2 տարվա հետագիծ Ապրիլյան քառօրյա պատերազմից

2016 թվականի ապրիլի ապրիլի 2-ը սկսվեց բոթաբեր լուրով։ Ապրիլի 1-ի լույս 2-ի գիշերն Արցախի ՊԲ և Ադրբեջանի զինված ուժերի միջև, արցախա-ադրբեջանական շփման գծի ողջ երկայնքով տեղի ունեցան լայնամասշտաբ ռազմական գործողություններ։

Այն տևեց 4 օր, այդ պատճառով էլ ստացավ «քառօրյա պատերազմ» անունը:

Քառօրյա պատերազմի կամ Ապրիլյան քառօրյայի հենց առաջին օրը եղան մեծ կորուստներ՝ այդ թվում նաև տուժեց խաղաղ ազգաբնակչությունը։ 

Ապրիլի 2-ի արդեն կեսօրին ՀՀ պաշտպանության նախարարությունը հայտնեց, որ Արցախի Լևոնարխ գյուղի մոտակայքում ոչնչացվել է ադրբեջանական դիվերսիոն-հետախուզական ջոկատը, և ադրբեջանական կողմը ևս կորուստներ ունի։

Սահմանը պահող հայ զինվորներին շտապեցին օգնության բազմաթիվ կամավորներ։ Ցավոք, ճանապարհին, դեռ սահման չհասած, հակառակորդի կողմից ռմբակոծվեցին կամավորներին զորամաս տանող մեքենաներ։

Ապրիլի 3-ին՝ ժամը 06։00-ից սկսած, առաջնային գծի հարավային ուղղությամբ Ադրբեջանի զինված ուժերը հրթիռահրետանային միջոցների և զրահատեխնիկայի կիրառմամբ շարունակել են ագրեսիվ ռազմական գործողությունները։

Ադրբեջանական կողմն ապրիլի 3-ին հայտարարություն է տարածել, որ միակողմանի դադարեցնում է կրակը, սակայն շարունակել է մարտական գործողությունները և Մարտակերտի խաղաղ բնակիչների հրետակոծումը։

Արցախի Պաշտպանության բանակը հայտնել է, որ հայկական ստորաբաժանումները հայկական Թալիշ գյուղի ուղղությամբ հետ են վերցրել նախորդ օրը կորցրած կարևոր հենակետերից մեկը։ Ռազմաճակատի հարավային մասում ոչնչացրել են ադրբեջանական զինված ուժերի երկու տանկ և հետևակի մարտական մեկ մեքենա։

Ապրիլի 3-ի լույս 4-ի գիշերը շփման գծի ողջ երկայնքով ադրբեջանական կողմը ականանետներով ու հրանոթներով շարունակել է արկակոծել հայկական զինված ուժերի առաջնային դիրքերն ու մերձակա հայկական բնակավայրերը։

Առավոտյան ժամը 07։00-ի սահմաններում առավել ինտենսիվ հրետակոծություններ են սկսվել շփման գոտու հարավարևելյան և հյուսիսարևելյան ուղղություններով։
Ադրբեջանական զինուժը կիրառել է ծանր տեխնիկա, այդ թվում նաև ՀԿՌՀ հրանետներ և մարտական անօդաչու թռչող սարքեր, որոնցից շատերը խոցվել են հայկական զինված ուժերի կողմից։

Ապրիլի 4-ի լույս 5-ի գիշերը առաջնային գծի հարավային ուղղությամբ Ադրբեջանի զինված ուժերը կիրառել են «Սմերչ» համազարկային կրակի ռեակտիվ համակարգ։ Ժամը 12․00-ին հաստատվել է հրադադար, դադարեցվել են ռազմական գործողությունները։ Հրադադարը պահպանվեց միան ապրիլի 5-ի լույս 6-ի գիշերը, իսկ հետո ադրբեջանական կողմն անընդհատ խախտում էր հրադադարի պայմանավորվածությունը։

Հայկական կողմն ապրիլյան մարտերի հետևանքով կորցրել է 800 հա տարածք: Համաձայն ադրբեջանական լրատվամիջոցների հրապարակումների՝ հայկական կողմի տարածքային կորուստները կազմում են ավելի քան 2000 հա։

Պաշտոնական թվերով՝ հայկական կողմը տվել է ավելի քան 100 զոհ, թեև ադրբեջանական կողմը պնդում է, որ զոհերի թիվը անցել է 300-ից՝ վիրավորներինը՝ 500-ից։