«Իմ պարագայում, իրոք, սերը կա…». Պաշ Սարդան (Պրեմիերա)

Երգիչ ՊԱՇ ՍԱՐԴԱՆԸ եւ ռեփ երգիչ LT-ն (Սամ Հակոբյան), որը ներկայանում է Լրիվ Տեղական բեմական անունով հանրության դատին են հանձնել «Սերը կա» զուգերգը: Ի դեպ, երգի խոսքերի եւ երաժշտության հեղինակը նույնպես Պաշ Սարդանն է, ում հետ էլ զրուցեց «Իրավունքը»:

-Պաշ, սիրո թեման բավական շատ է Ձեր երգացանկում: Ի վերջո, այս թեման վերջ ունի՞:

- Սերն այն գերբնական պարգեւն է մարդկությանը, որ անվերջ կարելի նրա մասին խոսել ու երգել, իհարկե, եթե սերն արդեն ապրում է քո հոգում։ Իսկ իմ պարագայում, իրոք, սերը կա, ինչպես երգի անունն է, եւ այդ ժամ մնում է ապրել ու գովերգել այն արժանի մարդուն, ով կրում է այդ աստվածատու անունն իր սրտում։

-Այսինքն՝ կարելի՞  է ասել, որ Ձեզ համար սերը, իսկապես, կա՞ եւ արդեն հասցե ունի:

- Այո՛, սերը կա, այն ապրում է իմ բանականության ու ողջ էության մեջ եւ ունի իր արժանի հասցեատերը: Երբ սիրում ես, քո ներաշխարհն այլ գույներով են սկսվում ներկվել, իսկ արվեստի մարդու համար այն հրաշալի մուսա է։

- Արդեն որերորդ երգն է, որի խոսքերի եւ երաժշտության հեղինակը Դուք եք: Պատրաստվո՞ւմ եք երգեր գրել նաեւ գործընկերների համար, թե՞ այս դաշտն էլ է մենաշնորհված:

- Արդեն բավականին աշխատանքներ ունեմ, որ անմիջական հիմնարար գործը ես եմ անում: Ինձ համար շատ կարեւոր է զգալ եւ սիրել այն, ինչ անում եմ: Արդեն մոտ տասնյակ իմ երգերի խոսքերի հեղինակը ես եմ, իսկ երաժշտության հարցում համահեղինակ ունեմ շատ տաղանդավոր ընկերներ, որոնք օգնում են եւ աշխատում ենք միասին: Ինչ վերաբերում է Ձեր հարցին, ես էգոիստ մարդ չեմ, միշտ էլ պատրաստ եմ աշխատել նոր տաղանդավոր երգիչ-երգչուհիների հետ։

- ԼՏ-ի հետ առաջին անգա՞մ եք համագործակցում, մի փոքր կմանրամասնե՞ք՝ հե՞շտ ստացվեց զուգերգը նրա հետ:

- «Լրիվ Տեղական» Սամ Հակոբյանի աշխատանքներին պատահաբար ծանոթացել եմ համացանցում: Շատ տաղանդավոր երիտասարդ է, հավանեցի նրա մտածողությունը եւ մոտեցումը երգերին, ինչն էլ առիթ դարձավ, որ համատեղ երգ թողարկենք: Միշտ հետեւում եմ նոր սերնդին եւ ինձ հենց դուր է գալիս, երբ երգիչը ինդիվիդուալ է,  տարբերվում է, փորձում է ստեղծել իրենն այս դժվարին ասպարեզում: Միշտ պատրաստ եմ աշխատել նման մարդկանց հետ։

- Սպասե՞նք Պաշ Սարդան & LT նոր զուգերգերի:

- Այս երգը փորձ էր, լսարանի արձագանքներից արդեն կհասկանանք հետագա քայլերը…

- Եվ, իհարկե, ավանդական հարցը՝ կլինի՞ տեսահոլովակ այս երգի հիման վրա:

- Ամեն բան հնարավոր է, բայց ներկա պահին դեռ չկան պլաններ։

ՀՐԱՆՏ ՍԱՐԱՖՅԱՆ

Այս թեմայով Օրենքով գող «Զապի» փեսան փորձել է սպանել նրան. նոր սարսափազդու մանրամասներ՝ աղմկահարույց դեպքից Մինչև ԱՄՆ-ի նոր հարձակումը մնացել է 72 ժա՞մ 2023-ի այս օրը Արցախում քաոս էր, դժոխք էին դարձրել Արցախը․ Մետաքսե Հակոբյան Հայկական Շվեյցարիա, որը նոր շունչ ստացավ երիտասարդ համայնքապետի շնորհիվ Մեզ փող մուրողի կարգավիճակում են ներկայացնում, մեր պայքարը փողի մասին չէ, վերադարձի մասին է