ԿԱՐՃ ԼՈՒՐԵՐ

«Ինչո՞ւ են որոշ հկ-ներ շատ շահագրգռված ընտանեկան բռնության եւ նմանատիպ այլ օրենքներով»

08.12.2017 20:30 ՕՐՎԱ ՊԱՏԿԵՐ ՔԱՂԱՔԱԿԱՆ ՀԱՆԴԻՊՈՒՄ
«Ինչո՞ւ են որոշ հկ-ներ շատ շահագրգռված ընտանեկան բռնության եւ նմանատիպ այլ օրենքներով»

ՀՀ Ազգային ժողովում այս շաբաթ քննարկվեցին բավական աղմկահարույց նախագծեր` սկսած 2018 թվականի պետական բյուջեի մասին լրամշակված օրենքի նախագծից մինչեւ չարչրկված ընտանեկան բռնության մասին օրինագիծը: Հենց այս շրջանակում էլ ծավալվեց «Իրավունքի» զրույցը ԱԺ ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆԻ հետ: 

«Թուլանալ նախագահական կաբինետում` չի հաջողվի». Դենիս Դվորնիկով

«ԲԱՑԱՐՁԱԿԱՊԵՍ ՀԱՐԻՐ ՉԷՐ ՄԵՐ ՀԱՆՐՈՒԹՅԱՆԸ»

– Պարոն Բաղդասարյան, թեպետ ընտանեկան բռնության մասին օրենքի նախագիծը փոփոխությունների է ենթարկվել, բայց մի շարք պատգամավորներ` թե՛ իշխանությունից, թե՛ ընդդիմությունից, փաստեցին, որ օրինագծում առկա ականները չեն վերացել` ապաստարանների, տնտեսական, հոգեբանական բռնության վերաբերյալ ձեւակերպումների հետ կապված: Ի՞նչ կասեք այս մասին:

– Այս օրենքի նախագծի նախնական տարբերակը լրիվ այլ էր, որը բացարձակապես հարիր չէր մեր հանրությանը, մեր մենթալիտետին, մեր ազգային արժեքներին, եւ բավականին երկարատեւ քննարկումների արդյունքում ենք եկել այս փոփոխություններին: Այն մի քանի անգամ քննարկվել է խմբակցությունում, կուսակցությունում, եւ նաեւ հանձնախումբ է ստեղծվել, որտեղ աշխատել են այդ փոփոխությունների վրա: Մեր լայնածավալ առաջարկություններից, կարելի է ասել, ճնշող մեծամասնությունը ընդունվել է` վերնագրից սկսած, էական փոփոխություններ են կատարվել եւ դեռ առաջինից երկրորդ ընթերցման ժամանակ նորից առաջարկություններ են ներկայացվել` ձեր նշած այդ կետերի հետ կապված: 

– Կարելի՞ է համարել, որ այս փոփոխություններից հետո` իշխող Հանրապետականն արդեն կողմնորոշվել է, թե ինչպես է քվեարկելու նախագծին:

– Համենայնդեպս, մենք ունենք քաղաքական որոշում, որ այդպիսի օրենք պետք է: Հանրապետական խմբակցությունում վերջնական քննարկումների արդյունքում չէի ասի, թե ողջունել ենք այդ ամենը, բայց նշեմ, որ ընդդիմադիր գործընկերների մեծամասնության համար նույնպես ընդունելի է եղել այս օրենսդրական նախաձեռնությունը: Իհարկե, ինչպես տեսաք, «Ծառուկյան» դաշինքում էլ տարաձայնություններ կան այս հարցում, բայց մյուս երկու խորհրդարանական քաղաքական ուժերի մոտ այդպիսի տարաձայնություններ չկան: Ավելին` կարծես թե, որոշ քաղաքական ուժերի եւ քաղաքական գործիչների համար ընդունելի էր անգամ նախնական տարբերակը: Բայց մենք հասանք նրան, որ ՀՀԿ խմբակցության առաջարկությունների 90-95 տոկոսը ընդունվի: Եվ դեռ այդ քննարկումները պետք է շարունակենք, որպեսզի օրենքը լինի այնպիսին, որ մեր ընտանիքների ամրությանը վտանգ չսպառնա, եւ մասնակիորեն այս օրենքը վերաբերի միայն այն դեպքերին, որտեղ կան ցայտուն դեպքեր: Իսկ մնացած դեպքերի համար մեր քրեական օրենսգրքում դրանց պատասխանները կան: Ասեմ, որ այս օրենքը բխում է Ստամբուլյան կոնվենցիայից, որտեղ մենք ունենք պարտավորություններ, եւ չենք թաքցնում, որ սա այդ շրջանակում է: Բայց, ամեն դեպքում, պետք է կարողանանք ընդունել այնպիսի օրենքներ, որը հարիր է մեր արժեհամակարգին: 

«ՊԵՏԱԿԱՆ ՄՐՑԱՆԱԿ ՉՍՏԱՆԱԼ ՉԻ ՆՇԱՆԱԿՈՒՄ, ՈՐ ՈՒՆԵՆՔ ՎԱՏ ԹԱՏՐՈՆ»

– Այս օրինագծում լայն ներգրավվածություն ունեն ՀԿ-ները, որոնք մուտք ու ելք են ունենալու ապաստարաններում ու ընտանիքներում: Չե՞ք կարծում, որ մի քիչ շատ բան է վերապահվել նրանց` հաշվի առնելով այն, թե  ՀԿ-ների ինչպիսի խայտառակ բազմազանություն ունենք մեր երկրում:

– Այդ իսկ պատճառով առաջարկություններ ենք ներկայացրել, որ կարողանանք ընդհանրապես ընտանիք մուտք գործողների քանակը վերացնել, որ ընտանիքին միջամտություններ չլինեն: Իսկ ՀԿ-ների հարցն առանձին խնդիր է, եւ պետք է նախ  ուսումնասիրենք, թե ինչու են որոշ ՀԿ-ներ շատ շահագրգռված ընտանեկան բռնության եւ նմանատիպ այլ օրենքներով: Մենք պետք է սա քննարկման առարկա դարձնենք եւ ուսումնասիրենք նրանց շահագրգռվածության աստիճանը, թե որտեղից է գալիս` իրոք, օրենքի՞ն են կողմնակից, թե՞ այլ շահերով են առաջնորդվում:

«ԹՈԶ ՓՉԵԼՈՒ ԲՅՈՒՋԵ ՉԵՆՔ ԲԵՐՈՒՄ»

– Անդրադառնանք նաեւ 2018 թվականի պետական բյուջեի նախագծին, որին դեմ է խորհրդարանական ողջ ընդդիմությունը: Ընդդիմախոսները նժարին են դնում այն, որ աշխատավարձերը չի բարձրանալու, թոշակները` եւս, մյուս կողմից` ունենք գնաճ, արտագաղթ, տնտեսական աճն էլ տեսանելի չէ... Իսկ դրակա՞նը որն է:

– Ես պետք է նորողություն խնդրեմ մեր ընդդիմադիր գործընկերներից, բայց այդ պատճառաբանություններից որեւէ մեկը հիմնավորված չէ: Ի սկզբանե, երբ կառավարությունը եկավ, նախընտրական շրջանն էր, եւ հայտարարեց, որ առայժմ այդ ռեսուրսները չունենք, որ կարողանանք գնալ համարձակ քայլերի: Բայց կառավարությունը տեսնում է այն հեռանկարները, որ կարող ենք մոտ ապագայում դրանց հասնել, եւ բոլորս ողջունեցինք դրան միտված համարձակ քայլերը: Նախընտրական բյուջեները, եթե ուսումնասիրել եք, միշտ լինում են գեղեցիկ` ժողովրդին սիրաշահելու համար, բայց մենք գնացինք այդ համարձակ քայլին: Եվ, կարծես, հանրությունն ընկալեց, որ ռեալ է գնահատվում մեր այսօրվա իրավիճակը,  հնարավորությունները, ռեսուրսները եւ, այսպես ասած, թոզ փչելու բյուջե չենք բերում, որ ձայներ վաստակենք: Դրան հաջորդեց հետընտրական շրջանը, որի ժամանակ, ինչպես գիտեք, լինում են ռեյտինգային ընտրակարգով ընտրվածներ, խոստումներ եւ այլն, բայց կառավարությունը շատ պարզ բացատրեց, որ մեր հնարավորություններից դուրս չենք գալու` արտաքին պարտքի հաշվին, այլ պետք է այդ ավելացումներն ապահովենք, այսինքն` հիմքեր պետք է ստեղծենք դրա համար: Կառավարությունն այս պարտավորություններն իր վրա է վերցրել, եւ հաջորդ տարիներին` 2019, 2020, 2021 թվականներին, դրանց դինամիկ աճը պետք է լինի` ե՛ւ տնտեսական աճի տեսանկյունից,  ե՛ւ ներդրումային ցանցի ակտիվացման, ե՛ւ թոշակների ու աշխատավարձերի բարձրացման հետ կապված: Ինձ թվում է` ավելի լավ է ազնիվ մեր հանրությանը տեղյակ պահենք մեր հնարավորությունների եւ ռեսուրսների մասին եւ դնենք այն հիմքերը ու թիրախավորենք այն կետերը, որոնք կարող են բերել ապագայի զարգացմանը: Եվ մենք ասում ենք, որ սա կայունացման բյուջե է: Դրա համար էլ չշտապեցինք ու ասում ենք, որ հիմա ոչ թե արդյունքներին ենք գնահատական տալիս, այլ` դրված հիմքերին ու հեռանկարներին: Իսկ արդյունքները կգնահատենք մի փոքր ուշ:

ՀՀ սփյուռքի նախարարը հակադարձեց Կարեն Բեքարյանին

– «Ծառուկյան» դաշինքի պատգամավորներից կառավարության հետ հարցուպատասխանի ժամանակ, հիշեցնում էին, որ 7 տոկոս տնտեսական աճ չապահոված կառավարությունները բոլորն էլ հրաժարական են տվել: Այս առումով, ինչպե՞ս եք տեսնում այս կառավարության ճակատագիրը:

– Ամեն ինչ պետք է նայել համեմատության դաշտում, ես իմ ելույթի ժամանակ ԱԺ ամբիոնից օրինակներ բերեցի, թե որ երկրներում ինչպիսի տնտեսական աճ կա այսօր, ընդ որում` մի տեղ կան մինուսներ, մյուս տեղում` պլյուսներ, ասենք, 0.1 տոկոս: Եվ խոսքը վերաբերում է ամենազարգացած երկներին: Եվ եթե միանգամից դնենք նպատակային 7 տոկոս տնտեսական աճ, այդ դեպքում պետք է պարզապես, տապոռային հարկային քաղաքականություն վարենք: Այն սկզբունքները, որոնք որդեգրել ենք այս կառավարության ժամանակ, ըստ էության, հրաժարվում ենք նման քաղաքականությունից` փոքր եւ միջին բիզնեսին չնեղացնելու պայմանով եւ ընդհանրապես` բիզնես աշխարհին չճնշելու համար: Իսկ հավասար մրցակցային դաշտ ապահովելով` կկարողանանք ներդաշանկ տնտեսական աճն ավելացնել: Դինամիկ  զարգացման միջոցով մենք պետք է հասնենք այդպիսի տոկոսների: Ինձ թվում է` հենց դրա համար է կարեւոր, որ հիմքերը ճիշտ դրվեն: 

ՀՐԱՆՏ ՍԱՐԱՖՅԱՆ

 

КОМСОМОЛЬСКАЯ ПРАВДА