Մեղավորները գահին են, արդարները՝ բանտում․ այսօր ՀԱՊ կուսակցության նախագահի ծննդյան 45-ամյակն է

11 տարի առաջ Արթուրը վերադարձավ Հայրենիք և այս տարիների շուրջ 7 տարիները իր ծննդյան տարեդարձը նշել է բանտում, 1 տարի դիրքերում և միայն 3 տարին ընկերների, հարազատների և ինձ հետ։ Չգիտեմ ինչպիսին պիտի լինի մարդը և ինչ արժեքների տեր ու ամեն ինչով հզոր, ուժեղ, լավատես, կյանքը սիրող, իր երկրին ու հայրենիքին անմնացորդ նվիրված, որպեսզի այսքան փորձությունների, դավաճանությունների, համատարած ստի ու զրկանքների միջով անցնելով՝ կարողա մնալ ՄԱՐԴ։

 

Ես իհարկե լինելով Արթուրի կողքին այս ճանապարհին` մի կարևոր բան եմ հասկացել, որ անազատության մեջ նա երբեք չի դավաճանել իր սկզբունքներին, իր ընտրությանն ու ավելի ազատ է գտնվել, քան շատերը ազատության մեջ` շղթայված կեղծիքով, ստով, վախով։ Մարդիկ կան, որոնց մասին խոսելիս չես կարող չարտասանել Հզոր, Ուժեղ... բառերը ու դա հենց ինքն է, որ կա։

 

Իհարկե, որպես կին և որպես մայր կուզենայի, որ ամեն բան այլ կերպ լիներ այս օրը, բայց անասելի հպարտ եմ, որ հենց ինքն է իմը, իմ մեծագույն սերը, իմ երեխաների հայրը, իմ ապագա թոռների պապիկը ու հավատացեք անկախ դժվար ու ոչ սովորական ընդունված կյանքի ոճից ու ձևից, վայրէջքներից ու վերելքներից, որ ունեցել եմ, պիտի խոստովանեմ, որ երջանիկ մարդ եմ, երջանիկ կին եմ և երջանիկ մայր եմ հենց իր շնորհիվ և որի համար շնորհակալ եմ Աստծուն։

 

Քանի որ այսօր ունեմ հնարավորություն իրեն այցելելու և շնորհավորելու անձամբ` կփոխանցեմ նաև բազմաթիվ աջակիցների, ընկերների շնորհավորանքները, որոնք դեռ կեսգիշերից շարունակում եմ անդադար ստանալ։ Այս վերջին ժամանակներում ամենակարևոր բանը, որ Արթուրին պետք է դա առողջությունն է, որն էլ իմ լավագույն ու առաջնային մաղթանքն է։ Քեզ բարի տարեդարձ իմ», - գրել է նա։