«ՄԵՐ ՀԱՎԱՔԱԿԱՆԸ ԳՐԱՎԵՑ ԵՐՐՈՐԴ ՀՈՐԻԶՈՆԱԿԱՆԸ, ՍԱ ԱՆՆԱԽԱԴԵՊ Է». ԱԶԱՏ ՈՃԻ ԸՄԲՇԱՄԱՐՏԻ ԵՎՐՈՊԱՅԻ ՄԵԾԱՀԱՍԱԿՆԵՐԻ ԿՐԿՆԱԿԻ ԲՐՈՆԶԵ ՄԵԴԱԼԱԿԻՐ ՄԱՆՎԵԼ ԽՆՁՐՑՅԱՆ

 Ալբանիայի մայրաքաղաք Տիրանայում կայացած ազատ ոճի ըմբշամարտի մեծահասակների Եվրոպայի առաջնությանը բրոնզե մեդալ է նվաճել Եվրոպայի մեծահասակների արդեն կրկնակի բրոնզե մեդալակիր, ծնունդով Շիրակի մարզի Ազատան գյուղից ՄԱՆՎԵԼ ԽՆՁՐՑՅԱՆԸ։ Iravunk. com -ի մարզական լրագրողի հետ զրույցում նա այսպես մեկնաբանեց իր նվաճումը. - Հանդես եկա 57 կգ քաշային կարգում։ Մեկնարկում 12։6 հաշվով հաղթեցի գերմանացի մրցակցիս, ապա 12։1 հաշվով ռումինացի ըմբիշին, հետո 5։0 հաշվով զիջեցի ռուս մարզիկին, բրոնզե մեդալի համար պայքարում հաղթեցի Սերբիայի ներկայացուցիչ, ազգությամբ ռուս մրցակցիս 16։6 հաշվով։ Մրցաշարի ժամանակ զգացել եմ և ափսոսանք և հիասթափություն և դրական էմոցիաներ։ Շնորհակալ եմ Վազգեն Թևանյանին ինձ աջակցելու համար, հոգեբանական տրամադրվածությունը շատ էր։ Ինչպես ցանկացած մրցաշար, այստեղ էլ կային դժվարություններ։ Վերջին երկու տարում ինձ չէր հաջողվում նվաճել մեդալ, և այս մեդալի համար ես գոհ եմ։ Բայց այդքան էլ գոհ չեմ, որ իմ մարզական կարիերայի ընթացքում դեռ հաղթող չեմ դարձել, ոսկե մեդալ չեմ նվաճել, թեև դա չի նշանակում, որ բավարարվել եմ։ Ասեմ, որ մրցակցության ժամանակ չկար դժվարություն, դժվարը նախքան մրցումային օրն էր։ Տեխնիկական սխալներ եղան թե հաղթած, թե պարտված գոտեմարտերում, ինչպես նաև հոգեբանական սխալներ եղան իմ մասով։ Բրոնզե մեդալի գոտեմարտից առաջ էմոցիոնալ առումով շատ խառը օր էր, կիսաեզրափակչում վնասվածք ստացա, որը բավականին լուրջ էր։ Շատ ուրախալի է, որ մեր ազատ ոճի հավաքականը գրավեց երրորդ հորիզոնականը, սա աննախադեպ էր։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ