Մովսես գյուղը մեր հավատքի սահմանն էլ է. Տեր Աբել (Հրատապ)

ՀՀ պաշտպանության նախարարությունից երեկ նախ տեղեկություն տարածվեց, որ Ադրբեջանի զինված ուժերի զինծառայողներն անհասկանալի պատճառով՝ ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել: Հայկական կողմի նախազգուշացումից հետո՝ Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք: Ժամը՝ 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը, կիրառելով հրետանային կրակ, սակայն ճնշվել են հայկական կողմից եւ կորուստներ կրելով, հետ շպրտվել: Իսկ արդեն ուշ գիշերին ՀՀ ՊՆ մամուլի քարտուղար Շուշան Ստեփանյանը հայտնեց, որ ադրբեջանական կողմը վերսկսել է հրետակոծել մեր նույն դիրքի ուղղությամբ 82 մմ ականանետից եւ տանկից: Միեւնույն ժամանակ, նա տեղեկացրեց, որ Հայկական զինված ուժերը կորուստներ եւ վիրավորներ չունեն։ Իսկ հակառակորդի բոլոր փորձերը թիրախավորվում եւ չեզոքացվում են:

Դեպքի վայրից վերջին նորությունները հաջողվեց պարզել Տավուշի սահմանամերձ Մովսես գյուղի Սուրբ Մարիամ Աստվածածին եկեղեցու հոգեւորական Արժանապատիվ ՏԵՐ ԱԲԵԼ քահանա ՔԱՐՏԱՇՅԱՆԻՑ: Նա վստահեցրեց, որ ամեն ինչ նորմալ է. «Մենք վստահում ենք մեր զինվորներին: Իրենց ցավը տանեմ, կանգնած են անսասան՝ ուժեղ հավատքով: Մենք ոչ մի բանի մասին մտածելու չունենք, այս պահին դադարել է կրակոցները: Բնակավայրի եւ խաղաղ բնակչության հետ կապված ոչ մի խնդիր չենք ունեցել, նրանց հետ ոչ մի առնչություն չկա: Խնդրում եմ՝ հանգստ եղեք, մեր առավոտյան ժամը՝ 9:15-ի աղոթքները չի հետաձգվելու ոչ մի կերպ: Ոչ մի թշնամի չի կարողանալու խաթարել մեզ ճիշտ ճանապարհից: Միշտ ասում ենք, որ Մովսես գյուղը մեր հավատքի սահմանն էլ է»:

Տեր հայրը նաեւ տեղեկացրեց, որ միջհենակետային խնդիր է եղել: Ճիշտ է, ծանր տեխնիկա, տանկեր են աշխատել, բայց հիմա ամեն ինչ դադարել է. «Ո՛չ Չինարիի, ո՛չ Մովսեսի բնակչությանը վտանգ չի սպառնում: Մենք վստահ ենք մեր զինվորների պրոֆեսիոնալիզմի, ոգու ուժի եւ կամքի վրա: Խնդրում եմ՝ հանգիստ եղեք, ասեկոսենեերի մի վստահեք: Այդ արագ տարածվող ինտերնետային լուրերին բանի տեղ մի դրեք, բոլորը հերքում եմ: Մենք այստեղ ենք, ամեն ինչ նորմալ է: Փառք Տիրոջը»:

ՀՐԱՆՏ ՍԱՐԱՖՅԱՆ