«ԱՄԵՆ ՎԱՅՐԿՅԱՆ ԶԳՈՒՄ ԵՄ ԵԶԴԻ ԵՎ ՀԱՅ ԱԶԳԻ ԱՋԱԿՑՈՒԹՅՈՒՆԸ». ՀՈՒՆԱՀՌՈՄԵԱԿԱՆ ՈՃԻ ԱՆՎԱՆԻ ԸՄԲԻՇ ԵՎՐՈՊԱՅԻ ՀՆԳԱԿԻ ՉԵՄՊԻՈՆ, ԱՇԽԱՐՀԻ ԿՐԿՆԱԿԻ ՉԵՄՊԻՈՆ ՄԱԼԽԱՍ ԱՄՈՅԱՆ

Վերջերս Ալբանիայի մայրաքաղաք Տիրանայում կայացած հունահռոմեական ոճի ըմբշամարտի Եվրոպայի առաջնությանը հաջող հանդես եկավ Հայաստանի հավաքականը, գրանցելով աննախադեպ արդյունք։ Առաջին անգամ Եվրոպայի առաջնությունում հունահռոմեականները նվաճեցին 5 մեդալ։ Ոսկե մեդալի արժանացավ Մալխաս Ամոյանը 77 կգ ։Արծաթե մեդալ նվաճեց Սուրեն Աղաջանյանը 60 կգ ու բրոնզե մեդալ Կարեն Ասլանյանը 63 կգ, Սլավիկ Գալստյանը 67 կգ և Գասպար Տերտերյանը 72 կգ։ Թիմային պայքարում մեր հավաքականը 4-րդն էր։ Ոսկե մեդալակիր, Փարիզի ՕԽ բրոնզե մեդալակիր, Աշխարհի կրկնակի չեմպիոն ՄԱԼԽԱՍ ԱՄՈՅԱՆԸ 5-րդ անգամ հռչակվեց Եվրոպայի չեմպիոն։ Iravunk. com -ի մարզական լրագրողը զրուցել է Մալխասի հետ։

- Շնորհավորում ենք նախ 2025 թվականի լավագույն մարզիկ ճանաչվելու և Եվրոպայի արդեն հնգակի չեմպիոն հռչակվելու առթիվ։ 5-րդ տարին անընդմեջ Եվրոպայում անգերազանցելի ես։ Հետաքրքիր է, ինչպե՞ս տրվեց այս հաղթանակը քեզ։

- Շատ շնորհակալ եմ։ Անչափ ուրախ եմ, որ ինձ հաջողվեց 5-րդ անգամ նվաճել այս տիտղոսը։ Իսկապես դժվար տրված հաղթանակ էր սա։ Ամեն տարի էլ ավելի բարդ է տրվում, հաղթելու պատասխանատվությունն ավելի է մեծանում, սակայն ուրախ եմ, որ կարողացա ուժերս հավաքել, կենտրոնանալ ու չեմպիոնի կոչումով ավարտել Եվրոպայի այս առաջնությունը։

- Մալխաս, մինչև եզրափակիչ հասնելը երեք տպավորիչ հաղթանակ տոնեցիր, սակայն եզրափակիչը, կարծես, լարված ստացվեց։ Զոիձեի հետ գոտեմարտը ինչով տարբերվեց, նրա հետ շատ գոտեմարտեր էիր անցկացրել։

- Ճիշտն ասած, կուզենայի ավելի լավ գոտեմարտ անցկացնել եզրափակչում։ Ինձ դուր չեկավ այն գոտեմարտը, որն անցկացրի, սակայն այդ պահին ինձ միայն հաղթանակ էր հարկավոր։ Կարևոր խնդիրն այն էր, որ գորգից միայն հաղթանակով դուրս գայի։ Զոիձեի հետ բազմիցս հանդիպել էինք մրցագորգում, իրար լավ ճանաչում էինք։ Նա տեխնիկապես հարուստ ու վտանգավոր ըմբշամարտիկ է, հենց այդ պատճառով էլ փորձում էի նրա հետ մի փոքր զգույշ գոտեմարտել, որպեսզի սխալ թույլ չտայի։

- Տեղյակ եմ, որ այս ԵԱ-ից առաջ ունեցել ես առողջական խնդիր։ Հետաքրքիր է, թե ինչպես կարողացար կենտրոնանալ, հավաքվել ու մտնել պայքարի մեջ։

- Այո, այս ԵԱ-ից առաջ իրոք հիվանդացել էի տևական ժամանակ, սակայն ամեն ինչ արեցի, որ հանկարծ ինձ չխանգարի։ Աստծո հանդեպ հավատս, իմ անցած ուղու նկատմամբ հավատս ինձ ուժ տվեց այս հաղթանակի համար։ Մրցագորգում ես ամեն վայրկյան զգում եմ եզդի և հայ ազգի աջակցությունը։

- Շնորհակալություն, Մալխաս, մեզ ժամանակ տրամադրելու համար, սպասենք արդեն հաջորդ հաղթանակիդ Աշխարհի առաջնությանը ։

-Շատ զգացված եմ, կաշխատեմ արդարացնել Ձեր հույսերը, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով 12.92 միլիարդ դրամ՝ սպորտին․ 2027-ին ինչպե՞ս է ծախսվելու պետական փողը Հայաստանի հավաքականը ծանր կորուստ ունի Ազգերի լիգայի վճռորոշ խաղերից առաջ Ըմբշամարտի ԱԱ. Նարեկ Հարությունյանն ու Հրայր Ալիխանյանը պարտվեցին մեկնարկում ԱԱ. Արսեն Հարությունյանը մեկնարկեց վստահ հաղթանակով՝ 10:0 Հայ բռնցքամարտիկները Թուրքիայից կվերադառնան երկու մեդալով