Մոտակա օրերին կլինի ժողովրդի ցասման երկրորդ ալիքը` Նիկոլը հեռանալու է. Գեւորգ Գեւորգյան

Ռազմական, քաղաքական գործիչ, ազատամարտիկ ԳԵՎՈՐԳ ԳԵՎՈՐԳՅԱՆԻ հետ «Իրավունք TV»-ի տաղավարում անդրադարձել ենք ստեղծված ներքաղաքական իրադրությանը:

— Սեպտեմբերի 15-ին հոծ բազմություն էր հավաքվել Ազգային ժողովի շենքի դիմաց, եւ մարդիկ պահանջում էին հենց հիմա հեռացնել Նիկոլ Փաշինյանին ու իր իշխանությանը: Դուք հարթակում էիք, իրականում ի՞նչ կատարվեց:

— Երկար ժամանակ տարբեր հասարակական, քաղաքական գործիչներ, կուսակցություններ խոսում էին, որ ժողովուրդը քնած է, կա մի զգալի հատված, որն ակտիվ է, եւ կա հատված, որը թքած ունի ամեն ինչի վրա: Սակայն սեպտեմբերի 15-ն այդ տեսակետը քանդեց հիմնովին եւ ցույց տվեց, որ ազգն արթուն է եւ պատրաստ է ազնիվ պայքարի` իր երկիրը փրկելու համար: Սա ամենակարեւորն էր, որ ժողովրդի ցասումն ապացուցեց, եւ այս մեսիջը շատ լավ հասավ միջազգային ատյաններին, գերտերություններին եւ նաեւ մեր թշնամի պետությանը, որ հայ ժողովուրդը վախեցած չէ, խուճապի մեջ չէ եւ կարող է պայքարել: Հայ ժողովուրդը ոչ մի տեղ չի փախչում եւ իր երկրի ու պետականության համար պայքարելու է ու ազատագրելու է այն բոլոր տեսակի վարձկաններից, ագենտներից ու դավաճաններից:

— Ժողովուրդը հենց դրա համար էր դուրս եկել սեպտեմբերի 15-ին փողոց, ինչո՞ւ ձախողվեց, ինչո՞ւ չկազմակերպվեց, որ արդյունք լիներ:

— Բավական լավ կազմակերպվեց, իհարկե, մենք մեր բուն նպատակին չհասանք, բայց շատ կարեւոր խնդիր լուծեցինք: Մի՛ մոռացեք, որ Նիկոլը բունկերում էր հայտնվել: Ժողովրդի ցասումն այն հիմնական մեծ ներուժն էր, որ մենք մեծ վտանգից կարողացանք մեր պետությունը փախցնել: Ժամանակը կգա, բոլորը կիմանան, ինչ պետք է ստորագրեր եւ ինչ խնդիր պետք է լուծվեր, որը լինելու էր Հայաստանի Հանրապետության եւ հայ ժողովրդի դեմ: Դրա համար էլ Նիկոլը փախել էր ժողովրդից: Ինչ վերաբերում է Նիկոլ Փաշինյանին հեռացնելուն, շատ քիչ է մնացել, մոտակա օրերին երկրորդ ալիքն է լինելու այդ ցասման: Նա հեռանալու է: Բոլորը մտածում են, թե ժողովուրդը երբ դուրս է գալիս փողոց, նրա ներուժը պետք է օգտագործել, բայց եթե դու ժողովրդի միջից ես, նրա ներուժը պետք չէ օգտագործել, այլ պետք է ժողովրդի հետ լինել ազնիվ եւ ուղիղ: Այդ ժամանակ ժողովուրդը կգա եւ կկանգնի կողքիդ` հանուն իր փրկության եւ պետականության:

ՀՐԱՆՏ ՍԱՐԱՖՅԱՆ

Հ.Գ.-Հարցազրույցն ամբողջությամբ դիտե՛ք տեսանյութում.

Այս թեմայով Հաղթեցինք բոլորս. պարային հրավառություն` Երեւանում Հասկացե՛ք վերջապես՝ հայրենիքը ձեր հաշվառման հասցեից ու կադաստրային գրանցումից շատ ավելի մեծ է. Պետրոսյան Կրկնազատկի տոնին Արագածոտնի թեմ կտարվի Շուրիշկանի հրաշագործ Ավետարանը Երեւանում արցախցիների առաջին ցույցից արցախցիները դժգոհ էին Սուրբ Գեւորգ Զորավարի եւ Սուրբ Նիկողայոս Հրաշագործի մասունքները տեղափոխվել են Երեւանի Սուրբ Աստվածածին ռուսական եկեղեցի