆ ԹԱԹՈՅԱՆԸ: Նա գցել-բռնել է ու եկել հետեւյալ եզրահանգման. «Եթե նախկին նախագահներն ուզում են, որ Փաշինյանը հեռանա, ընտրություններին չպետք է մասնակցեն»: Այստեղ են ասել՝ բա այդպես շուստրի քանի՞ քույր ու եղբայր եք: Նախ սկսենք նրանից, որ նախկին երեք նախագահների թիմերից որ մեկն էլ մասնակցի ընտրություններին, հաստատ անցողիկ շեմը հաղթահարող է: Այսինքն՝ միանշանակ նրանցից որեւէ մեկը ձայներ փոշիացնող չէ՝ ի տարբերություն արմանթաթոյանանման քաղաքական ուժերի, որոնք ընտրություններից առաջ հայտնվում են, իսկ հետո անհետանում՝ իրենց զրոյական վարկանիշով: Հետեւապես, գուցե հենց Արման Թաթոյանի՞ն է պետք հորդորել, որ քիթը չմտցնի ընտրությունների մեջ ու իշխանության ջրաղացին ջուր չլցնի:

Քաղակտիվիստ ՀՈՎՀԱՆՆԵՍ ԻՇԽԱՆՅԱՆԻՆ էլ քիչ էր մնում հանրությունը հերոս հռչակեր՝ Սուրբ Սարգիս եկեղեցում Վեհափառ Հայրապետի անունը Պատարագի ժամանակ չհիշատակելու դեմ աղմկելու համար, բայց չստացվեց: Սոցցանցներում սկսեցին հիշել, որ Իշխանյանը նախկին իշխանությունների օրոք ոչ թե ազգային գաղափարներով տոգորված տղա էր, այլ համասեռամոլների պաշտպան, ավելին՝ տրանսգենդերի մասին ֆիլմ էր նկարահանում: Եվ բավական է այս թեման կրկին հիշեցնեին, որ Իշխանյանը վերստին հանդես գար ԼԳԲՏ-ականների պաշտպանությամբ: «Իմ էջում ձեզ կոռեկտ պահեք, էլ չտեսնեմ մտնեք նույնասեռականներին վիրավորեք։ Հազար ասեցի՝ համասեռամոլ չի, նույնասեռական ա։ Համասեռամոլը վիրավորական բառ ա, ոնց որ ասենք՝ նիկոլականը: Ու 5000 հոգուց այն նույնասեռականների սպանության համար էլ եք պատասխան տալու, որոնց խաբելով, սպանեցիք, որ Արցախը հանձնեք», - գրել է նա: Ախր, էլ ինչպես բացատրես, որ չի լինում այդպես, չես կարող ե՛ւ եկեղեցի պաշտպանել, ե՛ւ ԼԳԲՏ-ականների:

ԶԱՐՄԱՑԱԾ Է «ԻՐԱՎՈՒՆՔ»-Ը

Այս թեմայով Իրանը Ռուսաստան է արտահանել «Արման» միջին հեռահարության ՀՕՊ համակարգ Իշխանությունը սպառնում է ժողովրդին, որ եթե չկատարեն Ալիեւի հրահանգը, իրենք կջղայնանան․ Աբովյան Արման Սարոյանը դեռ Մասյացոտնի առաջնորդարանում է, ապօրինի զավթել է, որքան ձգեց, ավելին կպահանջենք Արշակ Կարապետյանին հրավիրել են դատախազություն Ինչո՞ւ է ընդհատվել «Գայանե» բալետի ներկայացումը․ հանդիսատեսը վրդովված է