«ՄՈՌԱՆՈՒՄ ԵՆ, ՈՐ ԱՅԴ ՀԱՇՄԱՆԴԱՄ ՏՂԱՆԵՐԻ ՇՆՈՐՀԻՎ Է, ՈՐ ԻՐԵՆՑ ՓԱՓՈՒԿ ԱԹՈՌՆԵՐԻՆ ԵՆ ԲԱԶՄԵԼ»
Արխիվ 16-20Նախորդ շաբաթ ԵՊԲՀ ռեկտոր Արմեն Մուրադյանը հայտարարել էր, որ մեկ տարի առաջ Հայրենիքի պաշտպանի վերականգնողական կենտրոնի հետ կապված քննարկում է եղել, որի ընթացքում քառօրյա պատերազմի հետ կապված հնչեցվել է անթույլատրելի միտք` առողջապահության նախարար Արսեն Թորոսյանի կողմից: «Պարոն նախարարն ասաց, որ 50 հոգի եղել են հաշմանդամ, եւ 50 հոգին էլ մեռնելու են հաշմանդամ, ինչու եք այդքան փող ծախսել»,- հայտարարեց Ա.Մուրադյանը: Իհարկե, հետաքրքիր հարց է նաեւ, թե այդ ինչո՞ւ է պարոն Մուրադյանը մեկ տարի սպասում ու նոր պատմում այդ մասին. այս հարցի հետ կապված կարելի է հետաքրքիր եզրակացությունների հանգել: Բայց դա ամենեւին էլ չի փոխում նախարարի հայտարարության, մեղմ ասած, անընդունելի լինելը:
«Եթե նախարարն իրեն նման արտահայտություն է թույլ տվել, իրավունք չունի այդ պաշտոնը զբաղեցնել»
«Իրավունքի» հետ զրույցում քառօրյա պատերազմում նահատակված հերոս կապիտան Արմենակ Ուրֆանյանի մայրը` ՀԱՄԵՍՏ ՆԵՐՍԻՍՅԱՆԸ, անդրադառնալով Թորոսյանի այդ հայտարարությանը, խորը ցավով ասաց.
- Ես այդ գրառումը կարդալուց հետո տեղս չեմ գտնում: Ահավոր վիրավորական էր ինձ համար: Ես խորապես ցավ եմ ապրում, որ մեր պետական այրերը նման կերպ հերիք չի մտածում են, մի հատ էլ արտահայտվում են մեր քառօրյայի մասնակից, հաշմանդամ տղաների մասին: Ո՞նց կարող է նախարարը նման կերպ արտահայտվել մեր տղաների մասին, նման նախարարը իրավունք չունի իր պաշտոնին մնալ եւ առողջապահության ոլորտ ղեկավարել: Ո՛չ նախարարը, ո՛չ էլ ինչ բարձրաստիճան պաշտոնյա ուզում է լինի, իրավունք չունի չհարգել զոհված եւ հաշմանդամ դարձած մեր հերոս տղաներին: Կամ այդ նախարարը գոնե գիտի՞, թե քանի վիրավոր է ապաքինվել այդ կենտրոնում, որ նման արտահայտություններ է իրեն թույլ տալիս: Առհասարակ, այսօր հայրենիքի պաշտպանության համար զոհված, առողջությունները կորցրած տղաներին որեւէ մեկը առաջնային տեղ չի տալիս: Մոռանում են, որ էսօր հենց այդ հաշմանդամ տղաների շնորհիվ է, որ իրենց փափուկ աթոռներին են բազմել, ու որոշ պաշտոնյաներ իրենց թույլ են տալիս նման ավել-պակաս արտահայտություններ: Կամ ինչո՞ւ են մտածում, որ հաշմանդամ տղաները պետք է իրենց ողջ կյանքում հաշմանդամ մնան, ինչքա՞ն տղաներ են այդ վերականգնողական կենտրոնի շնորհիվ ոտքի կանգնել, ինչի՞ չեն գնահատում այդ ամենը: Նորից եմ ասում. եթե նախարարն իրեն նման արտահայտություն է թույլ տվել, իրավունք չունի այդ պաշտոնը զբաղեցնել:
«Մտածում են՝ դե զոհվել, գնացել են...»
- Տիկին Համեստ, սեպտեմբերի 15-ից գործում է «Արմենակ Ուրֆանյանի անվան» հիմնադրամը: Որեւէ օլիգարխ կամ մեծահարուստ նվիրատվություն արե՞լ է հիմնադրամին, հաշվի առնելով, որ վարչապետի տիկին Աննա Հակոբյանը նախկին պաշտոնյաների եւ օլիգարխների կանանց կոչ էր արել՝ իրենց զարդերի մի մասը նվիրել հիմնադրամին, եթե մի փոքր կասկած ունեն, որ անօրինական է ձեռքբերված:
- Բացարձակ: Ինչ էլ մինչ այս եղել է, եղել է դրսի մարդկանց շնորհիվ: Հայաստանում ապրող որեւէ օլիգարխ, որեւէ մեծահարուստ մի լումա անգամ չի նվիրաբերել մեր հիմնադրամին: Ես արդեն չեմ էլ զարմանում. եթե այսօր առողջապահության նախարարն է իրեն նման արտահայտություն թույլ տալիս, էլ մնացածներին շատ հետաքրքի՞ր են զոհվածներն ու նրանց ընտանիքները: Մտածում են՝ դե զոհվել, գնացել են...
Հիմա ի՞նչ, գնանք առաջնագծի տղաներին ասենք՝ էսպիսի բան են ասում մերօրյա պաշտոնյաները: Սա ուղղակի ամոթ է, խայտառակություն:
«Չենք հավատում, որ դա ինչ-որ հոգեկան շեղվածի ծիսակատարություն է եղել»
- Սրբապղծության եւս մեկ պատմության վերջերս ականատես դարձանք: Եռաբլուրում պղծել էին քառօրյա պատերազմի մասնակից տղաների շիրմաքարերը: Հետո իրավապահները ասացին, որ իբրեւ թե դա արել է հոգեկան խանգարումներ ունեցող մի կին, ով ինչ-որ ծիսակարգ էր անում: Ի վերջո, ո՞ւր է հասել այդ գործը, Դուք առիթ ունեցե՞լ եք տեսնելու եւ անձամբ հետաքրքրվելու այդ կնոջից, թե ինչ ծիսակարգ էր անում զոհված հերոսների շիրիմների վրա, եթե իրականում նա է մեղավորը:
- Ինչպես ոստիկանությունն է ասում՝ հոգեկան խանգարված կինը, պարզվում է, պղծել է ոչ միայն քառօրյա պատերազմի մեր հերոս տղաների, այլ նաեւ Եռաբլուրում թաղված գրեթե բոլորի շիրմաքարերը: Ես չեմ հավատում, որ հոգեկան շեղված կինը ի վիճակի լինի այդ մասշտաբներով ինչ-որ ծիսակարգ կատարել: Հետո մի բան էլ կա. ոստիկանությունը ասում է՝ արյան հետ խառնված մոմով է այդ ծիսակարգը արել: Բայց երբ ձեռքով շոշափում ենք, կարծես թե յուղի նման ինչ-որ բան լինի, անհասկանալի է, թե ինչ: Ասում են՝ տվել են փորձաքննության, հիմա սպասում ենք: Բայց մենք չենք հավատում, որ դա ինչ-որ մի կնոջ` այն էլ հոգեկան շեղվածի ծիսակատարություն է եղել: Այստեղ հաստատ մի լուրջ խնդիր կա, որ պետք է ու պարտավոր են բացահայտել: Մենք այդ մասին գրել ենք նաեւ մեզանից վերցրած բացատրություններում: Այդ կնոջ հետ մեզ չեն թողել առերեսվել՝ պատճառաբանելով, որ հերթական անգամ մեզ վատ ենք զգալու: Իրավապահները մեզ խոստացան եւ հավատացրին, որ բազմակողմանի քննություն են տանելու, հուսանք էդպես կլինի: Որովհետեւ դա մի հոգու արած բան չի, եւ մենք պահանջում ենք բոլոր մեղավորներին գտնել եւ պատժել:
- Տիկին Համեստ, ապրիլի սկզբին «Եռաբլուր» զինվորական պանթեոնում թալանել էին Ձեր քրոջ որդու մեքենան: Հետաքրքիր է, այդ գործը բացահայտվա՞ծ է:
- Ո՛չ: Ասում են՝ դժվար բացահայտվող գործ է: Ես ուղղակի չեմ հասկանում՝ ինչի՞ համար են աշխատում ոստիկանները, որ ո՛չ շիրմաքարերը պղծելու գործն են նորմալ բացահայտում եւ իրական մեղավորներին մեզ ցույց տալիս, ո՛չ էլ՝ մեքենայի գողությունը:
Զրույցը` ԻԼՈՆԱ ԱԶԱՐՅԱՆԻ