ՔՊ-ն էլ, եթե փող տար եւ այս մարդուն վարձեր՝ կգար ու կհամագործակցեր․ Ով է իրականում Զվիկա Խայմովիչը․ Բացառիկ մանրամասներ է ներկայացնում իսրաելահայ մեր գործընկերը

Ինչո՞վ է Իսրայելում հայտնի Սամվել Կարապետյանի թիմին միացած իսրայելցի պաշտոնաթող գեներալ Զվիկա Խայմովիչը, «Իրավունքը» փորձել է հետաքրքրվել իսրայելահայերի «Նաիրի» միության նախագահ Արտյոմ Չերնամորյանից, ով նախ նկատեց․

-Իսրայելում դա սովորական բան է, ցանկացած թոշակի անցած զինվորական իր ֆիննանսական վիճակը բարելավվելու համար կարող է ցանկացած տեղ աշխատել, ներգրավվել ինչպես մասնավոր ոլորտում, այնպես էլ կարող են մասնակցել տարբեր երկրներում տարատեսակ գործընթացների՝ այդ թվում աշխատել որպես խորհրդական։ Մարդը թոշակառու գեներալ է, ստացել է առաջարկ՝ ընդունել է եւ սկսել համագործակցել։ Անկեղծ ասած իրականում հետեւում եմ Հայաստանում առկա իրարանցմանը գեներալի հետ կապված եւ ծիծաղում։ Մեկը ասում է իսրայելցի գեներալը օգնել է 44-օրյա պատերազմում ադրբեջանցիներին, մյուսը՝ մեկ այլ սուտ է հորինում, այն ինչ իրականում նման բան չկա։  Զվիկա Խայմովիչի դեպքում էլ որեւէ արտառոց բան չկա՝ փողը տվել են մարդը եկել է մասնավոր կարգով խորհուրդներ տալու։ Հիմա նույն հաջողությամբ ՔՊ-ն էլ, եթե փող տար եւ այս մարդուն վարձեր, նա նորից կգար ու կհամագործակցեր։

Ինչ վերաբերում է նրա զինվորական գործունեությանը Իսրայելում, ապա նա որեւէ կերպ աչքի չի ընկել, սովորական հրամանատար էր՝ ոչ Իսրայելի հերոս է, ոչ էլ պատերազմում է ինչ-որ կարկառուն գործողությամբ է աչքի ընկել։ Ուղղակի ՀՀ-ում սիրում են ամեն բանից շոու սարքել, ՔՊ ջան դու էլ փող տուր, մեկ այլ իսրայելցի մասնագետ վարձի թող գա քո համար աշխատի, ինչ կա էդտեղ արտասովոր, որն՞ է պրոբելեմը։ Ինչ իմաստ ունի ազգային խտրականություն սերմանել․․․

-Պարոն Չերնամորյան, իրականում իմ հարցը բացառապես վերաբերում է տվյալ գեներալի անցած ուղղուն, այստեղ նա ներկայացվում է, որպես բացառիկ զինվորական։

-Ես այդ մասով ոչինչ չեմ կարող ասել, գեներալի՝ Ձեր ասած բացառիկ հմտություններին ծանոթ չեմ, չեմ էլ ուզում իսրայելահայերին խառնեք այս թեմայի մեջ։ Սովորական մարդ է, թոշակառու, ով իրավունք ունի աշխատել որտեղ ուզում է եւ որտեղ ցանկանում է։ Թոշակառու մարդ է, ուզում է փող աշխատել, ինչ պրոբլեմ կա։