«Ժողովուրդ». Հայկ Կոնջորյանի` շքեղ առանձնատան աղմկահարույց պատմությունը նոր զարգացում ունի

Մամուլի տեսություն 24 Դեկտեմբեր, 2025 8:15

«Ժողովուրդ» օրաթերթը գրում է. ««Ժողովուրդ» օրաթերթի աղբյուրները փոխանցում են, որ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանի կողմից շքեղ առանձնատան գնման աղմկահարույց պատմությունը նոր զարգացում ունի: Մեր տեղեկություններով՝ ՀՀ հակակոռուպցիոն կոմիտեում Կոնջորյանի գործարքը ստուգման է ենթարկվում, քննարկվում է՝ առկա՞ են արդյոք կոռուպցիոն բնույթի գործողությունների հատկանիշներ, թե՞ ոչ։

Հիշեցնենք, որ հետաքննող լրագրողները հրապարակել են տվյալներ, որոնց համաձայն՝ Կոնջորյանը և կինը 2024 թվականի հուլիսին Առինջում ձեռք են բերել առանձնատուն, որը հայտարարագրում ներկայացվել է 54 մլն դրամով՝ հիպոթեքային վարկով (նշվում է նաև՝ վարկը տրամադրել է «Հայէկոնոմբանկ»-ը)։ «Հետք»-ը հաշվարկ է ներկայացրել, որ նույն կառուցապատողի հայտարարած գներով նման գույքի արժեքը կարող է ստացվել շուրջ 75.6 մլն դրամ, այսինքն՝ տարբերությունը կազմի մոտ 21.6 մլն դրամ։

Նույն հրապարակման մեջ նշվում է նաև, որ 54 մլն դրամը պատահական թիվ չէ, քանի որ եկամտահարկի վերադարձի գործող մեխանիզմով (հիպոթեքի մասով) գործարքի պայմանագրային արժեքի համար առկա է 55 մլն դրամ շեմ՝ հարկային արտոնությունից օգտվելու համար։ Այսինքն , ստացվում է, հարմարացրել են տան գինը այնպես, որ եկամտահարկի վերադարձ լինի շքեղ առանձնատան համար և Կոնջորյանն էժանով դառնա դղյակի տեր:

Իհարկե, Կոնջորյանը հրապարակումից հետո հերքել է որևէ «զեղչ» ստանալու փաստը, սակայն «Ժողովուրդ»-ի աղբյուրների փոխանցմամբ՝ հակակոռուպցիոն մարմնում այժմ փորձում են հասկանալ՝ գործարքում եղել են գնի մանիպուլյացիայի ու հնարավոր արտոնությունից օգտվելու կասկածելի տարրե՞ր, թե՞ խոսքը սովորական շուկայական գործարքի մասին է։

Մնում է սպասել՝ հասկանալու թե արդյոք հակակոռուպցիոն կոմիտեն կհամարձակվի ամբողջ ծավալով բացահայտել ՔՊ ղեկավարին առնչվող իրականությունը, թե թեման կդառնա օդում թողած պղպջակ: Հակակոռուպցիոն կոմիտեն այս պահին պարտավոր է (եթե իսկապես ստուգում է ընթանում) ոչ թե լռությամբ «սառեցնել» թեման, այլ հրապարակային ներկայացնել՝ ի՞նչ է ստուգվում, ի՞նչ փաստաթղթեր են պահանջվել, և ինչ ժամկետում սպասել արդյունքի։ Հակառակ դեպքում ստացվում է պարզ բանաձև՝ երբ մեղադրյալը իշխանական է, հակակոռուպցիան վերածվում է քաղաքական լվացքատան․ մի քիչ աղմուկ, մի քիչ «ստուգում» և վերջում՝ ոչ մի պատասխանատվություն։

«Ժողովուրդ»-ը կհետևի ստուգումների ընթացքին ու արդյունքներին։

Հիշեցնենք, որ 2024 թվականի նոյեմբերից Հայկ Կոնջորյանի կինը դարձել է «Հայփոստ»-ի տնօրեն, ինչը անհնար էր պատկերացնել՝ Կոնջորյանի ՔՊ խմբակցության ղեկավար չլինելու դեպքում, եւ այժմ նա ստանում է ամսական մի քանի մլն դրամ աշխատավարձ: Թերևս մի ստուգում էլ անհրաժեշտ կլինի՝ պարզելու թե ինչպես հենց Կոնջորյանի կինը հաղթեց տնօրենի մրցույթում»։

Առավել մանրամասն թերթի այսօրվա համարում

Տես նաեւ https://x.com/Iravunk_com

Այս թեմայով

Բաբուխանյանը բարձրացրեց Արցախի օկուպացված քաղաքների հարցը

«Ժողովուրդ». Լենա Նանուշյանի նոր ձախողումների շարքը

«Ժողովուրդ». Այսօր կորոշեն Հայկ Սարգսյանի ճակատագիրը

Պատմությունը հզոր ուսուցիչ է, բայց դասեր քաղել դրանից մենք այդպես էլ չսովորեցինք

Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը