Տարոն Մարգարյանն առաջատարն է. Gallup International Association-ն ամփոփում է արդյունքները

Այսօր՝ մայիսի 12-ին, Gallup International Association-ի Հայաստանում լիիրավ անդամ «Էմ Փի Զի» ՍՊԸ-ի ներկայացուցիչ Արամ Նավասարդյանը ներկայացրեց Երևանի ավագանու ընտրություններին ընդառաջ անցկացված հերթական հարցումների արդյունքները:

Նավասարդյանը նշեց, որ հարցումներն իրականցվել են մինչև մայիսի 9-ը, երբ դեռ չորս օր կար քարոզարշավին, սակայն, ըստ նրա, ստացված արդյունքների պատկերը հիմնականում չի փոփոխվի:

 Կամզակերպությունն անցկացրել է 1074 դեմ առ դեմ հարցում` մայրաքաղաքի 2 վարչական շրջաններում: Ըստ ստացված արդյունքների՝ ՀՀԿ թեկնածու Տարոն Մարգարյանին պատրաստ է ձայն տալ հարցվածների 72,3 տոկոսը, «Ելք» դաշինքի թեկնածու Նիկոլ Փաշինյանին՝ 15,5 տոկոսը, «Երկիր Ծիրանի» կուսակցության առաջնորդ Զարուհի Փոստանջյանին՝ 4,7 տոկոսը, հարցին դժվարացել է պատասխանել 3,2 տոկոսը:

Հարցվածների 95. 9 տոկոսը նշել է, որ տեղյակ է, որ մայիսի 14-ին կայանալու են Երևանի ավագանու ընտրությունները, 4,1տոկոսը՝ ոչ:  

Քարոզարշավին հետևել է հարցվածների 56. 1 տոկոսը, որից 73,8 տոկոսն ավելի շատ հանդիպել կամ տեսել է ՀՀԿ-ի իրականացրած քարոզարշավը, 46,3 տոկոսը՝ «Ելքի, 32,5տոկոսը՝ «Երկիր Ծիրանի» կուսակցությանը:  

Հարցման մասնակիցների 84 տոկոսը քարոզարշավի շրջանակներում քաղաքական ուժերի ծավալած գործունեության մասին իմացել է հեռուսատացույցից, 23,3 տոկոսը՝ բակային հանդիպումներից, 15,9 տոկոսը՝ Ֆեյսբուք սոցիալական ցանցից:

«ՀՀԿ»-ի կողմից ներկայացված նախընտրական ծրագրին ծանոթ է եղել հարցվածների 78, 5 տոկոսը, «Ելք»-ի ծրագրին՝ 47,4 տոկոսը, իսկ «Երկիր Ծիրանի»-ի ծրագրին՝ 36,5 տոկոսը: Հարցվածների 16, 7 տոկոսը նշել է, որ մասնակցում է բակային հանդիպումներին, ընդ որում նրանց 80,4 տոկոսը նշել է, որ մասնակցել է ՀՀԿ-ի թիմի հետ բակային հանդիպումներին, 20,7 տոկոսը՝ «Ելք» դաշինքի և 11,2 տոկոսը՝ «Երկիր ծիրանի»-ի:

Հարցման մասնակիցների 67,7 տոկոսը նշել է, որ մասնակցելու է ընտրություններին, 15,4 տոկոսը՝ ավելի շուտ մասնակցելու է, 10,4-ը՝ չի մանակցելու: