ԵՊՀ պատմության ֆակուլտետում երբևէ սովորած ցանկացած համալսարանական կփաստի պարոն Մինասյանի կոռուպցիայից զերծ վարքի մասին

«ԵՊՀ Պատմության ֆակուլտետի բազմամյա դեկան, Հայոց պատմության ամբիոնի վարիչ Էդիկ Մինասյանին են տնային կալանք տվել՝ կոռուպցիայի գործով, առանձնապես խոշոր չափերի՝ 4000 դոլար։

 

Վերջերս էլ ԵՊՀ պրոռեկտորը պարոն Մինասյանին շնորհակալագիր հանձնեց՝ ընդգծելով կատարած ծավալուն աշխատանքն ու համալսարանական կյանքում մեծ ավանդը։ ԵՊՀ պատմության ֆակուլտետում երբևէ սովորած ցանկացած համալսարանական կփաստի պարոն Մինասյանի անգերազանցելի գիտական ու մանկավարժական որակների, կոռուպցիայից զերծ վարքի, անբասիր հեղինակության ու ապաքաղաքական կեցվածքի մասին։

 

Պարոն Մինասյանը մեր ֆակուլտետի Ալֆան ու Օմեգան է եղել ու կարծում եմ՝ այդպես կմնա մինչև ֆակուլտետի վերջնական էֆթանազիան։ Վստահ եմ՝ պարոն Մինասյանը դատարանում կապացուցի այդ հերյուրանքները, կպաշտպանի իր անաղարտ անունը, իսկ նրա գործընկերները կշարունակեն նրան մեդալներ ու պատվոգրեր տալ` բազմամյա անձեռակերտ գիտական ու մանկավարժական գործունեության համար։

 

Մանավանդ, որ այս ազգադավ ու ազգակործան իշխանությունները 2023թ գործը 2026թ են կյանքի կոչել, 3 տարի պահել են, որ պարոն Մինասյանի անբիծ անունը հենց հիմա գետնով տան, տեսնես ինչի՞, կարող ա գնալու ժամանակն ա եղել, պարոն Մինասյանն իրեն հայտնի խորաթափանցությամբ դիմադրել ա, իսկ այ հիմա՝ կհեռանա վաստակյալ ու վաստակած հանգստի՝ վայելելու կուտակած սերն ու հարգանքը։

 

Պարոն Մինասյանը նաև շարունակում է դպրոցական դասագրքեր գրել ու կրթել մատաղ սերնդին։ Հուսով եմ՝ դա էլ կշարունակվի», - գրել է հրապարակախոս, մեդիա փորձագետ ԳՈՌ ՄԱԴՈՅԱՆԸ։