Ապազգային հերթական հարվածը. Արա Զոհրաբյանն ահազանգում է

Ներքաղաքական 9 Ապրիլ, 2024 0:08

«Այս իշխանությունն իր ապազգային հարվածներից հերթական հարվածն է հասցնելու: Վերջապես կատարելու է իր երազանքը՝ «զուգընկեր» հասկացությունը ներմուծելու է Ընտանիքում բռնության կանխարգելման … օրենք: Այսօր ԱԺ գլխադասային հանձնաժողովը հավանություն է տվել նշված օրենքում փոփոխություն կատարելու մասին օրենքի նախագծին, որը ներկայացվել է երկրորդ ընթերցման:

Նախագծի համաձայն՝ «զուգընկեր՝ անձ, որի հետ առկա են հարաբերություններ, որոնց հատուկ է սիրային կապը՝ անկախ համատեղ բնակության կամ միմյանց հետ սեռական հարաբերություններ ունենալու հանգամանքից»: Այս բազմիմաստ հասկացության իրական նպատակն է «զուգընկեր» հասկացության ներքո ներառել նույնասեռ անձանց եւ, ըստ էության, նրանց միությունը հավասարեցնել ընտանիք հասկացությանը:

Գործող օրենքի մեջ առանց ՔԿԱԳ (ԶԱԳՍԻ) գրանցման ամուսինների հարցը վաղուց լուծված է. նրանց կարգավիճակը հավասարեցված է գրանցված ամուսինների կարգավիճակին, հետևաբար այս «զուգընկեր» հասկացության ներմուծումն այլ նպատակ ունի:

Ազգի շահերի հետ կապ չունեցող վայ իշխանություն, ինչ պիղծ օրենքներ էլ ընդունեք, դրանք վերացվելու են: Ձեր գործողություններից էլ է երեւում, որ երկրի անվտանգային կարեւոր հարցերը թողած՝ ընկել եք ապազգային բաների հետեւից: Պղծությունը, կռապաշտությունը, հակաբարոյական կենսակերպն են մեր հայրենիքի գլխին եկած պատուհասների հիմնական պատճառները: Երբ, որ պետական իշխանության երկու ոտքերը՝ արդարությունը եւ իրավունքը ծռվում են, ապա պետությունը ծնկում է: Պատրաստ եղեք», - գրել է «Զարթոնք» կուսակցության նախագահ, 2013-2021 թթ. Հայաստանի փաստաբանների պալատի նախագահ, Փաստաբանական ակադեմիայի ռեկտոր ԱՐԱ ԶՈՀՐԱԲՅԱՆԸ: