«Ուզում եմ գյուղս ավելի բարեկարգ տեսնեմ»

"Ուզում եմ գյուղս ավելի բարեկարգ տեսնեմ"

Հայտնի է, որ սեպտեմբերի 18-ին 317 համայնքներում  նշանակված են տեղական ինքնակառավարման մարմինների հերթական ընտրությունները: Նույն օրը Խարբերդի բնակիչները եւս կընտրեն իրենց համայնքապետին: Այստեղ համայնքապետի թեկնածություն են առաջադրել գործող գյուղապետ, ԲՀԿ-ական Կամո Կակոյանը եւ ՀՀԿ կուսակցության կողմից առաջադրված երիտասարդ, խոստումնալից թեկնածու` ՀՀԿ Շենգավիթի տարածքային կազմակերպության Նոր Խարբերդ շրջանային կազամկերպության նախագահ  Արթուր Զոհրաբյանը:
 Թե ի՞նչը ստիպեց Արթուր Զոհրաբյանին առաջադրվել որպես համայնքապետի թեկնածու, պարոն Զոհրաբյանը պատասխանեց հակիրճ. «Իմ գյուղի առջեւ ծառացած խնդիրները»:
Նշենք, որ ՀՀԿ թեկնածու Արթուր Զոհրաբյանը ծնվել, մեծացել եւ ապրել է Խարբերդում: Ավարտել Է «Գալիք»  համալսարանը, ավարտելուց հետո մեկնել է Հայոց բանակ ծառայության: 2007թվականից բանակից զորացրվելուց հետո աշխատել է Շենգավիթ վարչական շրջանում, ճարտարապետական բաժնում, որպես գլխավոր մասնագետ` ընթացքում հիմնելով նաեւ սեփական բիզնեսը: 2011թվականից մինչ օրս կրկին աշխատանքի է անցել Շենգավիթ վարչական շրջանում` որպես Նոր Խարբերդ թաղամասի լիազոր ներկայացուցիչ: Ամուսնացած է, ունի երեք երեխա` երկու դուստր եւ մեկ որդի: 
Խոսելով առաջադրման մասին` մեր զրուցակիցը նկատեց.
- Ես շատ եմ սիրում իմ գյուղը, եւ հարազատ գյուղիս ներկայիս վիճակը ինձ շատ է մտահոգում: Այսօր գյուղի առջեւ ծառացած են մի շարք խնդիրներ`ճանապարհները, լուսավորությունը, կա թե՛ ոռոգման եւ թե՛ խմելու ջրի խնդիրներ: Մի խոսքով` իմ առաջադրումը կապված է զուտ նրա հետ, որ ես անտարբեր չեմ իմ գյուղի նկատմամբ եւ ուզում եմ գյուղս ավելի բարեկարգ տեսնեմ:
Ուզում եմ, Խարբերդը օր առաջ շենացնել,  քանի որ այն միշտ էլ լավ առումով տարբերվել է մնացած գյուղերից, բայց վերջին տարիներին գյուղի վիճակը իրոք շատ մտահոգիչ է: Չթվա թե ցանկանում եմ թերագնահատել ներկայիս գյուղապետի կատարած աշխատանքները, պարզապես երեւի իրենք այդքան են կարողացել: Իմ առաջադրվելու նպատակը մեկն է` Խարբերդը դարձնել ավելի բարեկարգ եւ գրավիչ դրսից եկած հյուրի համար:

Հարցին, թե որոնք են լինելու այն երեք հիմնական խնդիրները, որոնք ընտրվելու դեպքում պարոն Զոհրաբյանը առաջինը կփորձի լուծել, նկատեց. 
- Առաջին խնդիրը լինելու է խմելու ջրի խնդրի լուծումը, երկրորդը` ոռոգման ջրի հետ կապված խնդիրները կփորձենք վերջնականապես լուծել, երրորդ եւ առաջնային խնդիրը` ճանապարհների ասֆալտապատումն է: 
Հուսով եմ, որ իմ ընտրվելու շանսերը մեծ են, քանի որ զգում եմ ժողովրդի աջակցությունը: Մեր ընտանիքը Խարբերդի հարգված ընտանիքներից մեկն է, բոլորի հետ մեր հարաբերությունները շատ նորմալ են եղել: 
Վերջում ցանկանում եմ շնորհակալությունս հայտնել հարազատ Հանրապետական կուսակցությունից եւ իմ թիմակիցներիս` վստահության եւ աջակցության համար:
ԻԼՈՆԱ ԱԶԱՐՅԱՆ