Խաբել են մեզ եւ ժողովրդին եւ խաբել են սրիկայի պես. Մարգարիտ Եսայան

«Բարի գալուստ 2026,

 

Մի ֆիլմ կա, որ սիրում եմ՝ «Կյանքը հիասքանչ է» ( «La vita è bella»), իտալական տրագիկոմեդիա, սցենարի հեղինակը, ռեժիսորը և գլխավոր դերակատարը Ռոբերտո Բենինին է։

 

Երկրորդ համաշխարհային պատերազմի ժամանակ Իտալիայում համակենտրոնացման ճամբար են ուղարկում հրեաներին։ Ֆիլմի հերոսին որդու և կնոջ հետ նույնպես ուղարկում են այնտեղ։ Ճամբարում հայրը որդուն ասում է, թե այն, ինչ կատարվում է այնտեղ, խաղ է, որի հաղթողին տանկ են նվիրելու։ Տանկը կստանա այն մասնակիցը, ով լավ կթաքնվի «գոռացող» մարդկանցից։ Ֆիլմի հերոսը ամեն ինչ անում է, որպեսզի որդին հավատա այդ ամենին,չվախենա և ողջ մնա։

 

Մի քանի ժամից, երբ մենք հրաժեշտ կտանք 2025-ին եւ կդիմավորենք 2026-ը, մեզ ոչ ոք «տանկ» չի նվիրի,որովհետեւ կյանքը մեզ համար խաղ չէ։

 

Մեզնից շատերը չեն թաքնվի «գոռացող մարդկանցից»։ Ոմանք կշարունակեն պայքարը, բողոքը, արդարության, հայրենիքի, քաղբանտարկյալների ազատության, Բաքվի բանտում գտնվող հայ գերիների վերադարձի, հանուն արժանապատիվ կյանքի, հայկականության եւ պետության պահպանման, ի պաշտպանություն Հայ առաքելական եկեղեցու։

 

Փորձենք հավատալ, որ անցնող 8 տարիներին մենք մեզ եւ մեր ժողովրդին չենք խաբել, իբր կյանքը հիասքանչ է։ Խաբել են մեզ եւ ժողովրդին եւ խաբել են սրիկայի պես։

 

Շնորհավորում եմ իմ պայքարի ընկերներ, ինձ հավատացողներ, իմ արցախցիներ, բանտարկված Սրբազան Հայրեր։

 

Եկեք էս անգամ ինքներս մեզ խաբենք մտածենք, որ նոր տարին կցրի հուսահատությունը, կցրի մշուշը եւ կկատարվի մեր ժողովրդի երազանքը։ Եկեք փորձենք տեսնել իրական Հայաստանը, այն ինչ դեռ մնացել է նրանից եւ ինչը չի լինելու , եթե շարունակենք ինքներս մեզ եւ ուրիշներին խաբել։

 

Հ.Գ.- «Կյանքը հիասքանչ է» նախադասության մեջ կարծում եմ բանալի բառը ԿՅԱՆՔՆ է։ Ապրենք եւ շնորհակալ լինենք այդ կյանքի համար։

Մնացածը՝ կորոշի Արարիչը», - գրել է ՀՀԿ ԳՄ անդամ ՄԱՐԳԱՐԻՏ ԵՍԱՅԱՆԸ։