Շուտով «Համահայկական ճակատը» կներկայացնի Հայաստանի վերականգնման եւ զարգացման ծրագիր

 

Կից ներկայացված է շարժման նպատակներին եւ խնդիրներին վերաբերող ամփոփագիր.

 

 

Շարժման հիմնական նպատակները ուղղված են պետության եւ պետականության պահպանմանն ու զարգացմանը, արտաքին եւ ներքին անվտանգության ամրապնդմանը, ազգային միասնության ապահովմանը, ինչպես նաեւ՝ տարածաշրջանային պետական, քաղաքական, ազգային, կրոնական եւ այլ հարաբերությունների ու խնդիրների վերաբերյալ համակողմանի եւ հավասարակշռված նկատառումների ու վերաբերմունքի դրսեւորմանն ու արտահայտմանը, պետական իշխանության կառավարման ապիկարության, դիվանագիտական մտքի իսպառ բացակայության, Հայկական սփյուռքի, հարեւան եւ այլ պետությունների հետ բարիդրացիական, դաշնակցային, փոխշահավետ համագործակցության եւ իրավահավասար, գործընկերային հարաբերությունների զարգացման ձախողման պայմաններում արտագաղթի, պատերազմական, ցեղասպանական ու էթնիկ զտման գործողությունների եւ ազգային պետականության կորստյան վտանգի սկզբնավորմամբ առաջացող՝ հայ հասարակության ճգնաժամային հոգեվիճակի հաղթահարմանը։

 

 

ա. պետական և ազգային գաղափարներով ու շահերով, հայկական ազգային արժեքներով եւ ավանդույթներով առաջնորդվող հայրենասիրական ուժերի համախմբումը Հայաստանում եւ Հայկական սփյուռքում՝ ի շահ Հայկական պետության եւ պետականության,

 

բ․ պայքարը Հայաստանի Հանրապետության պետական և ազգային կենսական կարևոր շահերի անտեսման և ոտնահարման, ուրացման, դավաճանման իշխանական գործողությունների դեմ․

 

գ․ արտաքին մարտահրավերներին ու վտանգներին հակազդեցությունը եւ դրանց չեզոքացումը, զինված հարձակման եւ ընդհարման դեպքերում պետության դիմակայության ապահովումը եւ նրա շահերի հուսալի պաշտպանումը․

 

դ. Հայաստանի Հանրապետության ռազմատնտեսական ապահովման եւ աստիճանական զարգացման, ինչպես նաեւ՝ արդիական սպառազինությամբ մարտունակ բանակի կայացման համար նախադյալների, հիմքերի եւ պայմանների ստեղծումը․

 

ե. Հայաստանի Հանրապետության անվտանգության, ինքնիշխանության և տարածքային ամբողջականության ապահովումը եւ որպես իրավական, ժողովրդավարական, սոցիալական պետություն՝ նրա ամրապնդումը․

 

զ․ ՄԱԿ-ի անդամ հարեւան պետությունների հետ խաղաղ գոյակցության եւ կայուն զարգացման համար պայմանների ստեղծումը, իր հայրենիքում հայ ժողովրդի և Լեռնային Ղարաբաղի հայության անվտանգ, ապահով եւ բարեկեցիկ ապրելու իրավունքի եւ պատմական արդարության վերականգնման համար նախադրյալների, հիմքերի և պայմանների ստեղծումը, ինչպես նաեւ՝ Լեռնային Ղարաբաղի հայության ինքնորոշման իրավունքի նորովի միջազգայնացումը՝ ՄԱԿ-ի կանոնադրության հիմնադրույթներին, միջազգային կոնվենցիաներին եւ միջազգային իրավունքի նորմերին համապատասխան, ՄԱԿ-ի իբրեւ միջազգային հարաբերությունները կանոնակարգող և համակարգող հիմնական կազմակերպության բարձր հովանու ներքո, պետությունների միջև իրավահավասար եւ գործընկերային հարաբերությունների հիման վրա։

 

է. պետական իշխանության եւ հայ հասարակության միջեւ համերաշխության եւ միասնականության վերականգնման, ազգային ինքնության եւ ազգային միասնության պահպանման, պետական-ազգային գաղափարների իրականացման, հանրային համերաշխության եւ ինքնաճանաչողության պայմանների ստեղծման, Հայկական պետության զարգացման համար հայկական քաղաքակրթության դերակատարության եւ կարեւորության համազգային հավաքական գիտակցության ձևավորումը․

 

ը․ ազգային կրթական, ուսումնական հաստատություններում հայկական ազգային գաղափարներով տոգորված եւ հայկական ազգային մշակութային եւ բարոյական արժեքներին դավանող հայրենասեր երիտասարդ սերնդի կրթության ու դաստիարակության (ներառյալ՝ ռազմահայրենասիրական կրթության եւ դաստիարակության) համար նախադրյալների, հիմքերի և պայմանների ստեղծումը․

 

թ․ Հայաստանի Հանրապետության իշխանության հակասահմանադրական օրենքների և պայմանագրերի (ներառյալ՝ միջազգային), ապօրինի որոշումների անվավեր և ուժը կորցրած ճանաչումը․

 

ժ․ ընկալելի, հստակ եւ թափանցիկ ազգային հայեցակարգի եւ ազգային անվտանգության ռազմավարության մշակումը, որը կներառի հայկական ազգային գաղափարները, արժեքները եւ շահերը, անվտանգային համակարգը, արտաքին եւ ներքին մարտահրավերները, վտանգները եւ դրանց գնահատումը, պետության դիրքորոշումը։

 

Ի․ Հայոց ցեղասպանության միջազգային ճանաչման գործընթացը արտաքին քաղաքականության առաջնահերթություն հռչակելը, որպես պատմական արդարության վերականգնման եւ հարեւանների հետ խաղաղ գոյակցության կարևորագույն նախադրյալ։

 

 

ա. Հայկական պետականության եւ անկախության ամրապնդումն ու զարգացումը, պետական-ազգային գաղափարներով եւ շահերով, հայկական ազգային արժեքներով եւ ավանդույթներով առաջնորդվող հայրենասիրական ուժերի համախմբումը Հայաստանում եւ Հայկական Սփյուռքում՝ ի շահ Հայկական պետության եւ պետականության,

 

բ. Հայաստանի Հանրապետությունում բարեկեցության, ազատության, արդարության, արժանապատվության ապահովումը, Հայաստանի Հանրապետության քաղաքացիների իրավունքների եւ հանրային չափորոշիչների միջեւ ներդաշնության հաստատումը.

 

գ․ պետական եւ ազգային կենսական կարեւոր շահերի անտեսումը եւ ոտնահարումը, ուրացումը եւ դավաճանումը բացառելու նպատակով՝ Հայաստանի Հանրապետության Սահմանադրության եւ պետա-իրավական համակարգի բարեփոխումը եւ կատարելագործումը, պետության իրավական, տնտեսական, տեղեկատվական, ռազմական, էներգետիկ, հանրային եւ մշակութային անվտանգության համար արդյունավետ միջոցների ներդրումը եւ կիրառումը.

 

դ․ Հայաստանի Հանրապետության և Հայկական սփյուռքի համայնքների միջեւ կապերի ամրապնդումը եւ զարգացումը, Հայկական սփյուռքի համախմբումը եւ Սփյուռքում ապրող մեր հայրենակիցների օրինական իրավունքների եւ շահերի պաշտպանությունը․

 

ե․ պետության ինքնաբավության ապահովման նպատակով՝ տնտեսության պետական եւ մասնավոր հատվածներում խելամիտ բարեփոխումների իրականացումը եւ զարգացումը, գիտատեխնիկական առաջընթացի եւ տեխնոլոգիական արդիականացման ապահովումը տնտեսության բոլոր հիմնարար ճյուղերում․

 

զ. Հայաստանի Հանրապետության դիրքի եւ դիրքորոշման ամրապնդումը՝ իբրեւ միջազգային իրավունքի սուբյեկտ։ Փոխշահավետության եւ իրավահավասարության հիման վրա օտարերկրյա պետությունների, միջպետական միավորումների, միջազգային կազմակերպությունների հետ երկկողմանի եւ բազմակողմանի գործընկերային հարաբերությունների զարգացումը, կանխատեսելի, ընկալելի, բազմակողմ, գործնական արտաքին քաղաքականության վարումը միջազգային իրավունքի, պետական-ազգային անկախության ու ինքնիշխանության, շահերի եւ սկզբունքների փոխադարձ հարգանքի հիման վրա․

 

է. վերադարձ դեպի համաշխարհային քաղաքակրթության բաղկացուցիչ եւ անկապտելի մաս հանդիսացող հայկական քաղաքակրթության նյութական եւ ոչ նյութական ժառանգությանը, մշակութային եւ բարոյական արժեքներին, հայկական ընտանիքին, Հայոց պատմությանը, մշակույթին եւ արվեստին, լեզվին եւ գրականությանը, հայրենագիտությանը, Հայոց եկեղեցու դավանությանն ու սրբազան ավանդություններին, ինչպես նաեւ՝ երիտասարդ սերնդի կրթության եւ դաստիարակության միջոցով դրանց պահպանմանը, տարածմանը եւ հանրահռչակմանը․

 

ը․ համաշխարհային մշակութային, կրթական եւ գիտական տարածքում Հայաստանի Հանրապետության դերակատարության ամրապնդումը, փոխադարձ հետաքրքրություն ներկայացնող տարբեր քաղաքակրթությունների եւ մշակույթների փոխճանաչման եւ փոխհարստացման համար միջազգային կառուցողական երկխոսության եւ գործընկերության զարգացման համար նախադրյալների եւ պայմանների ստեղծումը:

 

 

1․ Ժողովրդի միասնությունը․

2․ պատմական հիշողությունը եւ ազգային ավանդույթները․

3․ տնտեսությունը․

4․անվտանգությունը՝ տնտեսական, ռազմական, էներգետիկ, մշակութային եւ այլն․

5․ հանրային /սոցիալական/ արդարությունը․

6․ արտաքին անկախ քաղաքականությունը