Թուրքերն ինչքան նախապայման ունենան, ասած-չասած՝ սրանք բոլորը բավարարել են. Շարմազանով
ՆերքաղաքականՄինչ օրվա իշխանությունը խոսում է, այսպես կոչված, «խաղաղության դարաշրջան» բացելու մասին, թուրքն արդեն հասել է Ծիծեռնակաբերդ եւ ծաղրում է Հայոց ցեղասպանությունը, ընդ որում` սոցցանցերում հրապարակելով տեսանյութեր ու ի ցույց դնելով «Գորշ գայլեր» թուրք ազգայնական կազմակերպության հայտնի նշանը: Անդրադառնալով վերոնշյալին` ՀՀԿ Գործադիր մարմնի անդամ ԷԴՈՒԱՐԴ ՇԱՐՄԱԶԱՆՈՎՆ ասաց, որ իր համար այս ամենը զարմանալի չէ, որովհետեւ այսօրվա Հայաստանում իշխում է մի ռեժիմ, որն անտարբերության է մատնում մեր ազգային շահերը ու չի սպասարկում հայության իղձերը:
— Գորշ գայլերի, Թուրքիայի պաշտոնական նպատակն է Հայաստանը կուլ տալ: Կարող է անուն-ազգանունով լինի Հայաստանի Հանրապետություն, բայց ինքն իր բովանդակության մեջ լինի Էրմենիստան: Կարող է մի գաղութ էլ չլինի: Եթե պետությունը չի սպասարկում տվյալ ազգի հոգեւոր ժառանգությունը, գիտությունը, ազգային ավանդույթները, ազգի նպատակները, հայրենիքի վերականգնումը, սահմանների ընդլայնումը, այդ պետությունը գրոշ չարժե: Մեր երրորդ հանրապետությունն ինչքան էլ սրանք ուզենան պոզ ու պոչով անուն դնեն, 1991-ից մինչեւ 2018 թվականը եղել է մեր երազանքների հանրապետությունը: Էլ տեղյակ չեն, որ դրախտում է ապրել հայությունը: Ե՞րբ է եղել պատմության ընթացքում, որ մենք թուրքից հող գրավենք: Ե՞րբ է եղել պատմության ընթացքում, որ 30 տարի շարունակ զորահանդեսներ կազմակերպենք, 7 շրջան ազատագրենք ու պահենք, երբ ուզենք՝ գնանք Շուշի: Ե՞րբ է եղել, որ հայ պաշտոնյան գնա Թուրքիա ու հաղթողի դիրքերից խոսի: Մեր ժամանակ է եղել՝ Տեր-Պետրոսյանի, Ռոբերտ Քոչարյանի, Սերժ Սարգսյանի, երբ գլուխներս բարձր քայլում էինք: Իսկ մենք ի՞նչ արեցինք 30 տարվա պատմության հետ, ու չեմ բացառում, որ հենց թուրքերի օժանդակությամբ:
— Ո՞րն է մեր հանրության այսպես հանձնվելու կամ «թրքահպատակ օրակարգով» ապրելու պատճառը:
— Պատճառը մեկն է՝ մենք չենք ճանաչում մեր պատմությունը, չենք ճանաչում ինքներս մեզ, մեզ շրջապատող հարեւաններին: Դրանից է գալիս հոգեւոր ու բարոյական սովը: Մեզ մոտ կա մի մեծ պրոբեմ՝ բովանդակությունը խեղդվել է ձեւի կողմից, մենք ձեւական ենք: Արարիչը մեզ ստեղծել է Հայկական լեռնաշխարհում ապրելու, արարելու համար: ՀՀ-ն ու Արցախի գոնե այս փոքր հատվածը Արարչի կողմից մեզ տրված հայրենիք է, ու մեր ֆունկցիան պետք է լինի ապրել, արարել այս հայրենիքում, շենացնել ու փոխանցել այն հետագա սերունդներին: Մինչդեռ թուրքերն ինչքան նախապայման ունենան, ասած-չասած՝ սրանք բոլորը բավարարել են: Քարվաճառից դուրս են եկել, Բերձորը հեսա տալիս են, 7 շրջանից դուրս են եկել, Շուշին տվել են, Հադրութը տվել են: Հայկական Շուշին դառնում է պանթուրքիզմի կովկասյան կենտրոն, որեւէ մեկը խոսո՞ւմ է այդ մասին: Էլ ի՞նչ պիտի անեն թուրքերը: Բռնաբարվելը որպես հաճույք ներկայացնելը ե՛ւ ուղեղի հետ կապված խնդիր է, ե՛ւ արժեքների: Բռնաբարում են, ասում են՝ նորմալ է, թուլացեք ու հաճույք ստացեք:
ՀՐԱՆՏ ՍԱՐԱՖՅԱՆ