«Հայաստան է ներմուծվել շուրջ 300  հազար ավտոմեքենա, որոնց կեսը շահագործվում է Երեւանում». ՃՈ ՊԵՏ

2017 թվականի սկզբից Հայաստանի ճանապարհային ոստիկանությունը ինտենսիվ աշխատանք է կատարել ճանապարհային երթեւեկության բարելավման ուղղությամբ: Այս մասին լրագրողների հանդիպման ընթացքում ասաց Ճանապարհային ոստիկանության պետ Եգոր Կարապետյանը: ՃՈ պետի ներկայացմամբ` փոփոխությունները վերաբերել են օղակաձեւ խաչմերուկներին՝  նախկինում առավելությունը տրվում էր խաչմերուկ մտնող մեքենաներին, փոփոխությունների արդյունքում առավելություն ունեն խաչմերուկում գտնվող մեքենաները: Մինչեւ նորամուծությունը մտցնելը ուսումնասիրվել է արտասահմանյան փորձը: «Մինչեւ փոփոխությունները մեծ խցանումներ կային Հանրապետության հրապարակում, եւ ոստիկանները ստիպված էին օրը 2 անգամ խցանումները վերացնել: Եվս մեկ նորամուծություն վերաբերում է Հանրապետության հրապարակի լուսակիրներին՝ հիմա եռագույն լուսակիրների փոխարեն, տեղադրված են դեղին նախազգուշացնող լուսակիրներ, եւ երթեւեկությունը կանգնում է միայն հետիոտնին փողոցը հատել թույլ տալու համար: Ըստ քաղաքապետարանի հետ համաձայնության՝ 2018-ին անցումները մոտ 10 սմ-ով ճանապարհային ծածկույթից կբարձարցվեն: Կարապետյանի խոսքով՝ փոփոխությունների արդյունքում կրճատվել է ճանապարհային պատահարների եւ հետիոտնի վրաերթերի թիվը: Մի շարք փողոցներում մեծացել է գծերի թիվը: Նպատակը շրջադարձ կամ պտույտ կատարող մեքենաներին առանձին գիծ ապահովելն է: ՃՈ պետի կարծիքով՝ սա նույնպես հանգեցրել է ճանապարհային պատահարների թվի կրճատմանը եւ խաչմերուկների էական բեռնաթափմանը: Կարապետյանը խոստովանեց, որ «նախկին» նշագծման առկայությունը խնդիր է մնում եւ կարող է վարորդներին շփոթեցնել: «Հին» նշգծումը սեւ է ներկվել, բայց, միեւնույն է, երեւում է: Այս կապակցությամբ Կարապետյանը հայտնեց, որ տեսախցիկների գրանցացծ հին նշագծման հետ կապված խնդիրները հաշվի չեն առնվի:

Հարցին, ի՞նչ է արվում մայրաքաղաքում` տոն օրերին եւ երեկոյան ժամերին պարբերաբար արձանագրվող խցանումներին ՃՈ պետը նկատեց. «Հաճախակի խցանումների հիմնական պատճառը ներմուծված մեքենաների մեծ  թիվն է` 10 տարվա ընթացքում Հայաստան է ներմուծվել շուրջ 300  հազար ավտոմեքենա, որոնց կեսը շահագործվում է Երեւանում»: Ուսումնասիրելով  միջազգային փորձը ՃՈ-ն այժմ առավելություն է տալիս շրջանաձեւ երթեւեկությանը, այսինքն՝ խաչմերուկում գտնվող մեքենան առավելություն ունի: Հանրապետության հրապարակում վերացել է  տրանսպորտային  միջոցների կուտակումը, կրկնակի նվազել են նյութական վնասով  ճանապարհատրանսպորտային պատահարները:  Խաչմերուկի մոտակա հատվածներում ստեղծվել են  երթեւեկելի լրացուցիչ գոտիներ:

Լրագրողների այն հարցին, թե ինչն՞ է պատճառը, որ հաճախ բարձրաստիճան պաշտոնյաների եւ նրանց որդիներին պատկանող թանկարժեք մեքենանները, օրինակ Աբովյան փողոցում` ակնհայտ խախտման դեպքում անգամ չեն տուգանվում` ՃՈ պետ Եգոր Կարապետյանն ասաց. «ՃՈ տեսուչների համար կարևոր չէ՝ խախտում կատարած անձը բարձրաստիճան պաշտոնյա՞ է, թե՞ ոչ»:  Ինչ վերաբերում է Աբովյան փողոցին, ՃՈ պետի տեղակալ Արմեն Խաչատրյանն հավելեց, որ Աբովյան փողոցում կան տեսանկարահանող սարքեր, հետեւաբար ՃՈ-ի տեսուչների միջամտությունն արգելվում է:

ԻԼՈՆԱ ԱԶԱՐՅԱՆ

Այս թեմայով Բութ նոպայաձեւ ցավ, այտուց. Թաքնված ախտանիշներ լի անդառնալի հետեւանքներով Էստի համեցեք․ ԸՆԿԵՐ ՓԱՆՋՈՒՆԻ Իրականությունից կտրվածները Սեպտեմբերի վերջին երեք կենդանակերպի նշաններ մեծ փոփոխություններ կզգան ՌԴ Պետդումայի ընտրություններում ՀԱՊԿ-ի առաքելությունում Հայաստանից դիտորդներ չկան