Անհապաղ ազատ արձակել գեներալ Խաչատուրովին. «Կամք»-ը մեկնարկում է պայքար
ՆերքաղաքականՀայկական արժեքների պաշտպանության «Կամք» հասարակական նախաձեռնությունն իր զորակցությունն է հայտնում գեներալ Գրիգորի Խաչատուրովին եւ հայտարարում, որ մեկնարկում է պայքար հաղթանակած գեներալի իրավունքների պաշտպանության եւ ազատ արձակման համար:
«Մենք վկա ենք այն իրողությանը, որ ժողովրդավարության եւ մարդու իրավունքների անվան տակ իշխանության եկած փաշինյանական ռեժիմը, հայության մեջ հիշվելու է ոչ միայն Հադրութն ու Շուշին հանձնած, այլեւ որպես քաղաքական անհանդուրժողականության, քաղաքական հետապնդումների եւ հալածանքների խորհրդանիշ:
Մեր կողմից գեներալ Խաչատուրովի պաշտպանության հարցն ունի երեք ավելի մտահոգիչ եւ խորքային պատճառ:
Նախ հերոս գեներալը, ինչպես նրա հայրը նախկինում հանրության մեջ ներկայացվում էր որպես արեւմտամետ իշխանության աշխարհաքաղաքական հակառակորդ, մինչդեռ մենք գիտենք որ գեներալն իր ամբողջ գիտակից կյանքը նվիրել է անկախ Հայաստանի եւ ինքնորոշված Արցախի անվտանգությանը:
Երկրորդ, որովհետեւ Հայաստանի Հանրապետությունում արհեստավարժ զինվորականի, հայրենիքի պաշտպանի, Արցախյան պատերազմի ազատամարտիկի, հայրենասեր հերոսի ազգային արժեքը տրորելով, իշխանությունը պարզապես ցանկանում է մեր ժողովրդի մեջ վերացնել ինքնուրույնության և ինքնորոշման գիտակցությունը:
Եվ երրորդ, թուրք֊ադրբեջանական ճակատին անդադար զոհեր մատուցելով ՔՊ ական այս իշխանությանը թվում է կհասնի ենթադրյալ խաղաղության, մինչդեռ մեր աչքերի առջեւ տեղի է ունենում մեր հայրենիքի աշխարհաքաղաքական կատարյալ մեկուսացումն ու նրա տարածքների շարունակական բզկտումը նույն թուրք ադրբեջական ուժերի հաշվին:
Մենք չենք մոռացել նաեւ այն հանգամանքը, որ 2020 թվականի հուլիսյան մարտերի ժամանակ հայոց բանակը թշնամու ջարդը տվեց հենց գեներալ Խաչատուրովի հրամանատարությամբ:
Նաեւ չենք կարող հաշվի չառնել, այն հանգամանքը, որ հենց այս օրերին թշնամին ոչ միայն շարունակում է իր հոխորտանքը, այլեւ զորք եւ զենք է կուտակել Հայաստանի Հանրապետության սահմանների մոտ:
Հիմնվելով վերոշարադրյալի վրա, Հայկական արժեքների պաշտպանության Կամք հասարակական նախաձեռնությունը, կոչ է ուղղում մտավորականությանը, զինվորականներին, հասարակական-քաղաքական գործիչներին, ինչպես նաեւ ողջ հանրությանը վերջ տալ աղետալի անտարբերությանը եւ վայրկյան առաջ միավորվել Գրիգորի Խաչատուրովի ազատության պահանջի օրակարգով, նաեւ միջոցներ ձեռնարկել եւ Հայաստանի Հանրապետությունում, Արցախի Հանրապետությունում , ինչպես նաեւ սփյուռքում, օրենքով նախատեսված բողոքի ակցիաներով եւ այլ գործողություններով պահանջել ՀՀ իշխանություններից քաղաքական բանտարկյալ, ազատագրական հերոս գեներալ Գրիգորի Խաչատուրովի անհապաղ ազատ արձակումը», – ասված է Հայկական Արժեքների Պաշտպանության «Կամք» հասարակական Նախաձեռնության հայտարարության մեջ: