Ո՞վ է թույլ տվել այս անհեթեթությունը․ ԶԱՐՄԱՆՔ

Զարմանալի, եթե չասենք՝ զարհուրելի դեպք է տեղի ունեցել Երեւանում։ 44-օրյա պատերազմի մասնակից, 1-ին կարգի հաշմանդամ, սպա Էրիկ Գասպարյանի մայրիկին՝ Լուսինե Չիլ-Գեւորգյանին, Նոր Նորքի վարչական շրջանի աշխատակիցը 15 հազար դրամով տուգանել է՝ տրանսպորտի ուղեվարձը, իբր, չվճարելու համար։ Բայց ամենազավեշտալին այն է, որ այդ նույն տրանսպորտային քարտը քաղաքապետարանն էր նրան տրամադրել՝ անվճար երթեւեկելու համար։ Քարտը նրան պետք էր՝ որդուն՝ «Զինվորի տուն» այցելելու համար։ Հարց է ծագում՝ ո՞ւր է Երեւանի քաղաքապետ ՏԻԳՐԱՆ ԱՎԻՆՅԱՆԸ։ Ինչպե՞ս է ստացվում, որ հերոսի մորը համայնքը նախ անվճար երթեւեկության քարտ է տալիս, հետո նույն քարտով տուգանում։ Եթե սա սխալ է՝ անմիջապես վերացրե՛ք վարչական ակտը եւ պատասխան տվեք՝ ո՞վ է թույլ տվել այս անհեթեթությունը։ Վերջիվերջո, Էրիկի եւ մեր մյուս հերոսների շնորհիվ է, որ դուք ու մենք այսօր դեռ կանք։ Ամո՛թ է, հազար ամոթ։

Իսկ Ազգային ժողովում` լրագրողների հետ ճեպազրույցում, ուշագրավ հայտարարությամբ է հանդես եկել ԱԺ «Հայաստան» խմբակցության պատգամավոր ԳԵՂԱՄ ՄԱՆՈՒԿՅԱՆԸ։ Ո՛չ ավել, ո՛չ պակաս նա ասել է. «Ջհանդամ, թե նոր է ընտրվել, Փաշինյանի հրաժարականն եմ պահանջում»։ Էհ, ընկեր Գեղամ, ժողովուրդը պահանջի, Ձեր ասած՝ «ջհանդամ», բայց ախր Դուք էիք ընդամենը ամիսներ առաջ Նիկոլ Փաշինյանի հետ ընտրությունների մասնակցում, հետո՝ լեգիտիմացնում դրա արդյունքները։ Եթե Փաշինյանը, ինչպես հիմա եք ասում, անընդունելի է, ապա ինչո՞ւ էիք նրա կազմակերպած ընտրական գործընթացի մասնակիցը դառնում ու արդյունքներն ընդունում։ Իսկ եթե ընդունում էիք արդյունքները, ապա ի՞նչ էիք սպասում, որ Փաշինյանը փոխվելո՞ւ է, թե՞ սկուտեղի վրա իշխանությունը հանձնելու է ձեզ։ Մի քիչ էլ հետ գնանք՝ ի՞նչն էր խանգարում, որ ԱԺ նախորդ գումարման ժամանակ իմպիչմենթի գործընթացը կյանքի կոչեիք, որ այսօր էլի հին, ավելի վատ տաշտակի առաջ չկանգնեիք։

Թե ինչ է կատարվում աշխարհում, ոչ պակաս հատկանշական է։ Ղազախստանի նախագահ ԿԱՍԻՄ-ԺՈՄԱՐՏ ՏՈԿԱԵՎԸ երկրի քաղաքացիներին կոչ է արել վերադառնալ «հարազատ ավանդույթներին» եւ ավելի զուսպ լինել միմյանց ողջունելիս։ Նրա հայտարարության ամենաքննարկվող հատվածը, սակայն, վերաբերում է տղամարդկանց գրկախառնություններին ու համբույրներին։ «Լավ բան չէ, երբ տղամարդիկ սկսում են միմյանց գրկել, համբուրել… Երբեք մեր սովորույթների մեջ նման բան չի եղել»,- հայտարարել է Տոկաեւը։ Նախագահի դժգոհության առանձին թիրախ են դարձել զինվորականները։ Նա հատկապես տարօրինակ է համարել այն, որ գեներալները միմյանց ողջունելիս գրկախառնվում են։ «Առավել եւս՝ մարդիկ զինվորական համազգեստով։ Գեներալները սկսում են միմյանց գրկել։ Ի՞նչ է սա»,- ասել է նա։ Իր տեսակետը հիմնավորելու համար Տոկաեւը օրինակ է բերել Խորհրդային Միության մարշալներին՝ ընդգծելով, որ դժվար է պատկերացնել Երկրորդ համաշխարհային պատերազմի հաղթող մարշալներին միմյանց գրկախառնվելիս կամ համբուրվելիս։ Տոկաեւը նաեւ նշել է, թե ինչն է համարում ընդունելի տարբերակ։ Նրա խոսքով՝ տղամարդիկ պետք է միմյանց ամուր սեղմեն ձեռքը, այլ ոչ թե պարզապես ձեռքը մեկնելով՝ թույլ ողջունեն միմյանց։ Եթե մարդը ցանկանում է ավելի մեծ ջերմություն ցուցաբերել, Տոկաեւի առաջարկած տարբերակն` աջ ձեռքը սրտին դնելն է։ Ասեք, որ ողջունելի առաջարկ է, ու վատ չէր լինի նաեւ մեզ մոտ կիրառվեր, հատկապես ամառվա այս շոգ օրերին։

ԶԱՐՄԱՑԱԾ Է «ԻՐԱՎՈՒՆՔ»-Ը

Այս թեմայով Այս պատմական տարեթիվը խորհրդանշում է հայ ժողովրդի անսասան կամքը. Կասիմ-Ժոմարտ Տոկաև Ադրբեջանական ագրեսիայի հետևանքով Արցախն ունեցել է 220-ից ավելի զոհ Որ խելքներդ չի հասնում, ծպտուն մի հանեք․ ԲԱՄԲԱՍԱՆՔ Ինչ լուծում է տեսնում քաղաքապետը Ով է ստում․ Ավինյանը, թե՞ Փաշինյանը