Արցախի հարցը միայն անվան շուրջ լեզվական վեճի վերածելը քաղաքական պայքար չէ․ Արայան

Եթե իսկապես խոսում եք Արցախի իրավունքների, վերադարձի, ժողովրդի ինքնորոշման, միջազգային իրավունքի և Հայաստանի պետական շահերի մասին, ապա ներկայացրեք կոնկրետ քաղաքական, իրավական և օրենսդրական պահանջներ։ Օգտվեք այն գործիքներից, որոնք տալիս է խորհրդարանական համակարգը։ Պատրաստեք հիմնավորված նախաձեռնություններ, իրավական փաստաթղթեր, միջազգային հարթակների համար պահանջներ և հետևողականորեն առաջ տարեք դրանք։ Որովհետև քաղաքականությունը ոչ թե սեղանին ուժեղ հարվածելու, այլ պահանջ ձևակերպելու, այն իրավականորեն հիմնավորելու և մինչև վերջ հետևողականորեն առաջ տանելու արվեստն է։

 

Գուցե ժամանակն է պարզապես ազնվորեն խոստովանել, որ այս հարցում ձեզ պակասում են քաղաքական գիտելիքը, մասնագիտական պատրաստվածությունը, համարձակությունն ու համառությունը։ Եթե ցանկանում եք, կարող եմ օգնել։ Ամեն ինչ կարելի է սովորել։ Բայց նախ պետք է ցանկություն ունենալ՝ սովորելու և գործելու,- գրել է «Լույսի բանակ» ռազմահայրենասիրական կազմակերպության նախագահ ԿԱՐԵՆ ԱՐԱՅԱՆԸ։