«Հայաքվեի» տխրահռչակ ավարտը

ԱԺ պետաիրավական հարցերի մշտական հանձնաժողովի նիստում 3 կողմ եւ 7 դեմ ձայներով հանձնաժողովը բացասական եզրակացություն տվեց «Հայաքվեի» նախագծին: Այսպիսով`  նախագիծը չի ընդգրկվում ԱԺ լիագումար նիստերի օրակարգ։ Այն իրենից ենթադրում էր Քրեական օրենսգրքում լրացումներ կատարելու նախագիծ, համաձայն որի` ՀՀ անունից Արցախը որեւէ այլ պետության կազմում ճանաչելը, Հայոց ցեղասպանության ճանաչումից հրաժարվելը կամ դրա վտանգավորությունը նսեմացնելը պատժվում է ազատազրկմամբ՝ 10-15 տարի ժամկետով:

ԱԺ «Հայաստան» խմբակցության պատգամավոր ԱՐԾՎԻԿ ՄԻՆԱՍՅԱՆՆ առաջարկում էր Արցախին վերաբերող հոդվածում թվարկել այն կոնկրետ գործողությունները եւ անձանց շրջանակը, որոնք այդ հանցագործության հնարավոր կատարողներ կարող են լինել: Հանձնաժողովի նախագահ Վլադիմիր Վարդանյանի հորդորով` նա նույնիսկ իր առաջարկը գրավոր ներկայացրեց։ Սակայն ՔՊ-ական պատգամավոր ԱՐՈՒՍՅԱԿ ՋՈՒԼՀԱԿՅԱՆԸ հղում անելով «Հանրաքվեի մասին» օրենքին` ընդգծեց, որ եթե հիմա հետաձգում է օրենքի նախագծի քվեարկությունը, ապա այդտեղ հնարավորություն կա նախագիծն ավտոմատ մերժելու` առանց քվեարկության»: Այդուհանդերձ, հանձնաժողովը քվեարկեց եւ մերժեց նաեւ Արծվիկ Մինասյանի առաջարկը:

ՔՊ-ական պատգամավոր ՎԼԱԴԻՄԻՐ ՎԱՐԴԱՆՅԱՆՆ էլ հայտարարեց, որ հնարավոր չէ նախագծի քննարկումը հետաձգել, եթե հիմնական զեկուցողի կողմից չկա լրամշակման վերաբերյալ առաջարկ, որը կընդունվի հանձնաժողովի կողմից:

«Միակ տարբերակը, որը հիմա կարող եք անել` պարզապես, նախագիծը հիմա դնելն է քվեարկության, եթե, իհարկե, հեղինակը հետ չի կանչում նախագիծը։ Քննարկումը սկսվել է, պետք է ավարտվի քվեարկությամբ»,- շեշտեց Վլադիմիր Վարդանյանը, եւ քվեարկությամբ ազդարարվեց «Հայաքվեի» տխրահչռակ ավարտը:

ՀՐԱՆՏ ՍԱՐԱՖՅԱՆ