«13-5 ՀԱՇՎՈՎ ՀԱՂԹԵՑԻ ԹՈՒՐՔ ՀԱԿԱՌԱԿՈՐԴԻՍ, ՈՎ ԵՎՐՈՊԱՅԻ ԳՈՐԾՈՂ ՉԵՄՊԻՈՆՆ ԷՐ». Հ ԸՄԲՇԱՄԱՐՏԻ ԵՎՐՈՊԱՅԻ ԲՐՈՆԶԵ ՄԵԴԱԼԱԿԻՐ ՄԱՆՎԵԼ ԽԱՉԱՏՐՅԱՆ
ՍպորտIravunk. com -ի մարզական թղթակիցը, Գյումրիում հանդիպել ու բացառիկ զրույց է ունեցել Ռումինիայի մայրաքաղաք Բուխարեստում կայացած Հունահռոմեական ոճի ըմբշամարտի Եվրոպայի մեծահասակների առաջնությունում առաջին անգամ մասնակցած և բրոնզե մեդալ նվաճած, ծնունդով Շիրակի մարզի Ախուրյան համայնքից, 20-ամյա ՄԱՆՎԵԼ ԽԱՉԱՏՐՅԱՆԻ հետ։
- Ողջույն, Մանվել ։Սա քո առաջին մասնակցությունն էր մեծահասակների կազմում և նման լուրջ մրցաշարի։
- Հանդես եկա 55 կգ քաշային կարգում։ Ընդհանուր երեք գոտեմարտ ունեցա ։Մեկնարկային գոտեմարտում 13-5 հաշվով հաղթեցի ազգությամբ թուրք հակառակորդիս, որը Եվրոպայի մեծահասակների գործող չեմպիոնն էր։ Կիսաեզրափակչում, ափսոս պարտվեցի Մոլդովայի ներկայացուցչին, նա երիտասարդների Աշխարհի ու Եվրոպայի չեմպիոնն էր։ Իսկ ահա եզրափակչում բրոնզե մեդալի համար պայքար մղեցի բուլղարացի ըմբիշի Ստեֆան Գրիգորովի դեմ ու ինձ հաջողվեց հաղթել նրան վաղաժամ, բացարձակ առավելությամբ 8։0 հաշվով։ Թուրք մրցակցիս հետ գոտեմարտը ավելի դժվար անցավ։ Բնական է, երբ իմանում ես, որ մրցակիցդ մեր երկրի համար թշնամի երկրից է, լարվածություն է առաջանում գոտեմարտի ժամանակ, առավել ևս, որ նա բավականին փորձառու մարզիկ էր։
- Ինչ տվեց քեզ այս նվաճումը։
- Այս բրոնզե մեդալը ինձ մեծ փորձ տվեց, քանի որ առաջին անգամ էի մասնակցում մեծահասակների կազմում, սա իմ դեբյուտն էր, ու ես գոհ եմ իմ ցուցաբերած արդյունքից։ Աշնանը հոկտեմբեր ամսին Աշխարհի առաջնությունը կկայանա Ալբանիայում, պիտի ջանք չխնայեմ, որպեսզի հասնեմ ոսկե մեդալի։
- Մանվել, որ տարիքից ես սկսել սպորտով զբաղվել։
- 4 տարեկանից եմ սկսել պարապել, անձնական մարզիչս հայրս է Էդգար Խաչատրյանը, հենց նրանից էլ ոգեշնչվել եմ ու պարապել այս մարզաձևով ու հիմա առանց ըմբշամարտի չեմ կարող ապրել, չեմ կարող պատկերացնել իմ առօրյան։
- Հետաքրքիր է, կա որևէ անվանի մարզիկ, որից ոգեշնչվում ես։
- Իհարկե, մեր գյումրեցի լեգենդար մարզիկն է Արթուր Ալեքսանյանը։ Նրա հետ մասնակցել եմ պարապմունքների, ուսումնամարզական հավաքների, այս մրցաշարին էլ նա մասնակցեց ու հաղթեց, իսկապես շատ մեծ բան է, ու մենք գիտակցում ենք, թե ինչպիսի անվանի մարզիկի կողքին ենք պարապում, դա ամեն մեկին չի վիճակված։ Իմ ամենամեծ երազանքը Օլիմպիական չեմպիոն դառնալն է, բայց մինչ այդ, դեռ շատ հաղթանակներ պիտի գրանցեմ։
Իսկ ահա Մանվելի անձնական մարզիչը ԷԴԳԱՐ ԽԱՉԱՏՐՅԱՆԸ, ով նրա հայրն է, ավելացրեց. «Մանվելը Եվրոպայի գործող չեմպիոնի թուրք մրցակցի հետ էր մրցում ու կարողացավ հաղթել նրան։ 2023 թվականին, Մանվելը այդ թուրք մարզիկին պարտվել էր Աշխարհի առաջնության ժամանակ, մրցավարների անարդարությամբ։ Միանշանակ, Մանվելը արդարացրեց իմ հույսերը, նա շատ մոտ էր չեմպիոն լինելուն, ափսոս այդպես ստացվեց, երևի փորձի պակասը խանգարեց։ Մինչև այս առաջնությունը նա ոտքի վնասվածք, կոտրվածք ուներ, ապաքինվել էր, սակայն դա ևս խանգարեց»։
Պատրաստեց ՀՈՎՀԱՆՆԵՍ ՍԱՐԳՍՅԱՆԸ