Արեւմուտքն անգամ «Մանկական Եվրատեսիլ»-ում շոյեց հայերի ականջն ու «յան» տվեց

Լոնդոնի Ուիմբլդոն արվարձանում կայանալիք թենիսի ամենահին եւ հեղինակավոր մրցաշարին, եթե աշխարհի չեմպիոն թենիսիստները մեծ աղմուկ բարձրացրին, որ սպորտը չպետք է խառնել քաղաքականության հետ եւ ռուս ու բելառուս թենիսիստների չմասնակցելը համարեցին աբսուրդ, իսկ մրցաշարն անցկացնելն առանց նրանց՝ անիմաստ, ապա «Մանկական Եվրատեսիլն» այս տարի էլ, Ուկրաինայում ռազմական գործողություններով պայմանավորված, ՌԴ-ի դեմ կիրառեց պատժամիջոց, եւ այն տեղի ունեցավ առանց Ռուսաստանի եւ Բելառուսի ներկայացուցչի մասնակցության: Այո, Արեւմուտքն արդեն հաշվեհարդար է տեսնում երեխաներից՝ «Մանկական Եվրատեսիլ 2023» երգի միջազգային մրցույթի մասնակից 16 երկրների լուռ համաձայնությամբ:

Ի դեպ, Ֆրանսիայի Նիցցա քաղաքում կայացած «Մանկական Եվրատեսիլ 2023» երգի միջազգային մրցույթի քաղաքականացվածությունն այս տարի միայն վերոնշյալով չէ, որ ընդգծվեց: Մրցույթում հաղթեց Ֆրանսիան ներկայացնող Զոի Կլաուզուրն՝ իր «Սիրտ» երգով, ընդ որում՝ այս երկիրը հաղթում է երկրորդ տարին անընդմեջ: Իսկ մինչեւ Ֆրանսիայի հաղթելն՝ Արեւմուտքը մի լավ շոյեց հայերի ականջը: Ամենաբարձր 12 միավոր Հայաստանը ներկայացնող «Yan Girls» («Յան աղջիկներ») խմբին բաշխեց Գերմանիան, Միացյալ Թագավորությունը (Անգլիան), Հյուսիսիային Մակեդոնիան, 10-ական միավոր՝ Ուկրաինան ու Վրաստանը, 3 միավոր ստացավ Իսպանիայից, 2-ական միավոր՝ Իռլանդիայից եւ Պորտուգալիայից, 8-ական միավոր՝ Էստոնիայից եւ Նիդերլանդներից, 7-ական միավոր՝ Լեհաստանից եւ Ֆրանսիայից, 6 միավոր՝ Ալբանիայից, 5 միավոր Իտալիայից:

Եվ մինչ Հայաստանը պայքարում էր առաջին կամ երկրորդ տեղի համար, միջազգային ժյուրիի թեթեւ ձեռքով՝ հայտնվեց 3-րդ տեղում: Թեպետ հայ աղջիկները երգում էին՝ «Do It My Way» («Արա իմ ձեւով»), բայց Արեւմուտքն արեց իր ձեւով, ինչպես միշտ, ոգեւորեց, հույս ներշնչեց, իսկ վերջում՝ գցեց: Հեռուստադիտողի եւ ժյուրիի քվեարկության արդյունքում «Yan Girls»-ը վաստակեց 180 միավոր եւ մի կերպ տեղավորվեց հաղթող եռյակում: Երկրորդ տեղում Իսպանիան էր: Չնայած, այսքանով հանդերձ՝ հանուն արդարության պետք է նշել, որ վերջին երեք տարում մշտապես լավագույն եռյակում է եղել Հայաստանը ու այս տարի էլ դիրքերը չզիջեց:

Հատկանշական է նաեւ, թե Հայաստանն ինչպես քվեարկեց, այս մրցույթի վերաբերյալ «Իրավունքի» հետեւողական բարձրաձայնումներն ու քննադատությունները, կարծես թե, տվեցին արդյունք: Այս անգամ գոնե Հայաստանը խուսափել էր Ադրբեջանին սատարող որեւէ երկրի ձայն տալուց, ինչպես նաեւ ձայն չէր տրվել հիմնական մրցակիցներին, որոնք կարող էին ձայներ խլել Հայաստանը ներկայացնող մասնակցից: Հայաստանը ամենաբարձր 12 միավորը տվեց Մալթային: Իհարկե, այստեղ էլ ամեն ինչ հարթ չէր, շնորհակալության փոխարեն՝ Մալթայից Հայաստանը ստացավ զրո ձայն:

Ի ԴԵՊ

Նշենք, որ «Մանկական Եվրատեսիլ»-ին մասնակցությունից հրաժարվել են մի շարք երկրներ: Այս շարքում են՝ Բելգիան, Բուլղարիան, Իսրայելը, Ղազախստանը, Կիպրոսը, Լատվիան, Լիտվան, Մոլդովան, Ռումինիան, Սան Մարինոն, Ուելսը, Շվեյցարիան, Շվեդիան: Եվ եթե այս երկրները դեռ չեն բացառում իրենց վերադարձը մրցույթին, ապա Դանիան ու Նորվեգիան առավել հստակ դիրքորոշում ունեն: Դանիայի «Մանկական Եվրատեսիլի» հեռարձակման բաժնի ղեկավար ՄԱՐԼԵՆ ԲՈԵԼԸ հայտարարել է, որ իրենց երկիրը չի վերադառնա մրցույթին, քանի որ ռադիոկայանը չի փոխել իր կարծիքն այն մասին, որ «մրցույթը հակասում է այն արժեքներին, որոնք նրանք ցանկանում են ներկայացնել իրենց հանդիսատեսին»: Իսկ Նորվեգիայի պատվիրակության ղեկավար ՍԹԻԳ ԿԱՐԼՍԵՆԸ հաստատել է, որ երկիրը ապագայում չի վերադառնա մրցույթին ֆինանսական իրավիճակի եւ մրցակցության վերաբերյալ NRK-ի դիրքորոշման պատճառով. նրանք կարծում են, որ մրցույթի ներկայիս ձեւաչափը «չափազանց կոպիտ է» երեխաների համար:

ՀՐԱՆՏ ՍԱՐԱՖՅԱՆ