Նանան ոչ միայն երգում է, այլեւ... (Տեսանյութ)

Ինչպես հոլիվուդյան ֆիլմերում հաճախ ֆիլմի հերոսին կամ հերոսուհուն փոխարինում է կասկադյորը` դժվար ու վտանգավոր հնարքներ կատարելու համար, պարզվում է` նույնը կարող է լինել նաեւ շոուբիզնեսյան տեսահոլովակներում: Սակայն, այս դեպքում կասկադյորը ոչ թե վտանգաշատ գործողություններ է կատարում, այլ, օրինակ, կարող է պարել երգչի կամ երգչուհու փոխարեն, մինչդեռ տեսահոլովակում հանրությունը կտեսնի, որ իբր պարում է նույն ինքը` իր սիրելի երգիչը կամ երգչուհին: Հենց այս տրամաբանությամբ էլ երկար ժամանակ սոցցանցերում քննարկվում էր, թե երգչուհի ՆԱՆԱՆ, ով հաճախ հայտնվում է սկանդալների կիզակետում, իր տեսահոլովակներում ոչ թե ինքն է պարում, այլ այսպես ասած, Նանայի դերակատարը: Բամբասանքի մակարդակի չիջնելով` «Իրավունքը» փորձեց պարզել, թե ինչպիսի՞ հնարք է գործադրում իր տեսահոլովակներում հանրության կողմից ամենաքննարկված երգչուհիներից մեկը: Արի ու տես, որ փաստերն ավելի աղաղակող էին, քան Նանային քարկոծողների դիտարկումները:

Իրականում Նանան բավական երկար ժամանակ է անցկացնում պարապմունքների վրա եւ այս մասին խոսում է ոչ միայն ստորեւ տեղադրված տեսանյութը, այլեւ մեզ հետ զրույցում փաստեց նաեւ երգչուհու պարուսույցը` հեռուստանախագծերից, տարբեր տեսահոլովակներից ու գովազդային վահանակներից հայտնի պարող ՆԱՐԵԿ ՄԱՐՏԻՐՈՍՅԱՆԸ.

- Ասեմ, որ ինձ էլ անընդհատ հարցնում են` իրո՞ք Նանան է պարում տեսահոլովակներում, թե` ուրիշ մարդ: Կարող եմ ասել, որ այսպիսի արձագանքներն ինձ նույնիսկ ուրախացնում են, որովհետեւ սա նշանակում է, որ նա այնքանով է արդարացրել սպասելիքները, որ նույնիսկ շատերը չեն հատավում, թե կարող է երգչուհին այդպես պարել:

- Որքանո՞վ է հեշտ կամ դժվար Նանայի հետ աշխատել պարահրապարակում:

- Նանան բացի նրանից, որ շատ լավ երգչուհի է, նաեւ շատ լավ ընկեր է ու իր հետ ցանկացած աշխատանք անցնում է ընկերական միջավայրում ու կատակների ներքո: Պետք է ընդգծեմ, որ նա ընդունակ երգչուհի է, ավելին` շատ ընդունակ: Ուղղակի, հոգնելուց հետո մի քիչ ծուլանում է: (ժպտում է Ն.Մ.-ն, - հեղինակ)

- Երգարվեստում Նանայի հաջողությունների մասին բոլորս գիտենք, իսկ որքանո՞վ է նա հաջողակ պարարվեստում:

- Ցանկացած ասպարեզում կարեւորը  ցանկությունն է ու գործադրված ջանքերը:  Իսկ Նանան շատ աշխատասեր է, նույնիսկ երբ զգում եմ, որ նրա ծանրաբեռնվածությունը շատ է եւ ասում եմ` մի երկու օր, մի արի եւ հանգստացի, պնդում է, թե ավելի լավ է պարապենք: Բայց դե ես զգում եմ, որ մեկ-մեկ նրան հանգիստ է պետք:

- Ընդհանրապես ի՞նչ կասեք մերօրյա երգչուհիների պարային հմտությունների մասին: Կարողանո՞ւմ են նրանք իրենց տեսահոլովակներում հավասարվել այնպիսի երգչուհիների, ինչպիսիք Շակիրան է, Բիոնսեն,  Լոպեսը կամ Սփիրսը:

- Չգիտեմ ինչքանով ում մոտ կստացվի, բայց մեր երգչուհիները այսօր մեծ ջանքեր են գործադրում, որպեսզի իրենք իրենց տեսահոլովակներում կարողանան ե՛ւ երգել, ե՛ւ պարել: Շատ ուրախ եմ, որ ունենք այսօր այնպիսի օպերատորական եւ ռեժիսորական կազմ, որոնց շնորհիվ մեր տեսահոլովակները չեն զիջում արտասահմանյաններին: Նույնիսկ կարող եմ ասել, որ արտերկրից ժամանում են, որպեսզի Հայաստանում նկարահանեն տեսահոլովակներ, որովհետեւ այստեղ որակը շատ լավն է եւ համեմատած արտերկրի հետ` գներն էլ մատչելի:

- Հաճա՞խ են Ձեզ մոտ պարային հմտություններ ձեռք բերում մեր երգիչ-երգչուհիները, թե՞ Նանան բացառություն է:

- Իմ աշխատանքը երգիչ-երգչուհիների հետ եղել է տեսահոլովակների հետ կապված: Անձամբ ինքս հիմա ժամանակի եւ գործնականի բերումով չունեմ խմբեր, որտեղ կարող են պարապել: Շատերն են ամեն օր գրում, զանգում, ցանկանում, որպեսզի գան պարապելու ինձ մոտ, բայց չզլանալով` նրանց ուղարկում եմ իմ լավ ընկերների մոտ, որովհետեւ հիմա ազատ ժամեր շատ քիչ ունեմ:

Իսկ թե ինչպե՞ս է անցնում Նանայի պարապմունքները Նարեկ Մարտիրոսյանի մոտ, դիտե՛ք տեսանյութում.

ՀՐԱՆՏ ՍԱՐԱՖՅԱՆ