«Ժողովուրդ». Իշխանությունը նախ ուզում է Վանաձորն ու Փամբակը միավորել. ընտրությունները կհետաձգվեն

«Ժողովուրդ» օրաթերթը գրում է. ««Ժողովուրդ» օրաթերթի տեղեկությունների համաձայն՝ իշխանությունը քննարկում է Վանաձորում նախատեսվող համայնքապետի ընտրությունները հետաձգելու հարցը։ Մեր իշխանական աղբյուրների փոխանցմամբ՝ նախնական քննարկումների ժամանակ նախատեսվում էր Վանաձորում համայնքապետի ընտրություն անցկացնել արդեն այս տարվա դեկտեմբերին, ընդ որում՝ ՔՊ-ի հիմնական թեկնածուն Լոռու մարզպետ Արեն Մկրտչյանն էր։

Բանն այն է, որ կառավարությունը նախատեսում է միավորել Լոռու մարզի գործող Վանաձոր և Փամբակ համայնքները՝ ձևավորելով մեկ խոշորացված համայնք՝ Վանաձոր անվանումով։ Նոր համայնքի վարչական կենտրոնը լինելու է Վանաձոր քաղաքը, իսկ միավորված համայնքի կազմում ընդգրկվելու է ընդհանուր 22 բնակավայր։

Այսինքն՝ իշխանության տրամաբանությունը, ըստ մեր աղբյուրների, հետևյալն է․ նախ ավարտին հասցնել Վանաձոր–Փամբակ խոշորացման գործընթացը, ապա ընտրություն անցկացնել արդեն նոր ձևավորված համայնքում։ Հակառակ դեպքում, եթե ընտրությունը տեղի ունենա գործող Վանաձոր համայնքի սահմաններով, հետագայում խոշորացումից հետո կրկին առաջանալու է նոր համայնքի ՏԻՄ-երի ձևավորման հարց։

Մեր աղբյուրների փոխանցմամբ՝ հենց այս հանգամանքն է պատճառը, որ դեկտեմբերին նախատեսվող ընտրությունների հարցում իշխանությունը սկսել է հետքայլ անել, և այժմ քննարկվում է այն 2027 թվական տեղափոխելու տարբերակը։

Իշխանության համար Վանաձորի ընտրությունը հատկապես կարևոր է, քանի որ խոսքը Լոռու մարզի ամենախոշոր համայնքի մասին է։ Իսկ Վանաձորն ու Փամբակը միավորելու դեպքում ընտրության քաղաքական հաշվարկն ավելի է ընդլայնվելու՝ մեկ ընտրության շրջանակում ընդգրկելով ոչ միայն Վանաձոր քաղաքը, այլև նոր համայնքի կազմում ներառվող բոլոր 22 բնակավայրերը։

Թեև իշխանությունը խոշորացման գործընթացը ներկայացնում է վարչատարածքային բարեփոխման տրամաբանության մեջ, «Ժողովուրդ»-ի աղբյուրների փոխանցմամբ՝ դրա ժամկետների և առաջիկա ընտրությունների հետ կապված իշխանական ներսում առկա են նաև հստակ քաղաքական հաշվարկներ»։

Առավել մանրամասն թերթի այսօրվա համարում

Տե´ս նաեւ https://t.me/iravunk/71849 

Այս թեմայով ՌԴ Պետդումայի ընտրությունները բոյկոտելու արեւմտյան ծրագիրը ձախողվեց Փաշինյանը նպատակ ունի կտրել թաղման նպաստները ՇՏԱՊ. Նարիմանյանը ցույց է տալու այն մարդկանց, ովքեր դիմակով և առանց դիմակի բռնության են ենթարկել. Խորխոռունու սպանության հետքերով Ռուսաստանը շատ ավելի ազդեցիկ է, քան Ադրբեջանն ու Թուրքիան, հետևաբար Ռուսաստանի հետ ևս պետք է զգույշ լինել Հայաստանը վերջին հորիզոնականում է տարածաշրջանում՝ զիջելով Վրաստանին, Ադրբեջանին ու Թուրքիային. Կրթության փորձագետը ահազանգում է