Գեներալ-մայոր Աստվածատուր Պետրոսյանի որդին հրատապ հայտարարությամբ է հանդես եկել

Գեներալ-մայոր Աստվածատուր Պետրոսյանի որդին՝ Սիփան Պետրոսյանը, հրատապ հայտարարությամբ է հանդես եկել.

Քաղաքականությունից դուրս՝ հավատարիմ Աստվածատուր Պետրոսյանի սկզբունքներին

«Արծիվ» մահապարտների հատուկ նշանակության գումարտակը ստեղծվել է 1992 թվականի օգոստոսի 16-ին՝ Վազգեն Սարգսյանի կոչով և նախաձեռնությամբ։ Գումարտակի ընդհանուր հրամանատարը եղել է Աստվածատուր Պետրոսյանը, հրամանատարը՝ Հովսեփ Հովսեփյանը, իսկ հրամանատարի տեղակալը՝ Սեյրան Անթանեսյանը։

Գեներալ-մայոր Աստվածատուր Պետրոսյանը Հայաստանի բանակաշինության ակունքներում կանգնած գործիչներից էր։ 1993 թվականից նա զբաղեցրել է Հայաստանի Հանրապետության պաշտպանության նախարարի առաջին տեղակալի պաշտոնը։ Նա «Մարտական խաչ» առաջին աստիճանի շքանշանակիր էր, երկար տարիներ ծառայել է հայրենիքին և իր անուրանալի ներդրումն է ունեցել հայկական բանակի կայացման, ամրապնդման և զարգացման գործում։

Վազգեն Սարգսյանի մահից հետո  Աստվածատուր Պետրոսյանը զբաղեցրել է «Արծիվ» մահապարտների միության նախագահի պաշտոնը՝ շարունակելով ծառայել այն արժեքներին ու գաղափարներին, որոնց հիման վրա ստեղծվել էր միությունը։

Ինչպես Վազգեն Սարգսյանն էր ասում՝ զինվորականը պետք է հեռու մնա քաղաքականությունից։ Այդ նույն սկզբունքներին հավատարիմ էր նաև հայրս՝ Գեներալ-մայոր Աստվածատուր Պետրոսյանը։ Լինելով բարձր պաշտոններ զբաղեցրած զինվորական, մեծ հեղինակություն վայելող հրամանատար և պետական գործիչ՝ նա երբեք չներգրավվեց որևէ քաղաքական ուժի կամ քաղաքական գործընթացի մեջ։ Չնայած իր անցած ճանապարհին, հեղինակությանը և ունեցած հնարավորություններին՝ նա մնաց հավատարիմ զինվորականի իր կոչմանը, իր երդմանը և իր սկզբունքներին։

Այսօր տեսնում եմ, որ տարբեր ազատամարտիկներ, ինչպես նաև «Արծիվ» մահապարտների միության որոշ ներկայացուցիչներ ներգրավված են քաղաքական գործընթացներում և աջակցում են տարբեր քաղաքական ուժերի։ Դա յուրաքանչյուր մարդու անձնական իրավունքն ու ընտրությունն է, և ես չեմ պատրաստվում գնահատական տալ որևէ մեկի քաղաքական հայացքներին։

Սակայն որպես Գեներալ-մայոր Աստվածատուր Պետրոսյանի որդի՝ պարտք եմ համարում հստակ հայտարարել, որ Գեներալ-մայոր Աստվածատուր Պետրոսյանի ընտանիքը երբեք չի եղել և այսօր էլ որևէ քաղաքական ուժի հետ կապ չունի։ Մենք չենք մասնակցում քաղաքական պայքարի, քաղաքական քարոզչության կամ որևէ քաղաքական գործընթացի և չենք սատարում որևէ քաղաքական ուժի։

Հետևաբար, եթե այսօր կամ ապագայում տեսնեք, որ «Արծիվ» մահապարտների միության որևէ անդամ, ներկայացուցիչ կամ նույնիսկ միության ներկայիս նախագահը ներգրավված է քաղաքական գործունեության մեջ կամ աջակցում է որևէ քաղաքական ուժի, խնդրում եմ դա չկապել Գեներալ-մայոր Աստվածատուր Պետրոսյանի անվան, նրա սկզբունքների, նրա գաղափարների կամ նրա ընտանիքի հետ։

Մենք հավատարիմ ենք մնացել և կմնանք այն արժեքներին, որոնցով ապրել, ծառայել և առաջնորդվել է Գեներալ-մայոր Աստվածատուր Պետրոսյանը։

Սա մեր ընտանիքի հստակ, արժանապատիվ և անփոփոխ դիրքորոշումն է։

Այս թեմայով Հաշմանդամություն ունե՞ք. 30 տարեկանում կենսաթոշակի համար բավական է 5 տարվա աշխատանքային ստաժ, կենսաթոշակը՝ առնվազն 46 000 դրամ Ֆրանսիայում կրկին զանգվածային ցույցեր են՝ ոստիկանության հետ բախումներով հանդերձ Ամերիկյան ուժերը խոցել են Օմանի ծոցում գտնվող նավի վրա՝ «իրանական ծովային շրջափակումը խախտելու» համար (Տեսանյութ) Ռուսաստանը ուժեղացնում է Ուկրաինայի հետ իր բանակցային թիմը. Bloomberg Նոյեմբերի կեսերին երկու կենդանակերպի նշանների համար մեծ փոփոխություններ են սպասվում. ամեն ինչ այլևս երբեք նույնը չի լինի