Յոթ օր հանգստանալու համար նվազագույն աշխատավարձ ստացող քաղաղաքացին պետք է ամբողջ տարվա աշխատավարձը տրամադրի հանգստին

Հայ եւ օտարազգի զբոսաշրջիկները շարունակում են դժգոհել, որ վերջին տարիներին հանգիստը Հայաստանում շատ թանկ արժե:«Հայաստանում  ամառային հանգիստն  անցկացնելը բավականին թանկ հաճույք է, առավելեւս, որ այդ հաճույքն էլ լիակատար չէ՝ հաշվի առնելով ծովի բացակայությունն ու մեր հանգստյան օբյեկտների սպասարկման ոչ նախանձելի որակը: Այդ պատճառով էլ բազմաթիվ ընտանիքներ գերադասում են իրենց  հանգիստն անցկացնել  Վրաստանում, Եգիպտոսում, Թուրքիայում, Արաբական Միացյալ Էմիրություններում եւ անգամ  Բուլղարիայում, քանի որ այնտեղ գներն ավելի մատչելի են: Ես երկու անգամ եմ եղել Հայաստանում: Առաջին անգամ ' 12 տարի առաջ, երկրորդ անգամ ' 3 տարի առաջ: Կինս հայ է, եւ ես մեծ հետաքրքրությամբ եմ այցելում Հայաստան: Պետք է ասեմ, որ վերջին տարիների ընթացքում բազմաթիվ փոփոխություններ են տեղի ունեցել: Ինչ վերաբերում է այստեղ հանգստանալու գներին, ասեմ, որ 10 օրից ավելի չարժե մնալ այստեղ, ուտելիքը եւ հյուրանոցն ավելի թանկ է , քան Եվրոպայում»,-մեզ հետ զրույցում ասաց վրացի զբոսաշրջիկը, հավելելով․

-Զբոսաշրջիկը Հայաստանում յոթ օր հանգստանալու համար ծախսում է մոտավորապես 1500-2000 ԱՄՆ դոլար: Այս գումարի մեջ ներառված է ճանապարհածախսը, հյուրանոցային ծառայությունները, սնունդը եւ տուրիստական ուղեւորությունները: 

Սա զբոսաշրջիկների մասով, իսկ Հայաստանում մեկօրյա քիչ թե շատ արժանավայել  հանգստի  համար նվազագույն աշխատավարձ ստացող քաղաքացին պետք է իր մեկ ամսվա աշխատավարձը ծախսի:  Եվ եթե նվազագույն աշխատավարձին համարժեք եկամուտ ունեցող ՀՀ քաղաքացին, ով, ի դեպ, ՀՀ քաղաքացիների զգալի մասն է կազմում, ցանկանա տարվա մեջ թեկուզ 12 օրով իր ամառային հանգիստն անցկացնել Հայաստանում, ապա նա իր մեկ տարվա ամբողջ աշխատավարձը պետք է  տրամադրի:

Քանզի Հանգիստդ Հայաստանում անցկացնելու համար պետք է պատրաստ լինես 7 օրվա համար վճարել մոտ 240-320 հզր դրամ: Հյուրանոցներում մեկ գիշեր անցկացնելու համար գներն սկսվում են նվազագույնը 36 հզր դրամից, եւ լավագույն դեպքում այդ փաթեթի մեջ կարող է ներառված լինել նախաճաշը:  

Տուրիստական ընկերության աշխատակիցները ՀՀ-ում հայերի հանգիստը չկազմակերպելը բացատրում են նաեւ մեկ այլ հանգամանքով.«Մեր հարեւան, բայց ոչ բարեկամ երկիրը իր զորքերը մտցրել է Հայաստանի սուվերեն տարածք և մարդիկ վախենում են այցելել արդեն սահմանամերձ դարձած մարզեր։ Պիտի ասեմ, որ 2020 թվականից հետո կտրուկ նվազել են Ջերմուկ, Տաթև, Խնձորեսկ այցելությունները։ Մարդիկ հիմա նույնիսկ Երասխի հատվածից են խուսափում, իսկ դեպի Հայաստանի հարավ ճանապարհն անցնում է Երասխով և անհնար է խուսափել այդ հատվածից։ Անկախ այն հանգամանքից այդ պահին այդ հատվածը անվտանգ է, թե ոչ մարդիկ խուսափում են»: