Էլեկտրաէներգիայի ու գազի նոր սակագները և արևային պանելների ապագան Հայաստանում

ՀՀ Էներգետիկ ենթակառուցվածքների և բնական պաշարների փոխնախարար Հայկ Հարությունյանը, լրագրողների հետ հանդիպմանը նշել է, որ կառավարության՝ էներգետիկայի բլոկի հիմնական միջոցառումները բխում են էներգետիկ անվտանգության հայեցարգի 4 հիմնական ուղղություններից: Միջոցառումներ նախատեսված են վերականգնվող էներգետիկայի, էներգախնայողության, ատոմային էներգետիկայի, ինչպես նաև տարածաշրջանային առևտրի ընդլայնման ոլորտում:

<<Վերոնշյալներներն այն հիմնական առաջնահերթություններն են, որի վրա հիմնված է կառավարության՝ էներգետիկայի բլոկի ծրագիրը:Վերականգնող էներգետիկայի ոլորտում նախատեսվում է ծրագիր մշակել փոքր միկրոկայանները մասսայականացնելու համար:Մինչ օրս բավական գործ է արվել այս ոլորտը խթանելու համար, բայց հիմա հստակ ծրագիր է պետք, որպեսզի գա ժամանակ, երբ ինքնաթիռով Երևան ժամանելիս վերևից տեսնենք, որ բոլոր տանիքների վրա արևային պանելներ են տեղադրված: Մեր նպատակը հենց այն է, որ մարդիկ ոչ թե հարցնեն, թե իմաստ ունի՞ արևային պանել դնելու, այլ հարցնեն, թե իմաստ ունի՞ չդնելը>>:

Հարությունյանի գնահատականներով՝ շատ կարճ ժամանակում հնարավոր կլինի հասնել դրան, որովհետև ամենօրյա աշխատանք է տարվում բոլոր շահագրգիռ կողմերի հետ, որպեսզի ծրագիրն իրականացվի:Նպատակը Հայաստանի համար էներգետիկ անկախության ապահովումն ու ամպրապնդումն է: 

Նա նշեց, որ անձամբ իր  տան տանիքին տեղադրել է արևային պանելներ և արդեն 2.5 ամիս է՝ իր կողմից սպառված էլեկտրաէներգիան արտադրում է ինքը:

<<Հորդորում եմ բոլորին նույնն անել: Դիմել եմ լիզինգի, բերել տեղադրել են, սկզբնական ոչ մի ներդրում չի պահանջում, այն գումարը, որ ես ամսական պետք է վճարեի հոսանքի համար, հիմա պարզապես լիզինգի վճարն եմ անում>>:

Փոխնախարարն ասաց, որ մեկ բնակարանի համար միջին սպառումը 200 կիլովատ/ժամ է, այսինքն՝ տարեկան այն 2400 կիլովատ/ժամ է դառնում: 2400-ն ապահովելու համար պետք է մոտավորապես 1,5 կիլովատ արևային պանել, իսկ 1 կիլովատ պանելի արժեքը տատանվում է միջինը 1000 ԱՄՆ դոլարի սահմաններում:

Ի դեպ՝ փոխնախարարը տեղեկացրեց, որ 2017թ հունվարի 1-ից Հայաստանում կգործեն գազի, իսկ փետրվարի 1-ից՝ էլեկտրաէներգիայի նոր սակագները:

<<Ցանկությունը մեծ էր ավելի շուտ նվազեցնելու, սակայն, օրենսդրության համաձայն, սակագները փոփոխության են ենթարկվում նոր սակագների հաստատումից վեց ամիս հետո միայն>>:

Հիշեցնենք՝ այս տարվա օգոստոսի 1-ից էլեկտրաէներգիայի սակագինը շարքային սպառողների համար նվազել է 2,58 դրամով:

Ս.Ա