Այս ամենը հետևանք է համակարգային կառավարման բացակայության, պետական կառավարումն անլրջացնելը հասել է չգիտեմ որ աստիճանի. Հեղուկ գազի դեֆիցիտի հետքերով

Հայաստանում վերջին օրերին հեղուկ գազի դեֆիցիտ է և գների կտրուկ աճ։  Տնտեսագետ Սուրեն Պարսյանի խոսքով՝ խնդիրը պայմանավորված է ինչպես արտաքին, այնպես էլ ներքին գործոններով.

- Հայաստանը հեղուկ գազ ներկրող երկիր է, հիմնականում ներկրում ենք Ռուսաստանի Դաշնությունից և մասամբ նաև՝ Իրանից ու Իրաքից։ Վերջին իրադարձություններով պայմանավորված՝ գրեթե դադարեցրել ենք կամ խիստ սահմանափակել ենք Իրանից, Իրաքից հեղուկ գազի ներկրումը և հիմնական, մեծ կախվածություն ունենք արդեն Ռուսաստանից ներկրումների այդ շղթայից։ Սա, անշուշտ, հիմնական պատճառն է Հայաստանի հեղուկ գազի դեֆիցիտի և կտրուկ գների աճի մասով:
համաշխարհային շուկայում նավթի և գազի գների աճ է արձանագրվել։ Բացի այդ, խոշոր արտահանող երկրներից մեկը՝ Քաթարը, կրճատել կամ դադարեցրել է մատակարարումները, ինչն առաջացրել է դեֆիցիտ միջազգային շուկայում։ Արդյունքում՝ ռուսական ընկերությունները նախընտրում են իրենց արտադրանքը բարձր գներով վաճառել ասիական և այլ շուկաներում, քան՝ Հայաստանում: 

«Իրազեկ և պաշտպանված սպառող» ՀԿ նախագահ Բաբկեն Պիպոյանն էլ նկատում է.

-Այո, շաֆ լցակայաններում կտրոնով են վաճառում, ավելի շատ կտրոններ ունեն իրավաբանական անձինք, որոնք էլ ավելի մեծ ռեսուրսներ ունեն մեքենան սարքին պահելու համար, քան ֆիզիկական անձինք: 

Այսինքն՝ հասկանալի է, որ երբ հեղուկ գազով մեքենա ունեցող քաղաքացին, հնարավոր է, որ չկարողանա այդ մեքենան բենզինով շահագործել, որովհետև ինչ-ինչ մասեր փչացած են, իսկ դրանք վերանորոգելը այդ մարդու համար բեռ է, դրան հակառակ իրավաբանական անձինք ռեսուրս ունեն, կարող են իրենց մեքենան վերանորոգել: 

Այնպես որ, ռեսուրս ունեցողի համար ավելի լավ պայման է գազի շուկայում, քան՝ ռեսուրս չունեցողի, իսկ սա հետևանք է նրա, որ չկա կառավարում, քանի որ երբ պետք է ադրբեջանական ճանապարհի մասին շոու անել, անում են, բայց երբ իրականում մեկ անգամ այդ ճանապարհը կարող է իսկապես պետք լիներ, որևէ մեկը չհիշեց այդ մասին ու չասաց: 

Ես չեմ ուզում երկար տեսական բաներ թվարկել, որովհետև հնարավոր ելքերն ահավոր շատ են, ես չեմ կարող 42-էջանոց փաստաթուղթ պատմել, ներկայացնել: Ճգնաժամային կառավարման ռազմավարություն է պետք ունենալ՝ ո՛ր օրն ենք հանրությանը տեղեկացնում, որ հինգ օր խնդիր չունենք, նաև դրանով զսպենք գնաճը և այլն: Այս ամեն ինչը հետևանք է համակարգային կառավարման բացակայության, չկա համակարգային մոտեցում, պետական կառավարումն անլրջացնելը հասել է չգիտեմ որ աստիճանի: 

Հանրային իրազեկումն ինքնանպատակ չի լինում, դա բերում է նրան, որ խուճապ չի առաջանում, նաև ավելորդ վաճառք չի լինում, ու չորս օրվա պաշարը դառնում է չորս օրվա, ոչ թե խուճապի հետևանքով դառնում է երեք օրվա պաշար: Բայց դու պետք է իմանաս, որ իրականում քեզ մոտ չորրորդ օրը խնդիր չի լինելու, որովհետև, պայմանական, իրանականը մտնելու է շուկա, եթե դեֆիցիտ է լինելու ի՞նչ իրազեկես, իրազեկման աշխատանքները հանրության հետ արվում են միայն այն դեպքում, երբ մնացածների հետ է աշխատանք արվել, եթե չի արվել այդ աշխատանքը, ի՞նչն ես իրազեկում, իրազեկում ես, որ դու կա՞ս: 

Այս թեմայով «Փաստ». Գազի թանկացման ծանրագույն հետևանքները Եթե ՌԴ–ն որոշի գազը թանկացնել, այն երկակի վատ էֆեկտ կունենա տնտեսության վրա. ԿԲ նախագահ Ռուսաստանը շատ ավելի ազդեցիկ է, քան Ադրբեջանն ու Թուրքիան, հետևաբար Ռուսաստանի հետ ևս պետք է զգույշ լինել Ունի Հայաստանը գազի այլընտարանք. Մեկնաբանում է տնտեսագետը Փաշինյանը՝ գազի գնի մասին