«Իրավունքի» ահազանգը կանխեց հերթական խայտառակությունը

«Իրավունքն» ահազանգել էր, որ այս շաբաթվա վերջին օրերին Երեւանում իր ադրբեջանամետ մտքերով հայտնի բլոգեր ԱՐՍԵՆ ՄԱՐԿԱՐՅԱՆԸ, որը նաեւ ձեռնարկատեր է, մարզիչ, տղամարդկանց ինչ-որ մասշտաբային խմբի հիմնադիր եւ «Baza» փակ տելեգրամյան ալիքի հեղինակ, տնտեսագետ-վերլուծաբան Դմիտրի Պոտապենկոյի հետ անցկացնելու է հանդիպում՝ բիզնեսմենների համար:

Թե արդյոք նա հայաստանյան բիզմեսմեններին պատրաստվում էր սովորեցնել, թե ինչպես հոգին վաճառել թշնամուն, համենայնդեպս, այս մասին միայն կարելի էր ենթադրել: Իսկ պաշտոնական հաղորդագրության մեջ ասված էր, որ խոստանում են հանդիպման արդյունքում ավելացնել բիզնեսմենների եկամուտը, գտնել արտասովոր լուծում իրենց բիզնեսի համար: Առաջին օրը կայանալիք հանդիպումը պետք է կրեր «Ո՞ւր ենք գնում, ինչպե՞ս է համաշխարհային շուկան ազդում մեր գրպանի վրա» խորագիրը, իսկ երկրորդ օրն անդրադառնալու էին «Կայուն բիզնեսն անկայուն աշխարհում»: Ընդ որում՝ ներկաները հանդիպման համար պետք է վճարեին 25 հազար դրամ, եթե ցանկանում էին երկու օրերի հանդիպմանը ներկա լինել՝ 40 հազար դրամ: Իսկ VIP տոմսերն արժեն մեկ օրվա համար 50 հազար դրամ էր, երկու օրվա համար՝ 75 հազար դրամ: Ու սարսափելին այն էր, որ նրանց այս միջոցառումն անցկացնելու համար իր դռները լայն բացել էր «Մարիոթ» հյուրանոցը:

Հայտնի բլոգեր ՆԻՆԱ ՏԻՏԱՆՅԱՆԸ սոցցանցում հիշեցրել էր, որ Արսեն Մարկարյանը ժամանակին հայտարարում էր, թե՝ «Հայաստանը շուտով մտնելու է Ադրբեջանի կազմի մեջ»: Բլոգերը հարց էր բարձրացրել. «Ինչի պետք ա անպատիժ ինքը մեր երկրի մասին խոսա ու սենց առանց ոչ մի խնդրի ֆորում կազմակերպվի ու մարդիկ 25 հազար դրամ տան, գնան: Նախ կարծում եմ՝ ինքը հենց մտնի Հայաստան, պետք ա իրան մի հատ ԱԱԾ-ն հետախուզի, տենա` ինչ բաներ ա խոսում Հայաստանի մասին»:

Նինա Տիտանյանը հույս էր հայտնել, որ «Մարիոթը» տեղյակ չի եղել Արսեն Մարկարյանն ով է, եւ որ կվերանայեն ու կչեղարկեն միջոցառումը:

Բլոգեր ԶԱՌԱ ՂԱԶԱՐՅԱՆԸ եւս անդրադարձել էր Արսեն Մարկարյանի երեւանյան այցին. «Ծանոթացեք, թե ում եք շուտով հյուրընկալելու Հայաստանում: Արսենն ուղիղ տեքստով կանանց բռնաբարելու «անհրաժեշտության» «կարեւորության» մասին տեսանյութ ունի, անչափահասի հետ սեռական կապի մասին է խոսել, հետո ընդունել է, որ խոսել է (ուղղակի որովհետեւ վիդեոն տարածվել էր), ասել է, որ «կատակ ա եղել»… Վիդեոյից ինքներդ կհասկանաք՝ ինչն է կատակ, ինչը՝ ոչ»:

Զառա Ղազարյանը Հայաստանում միջոցառումների տոմսերի վաճառքով զբաղվող Tkt.am-ին հարց է ուղղել. «Իսկ բանախոսի կենսագրության եւ աշխարհայացքի հետ օ՞ք եք»:

Եվ ահա արդարացի բողոքի ձայնը տվեց իր արդյունքը, իհարկե, կազմակերպիչներն իրողությունը փաթեթավորեցին այլ հիմնավորմամբ:

«Վերջին երեք օրերին մեր միջոցառման բանախոսներից Արսեն Մարկարյանի դեմ ակցիա էր կազմակերպվել։ Մենք հարյուրավոր սպառնալիքներ ենք ստացել, այդ թվում՝ ֆիզիկական բռնության կոչեր, դրանք ուղղված են եղել ե՛ւ հանդիպման կազմակերպիչներին, ե՛ւ Արսենին։ Այսօր իրավասու աղբյուրներից տեղեկություններ ենք ստացել, որ նույնիսկ սադրանքներ են նախապատրաստվում: Այս իրավիճակում մենք որոշեցինք չեղարկել Արսենի ելույթը եւ նրա այցը Հայաստանի Հանրապետություն։ Չնայած բոլոր դժվարություններին, հանդիպումը կկայանա, որի հիմնական բանախոսը կլինի X5 բիզնես խմբի հիմնադիր Դմիտրի Պոտապենկոն», - այս մասին հայտարարել է վերոնշյալ հանդիպման կազմակերպիչ Business lecture evn-ի ինստագրամյան պաշտոնական էջը:

ՀՐԱՆՏ ՍԱՐԱՖՅԱՆ