ՔԱՂԱՔԱՇԻՆՈՒԹՅԱՆ ՆԱԽԱՐԱՐ. «ԱՐԱՄԻ 30 ՀԱՍՑԵԻ ՇԵՆՔԸ ԿԱՐԵԼԻ ԷՐ ՉՔԱՆԴԵԼ»

Արխիվ 12-16 4 Փետրվար, 2016 13:23

ՔԱՂԱՔԱՇԻՆՈՒԹՅԱՆ ՆԱԽԱՐԱՐ. «ԱՐԱՄԻ 30 ՀԱՍՑԵԻ

ՇԵՆՔԸ ԿԱՐԵԼԻ ԷՐ ՉՔԱՆԴԵԼ»

Քաղաքաշինության նախարարության Նարեկ Սարգսյանը երեկ խորհրդարանում հարց ու պատասխանի ժամանակ անդրադարձավ Արամի 30 հասցեում գտնվող կառույցի քանդմանը, որը հանրային մեծ արձագանք է գտել: Նախարարը նախ հայտարարեց, որ դեմ է գիշերով որեւէ կառույց քանդելուն, ապա ասաց, որ կարելի էր վերոնշյալ հասցեի շինությունն առայժմ ձեռք չտալ: «Իրավունք»-ը մի քանի հարց ուղղեց գործադիրի անդամին խնդրի մասին:

- Պարոն Սարգսյան, Դուք հայտարարել էիք, որ կառուցապատողն իրավունք չուներ քանդել այդ շինությունը, քանի որ նրան հատկացված հողակտորի մեջ այն չէր մտնում…

-Ոչ, ես ասել եմ` կառուցապատողն իրավունք չուներ գիշերով քանդել այն:

- Նախարարությունը չունե՞ր որեւէ լծակ` թույլ չտալու կառույցի քանդելը գիշերով:

- Ոչ: Տարածքը, որն քանդել է կառուցապատողը, դուրս էր իր սեփականության իրավունքի սահմաններից:Դա հանրային տարածք էր: Բայց միեւնույն է, նա պետք է մաքրեր ու տար քաղաքին: Ոչ ոք չի ասում, որ նա իրավունք չուներ: Պարզապես գիշերով է այդ ամենը արել, մարդկանց մոտ կասկածներ առաջացրել: Այդ շենքն այդ պահին կառուցապատողին չէր խանգարում: Կարող էր հիմա չքանդել, թողնել, որի մասին նրան ասել եմ չորս տարի առաջ: Ասել եմ` ձեռք մի տվեք: Կհասնի ժամանակը, լուծում կգտնենք, որ հանրությունը չվիրավորվի Կարճատես քայլով բոլորին էնդպես… Ես ասել եմ «Հին Երեւան»-ի ճարտարապետներին այդ հատվածը ներառել «Հին Երեւան»-ի մեջ:

- Այսինքն`քաղաքապետարանը մի փոքր շտապե՞լ է:

- Կարծում եմ`քաղաքապետարանը տեղյակ չի եղել, որ կառուցապատողը գիշերը կքանդի այդ հասցեում գտնվող շենքը:

- Դուք Ձեր ելույթում ասացիք, որ պետք է այդ շենքը վերարտադրել…

-Այո:Դա պետք է արվի «Հին Երեւան» ծրագրով: Օգտագործվելու է հին շենքի ճակատը, վերականգնվի «Հին Երեւան» ծրագրով, որը գտնվում է նույն տարածքից 40-50 մետր հեռավորության վրա:

- Ընդդիմախոսներն ասում են, որ Արամի 30 հասցեի մայթը լայնացնելու կարիք չկա, քանի որ այն բանուկ փողոց չէ:

- Համաձայն չեմ այդ գնահատականին: Երբ այդ հատվածը կառուցապատվի, ապա մետրոյի եւ Աբովյան փողոց կապը ավելի կմեծանա: Ընդ որում` դեռ խորհրդային տարիների հատակագծով է նախատեսված ընդլայնել մայթը: Այնտեղ նախատեսվում է ստորգետնյա կայանատեղիների մուտքեր կառուցել: Պարզապես նման հարցերում պետք է զգույշ ու լուրջ լինել:

- Ձեր ընդդիմախոսները, լսելով Ձեր խոսքերը, հարց կբարձրացնեն` ինչո՞ւ Դուք Երեւանի գլխավոր ճարտարապետի պաշտոնը զբաղեցնելու տարիներին զգույշ չէիք նման հարցերում:

- Կոնկրետ ո՞ր հարցերում:

- Երեւանում տեղի ունեցող ճարտարապետական գրեթե բոլոր փոփոխությունները Ձեր ղեկավարման տարիներին դժգոհությամբ է ընդունվել:

- Այդ դժգոհությունները կեղծ են, սուտ: Քանի անգամ ասել եմ` սուտ է, որ Հյուսիսային պողոտայում երեսունից ավելի շենքեր են քանդվում: Ընդամենը երեք շենք եւ հուշարձան է եղել, որոնք իմ անձնական նախաձեռնությամբ վերականգնվել են եւ տեղադրվել են փողոցում: Ո՛չ Սեւան հյուրանոցի, ո՛չ Սպայի տան, ո՛չ Երիտասարդական պալատի քանդման տարիներին Նարեկ Սարգսյանը շարքային արվեստանոցում էր աշխատում: