«Ժողովուրդ». Դանիել Իոաննիսյանն ու «Անկախ դիտորդը»՝ ընդդեմ Աննա Հակոբյանի

«Ժողովուրդ» օրաթերթը գրում է. ««Դատարանում սկսվում է վարչապետ Նիկոլ Փաշինյանի կնոջ՝ Աննա Հակոբյանի, և «Անկախ դիտորդ» դաշինքի ներկայացուցիչ Դանիել Իոաննիսյանի միջև իրավական վեճի քննությունը։

«Իրազեկ քաղաքացիների միավորման» համակարգող, «Անկախ դիտորդ» դաշինքի ներկայացուցիչ Դանիել Իոաննիսյանը և իր ներկայացրած դաշինքը դիմել են ՀՀ վարչական դատարան՝ պահանջելով «Իմ քայլը» բարեգործական հիմնադրամի գործադիր տնօրեն Աննա Հակոբյանին 15 տարբեր դրվագներով ենթարկել վարչական պատասխանատվության։ «Անկախ դիտորդ»-ը հայտարարել էր, որ հիմնադրամի գործունեության ընթացքում հայտնաբերել է ենթադրյալ օրենսդրական խախտումներ։

Հունիսի 11-ին հայտնի դարձավ, որ «Հելսինկյան քաղաքացիական ասամբլեայի Վանաձորի գրասենյակ» հասարակական կազմակերպության, «Իրազեկ քաղաքացիների միավորում» խորհրդատվական հասարակական կազմակերպության և «Ուղղակի ժողովրդավարություն» ժողովրդական ինստիտուտների ամրապնդման հասարակական կազմակերպության ներկայացուցիչ Անահիտ Մկրտչյանը 2026 թվականի հունիսի 2-ին վարչական դատարան է ներկայացրել հայցադիմում։

Հայցադիմումով պահանջվում է «Իմ քայլը» բարեգործական հիմնադրամի գործադիր տնօրեն Աննա Հակոբյանին վարչական պատասխանատվության ենթարկել ՀՀ վարչական իրավախախտումների վերաբերյալ օրենսգրքի 40.16-րդ հոդվածի 1-ին մասով նախատեսված արարքի համար։ Խոսքը վերաբերում է 2026 թվականի մարտի 29-ին արձանագրված դրվագին, երբ հիմնադրամը մարտի 20-ին 29 շահառու նորաստեղծ ընտանիքների տրամադրել է 1-ից 2 միլիոն դրամի չափով դրամաշնորհներ՝ սեփական բիզնես հիմնելու կամ զարգացնելու նպատակով։ Հայցվոր կողմը պահանջում է Աննա Հակոբյանին տուգանել նվազագույն աշխատավարձի 400-ապատիկի չափով։

ՀՀ վարչական դատարանի դատավոր Աղասի Դարբինյանը որոշել է ընդունել վարույթ նշված հասարակական կազմակերպությունների կողմից ներկայացված հայցադիմումը՝ ընդդեմ Աննա Հակոբյանի՝ վարչական պատասխանատվության ենթարկելու պահանջի վերաբերյալ։

Նախնական դատական նիստը նշանակվել է 2026 թվականի նոյեմբերի 2-ին՝ ժամը 12:50-ին, ՀՀ վարչական դատարանի Երևանի նստավայրում»։

Առավել մանրամասն թերթի այսօրվա համարում

Այս թեմայով Ինչպես քոչարյանականները խաբեցին ընտրազանգվածին ⚡️⚡️«Իրավունք» թերթի այսօրվա տպագիր համարում կարդացե՛ք... Աննա Հակոբյանի օրենքի նախագիծը 4 կողմ ձայներով ընդգրկվեց ԱԺ լիագումար նիստի օրակարգ Աննա Վարդապետյանը Վրաստանում է․ քննարկվել են իրավական փոխօգնության հարցեր Դադարեցրե՛ք այդ կնոջը փողոցային ձևով դատելը. Հայտնի իրավապաշտպանը հայտարարությամբ է հանդես եկել