«Առանց Հայաստան չեմ կարող գոյատեւել»

Աշխարհի տարբեր բեմերում թավջութակի միջոցով հայ կոմպոզիտորների գործերը օտարներին հրամցնելով` երիտասարդ թավջութակահար, Չայկովսկու անվան միջազգային մրցույթի ոսկե մեդալակիր, «Մովսես Խորենացի» մեդալակիր ՆԱՐԵԿ ՀԱԽՆԱԶԱՐՅԱՆՆ օրերս արժանացավ ՀՀ վաստակավոր արտիստի կոչման: 

ՎԱՍՏԱԿԱՎՈՐ ԱՐՏԻՍՏԸ ՕՐԻՆԱԿ ԲԵՐԵՑ ԿՈՉՈՒՄ ՉՈՒՆԵՑՈՂ ԵՐԱԺԻՇՏ ԾՆՈՂՆԵՐԻՆ

Նարեկի համար նման կոչման արժանանալը ոգեւորիչ է. «Երբ գնահատում է ոչ միայն ժողովուրդը, այլ նաեւ երկրի իշխանությունը, անշուշտ դա ոգեւորիչ է: Այս կոչումն ընդունել եմ որպես ավանս, որպեսզի աշխարհի լավագույն բեմերում շարունակեմ ներկայացնել Հայաստանը: Իրականում կոչում ունենալ-չունենալը չպետք է ազդի աշխատանքիդ որակի վրա: Դասական երաժշտության ոլորտում շատերը չունեն նման կոչումներ, բայց ունեն դրանց արժանանալու շատ արժանիքներ: Ինչպես եւ իմ ծնողները` Կոմիտասի անվան կոնսերվատորիայի պրոֆեսորներ Գայանե եւ Սուրեն Հախնազարյանները: Ջութակահար հայրս 26 տարի նվագել է Կոմիտասի անվան լարային քառյակում` 40-ից ավելի երկրներում ներկայացրել է հայ մշակույթն ու Կոմիտասը, բայց այսօր վաստակավորի կոչում չունի, այնինչ` ժողովրդական կոչման է արժանի»: 

«ՀԵՂԻՆԱԿԱՎՈՐ ԲԵՄՈՒՄ ՀԱՅ ԿՈՄՊՈԶԻՏՈՐԻ ԳՈՐԾԵՐԸ ՆԵՐԿԱՅԱՑՆԵԼԸ ՄԵԾ ՊԱՏԻՎ Է»

Ինչեւէ, վերջին տարիներին Կոնսերվատորիայի եւ երաժշտական դպրոցների թավջութակի դասարաններում փաստում են` դիմորդների քանակն ավելացել է: Թավջութակահարն այդ փաստից միմիայն ուրախ է: «Իրավունքի» հետ զրույցում երաժիշտը թեթեւ ժպիտով հաստատեց մեր այն դիտարկումը, թե հենց իր շնորհիվ է թավջութակի հանդեպ հետաքրքրությունն այդքան շատացել:
- Նարեկ, աշխարհի տարբեր բեմերում հաղթական կերպով օտարներին ներկայացնում եք հայ կոմպոզիտորների գործերը, բայց տարիներ առաջ երիտասարդի համար թավջութակ նվագելն այդքան էլ նորաձեւ չէր, այսօր արդեն Ձեր շնորհիվ հետաքրքրություն կա այդ գործիքի նկատմամբ: Ի՞նչ կասեք այս մասին:
- Անշուշտ, թավջութակի հանրայնացումը եւ ստատուսն աճում է ողջ աշխարհում, այդ թվում եւ Հայաստանում, ինչը շատ հաճելի է: Հաճախ եմ փորձում հայ կոմպոզիտորների ստեղծագործությունները նվագել աշխարհի տարբեր հեղինակավոր բեմերում, օրինակ` Ալեքսանդր Հարությունյանի, Ադամ Խուդոյանի եւ այլն: Հաջորդ տարի, Համբուրգի նոր բացված «էլբա» ֆիլհարմոնիայի մեկ միլիարդ եվրո արժողությամբ դահլիճում կնվագեմ շատ սիրելի կոմպոզիտոր  Էդուարդ Հայրապետյանի ինձ համար գրված «Թավջութակի կոնցերտը», որը կլինի պրեմիերա: Նման հեղինակավոր բեմում հայ կոմպոզիտորի ստեղծագործությունը ներկայացնելը մեծ պատիվ է ու պատասխանատվություն: Ընդհանրապես, իմ կողմից փորձում եմ հնարավորինս ամեն ինչ անել, որպեսզի  աշխարհի ունկնդրին ծանոթացնեմ հայ կոմպոզիտորների երաժշտությանը:

«ԿԱՐՆԵԳԻ ՀՈԼԻ ԲԵՄՈՒՄ ՀԱՆԴԻՍԱՏԵՍԸ ԲՐԱՎՈՆԵՐՈՎ ՈՏՔԻ ԿԱՆԳՆԵՑ»

- Հետաքրքիր է, թե ինչպե՞ս են օտարներն ընդունում հայ կոմպոզիտորների գործերը:
- Շատ ջերմ: Դժվար է ասել, թե ինչպես են ընդունում օրինակ` գերմանացի կոմպոզիտորների գործերը: Մենք ունենք մի շարք հանճարեղ հայ կոմպոզիտորներ, որոնց գործերը շատ ջերմորեն են ընդունվում: Երբեք չեմ մոռանա, երբ հեղինակավոր Նյու Յորքի Կարնեգի հոլի բեմում նվագեցի Ադամ Խուդոյանի թավջութակի համար սոնատը, եւ դահլիճն այդ կատարումից հետո ծափահարություններով ու բրավոներով ոտքի կանգնեց: Այն ինձ համար երեւի ամենամեծ հաղթանակն էր, եւ ավելին երազել դժվար էր:

«ՀԱՅԱՍՏԱՆՈՒՄ ԵԼՈՒՅԹ ՈՒՆԵՆԱԼԸ ՄԻՇՏ ԻՆՁ ՀԱՄԱՐ ԱՌԱՆՁՆԱՀԱՏՈՒԿ Է»

- Աշխարհի շատ բեմերում եք հանդես եկել, բայց «Նաիրի» երաժշտական մրցանակաբաշխության ժամանակ մրցանակ հանձնեցիք ժողովրդական արտիստ, թավջութակահարուհի Մեդեա Աբրահամյանին, շեշտելով, որ Ձեզ չդասավանդելով` եղել է Ձեր ներշնչանքի աղբյուրը:
- Կապ չունի, թե աշխարհով մեկ որքան բեմերում եմ նվագում, Հայաստանում  ելույթ ունենալը միշտ ինձ համար առանձնահատուկ է, հուզիչ, կարեւոր ու պատասխանատու: Հանձնել մրցանակ իմ շատ սիրելի եւ հարգված Մեդեա Աբրահամյանին` մի ուրիշ մեծ պատիվ է, որովհետեւ մեծացել եմ Մեդեա Վարդանովնայի մշակույթն ու արվեստը լսելով ու սովորելով: Նա արժանի էր այս մրցանակին, եւ ուրախ եմ, որ ինձ էր պատիվ տրված` նրան հանձնելու այդ մարցանակը:

«ՇԱՏ ՉԱՆՑԱԾ ԿՎԵՐԱԴԱՌՆԱՄ»

- Նարեկ, առաջիկայում աշխարհի ո՞ր բեմերն են Ձեզ սպասում: 
- Մեկնելու եմ Ռուսաստան, որտեղ մի շարք քաղաքներում ելույթ պիտի ունենամ ռուս հայտնի դաշնակահար Դենիս Մացոեւի հետ: Հետո` Անգլիա, Մեծ Բրիտանիա, Չինաստան, Ավստրիա, Սերբիա եւ այլ եվրոպական երկրներ, այդ թվում` նաեւ Ամերիկա եւ Կանադա:
- Իսկ Հայաստանն այդ ցանկում չկա՞:
- Հայաստանում հաճախ եմ համերգներ ունենում, բայց մոտակա մի քանի  ամսվա ընթացքում դեռ պլաններ չկան, համոզված եմ` շատ չանցած կվերադառնամ, որովհետեւ ես առանց Հայաստան չեմ կարող գոյատեւել:

Զրուցեց ԼԻԼԻԹ ԵՂԻԱԶԱՐՅԱՆԸ

Այս թեմայով Ի՞նչ է «ակնարկում» Չեխիայի դեսպանն իր կարմիր վարդով Պետք է Խաչատուր Ալբերտիչի հետ հանդիպեմ․ ինչու են վտարում Մհեր Արմենիային բնակարանից Որ ուժերն են մասնակցում Կարապետյանի տան հավաքին Նիկոլ Փաշինյանն ուզում է առևտուր անել մեզ հետ. ինչքան պետք է՝ կնստենք, կհելնենք, բայց պետք է սրանց ցույց տանք, որ չենք զիջելու. Նարեկ Կարապետյան Վաղը պետք է կարևոր բան լիներ, մի քանի ժամից կիմանաք, դա են փորձել կանխել․ Նարեկ Կարապետյան