«ՀԱՐԵՎԱՆ ԵՐԿՐՆԵՐԸ ԹՇՆԱՄԱԿԱՆ ԵՆ, ՊԵՏՔ Է ԼԻՆԵՆՔ ՈՒԺԵՂ». ՈՒԺԱՅԻՆ ԵՌԱՄԱՐՏԻ ԱՇԽԱՐՀԻ ԳԱՎԱԹԻ, ԿՐԿՆԱԿԻ ՌԵԿՈՐԴԱԿԻՐ ՍՈՒՐԵՆ ԱՌԱՔԵԼՅԱՆ
ՍպորտՕրերս Եգիպտոսում կայացած Ուժային եռամարտի Աշխարհի գավաթի խաղարկության ժամանակ, ոսկե մեդալ է նվաճել ուժային եռամարտիկ, Հայաստանի կրկնակի ռեկորդակիր ՍՈՒՐԵՆ ԱՌԱՔԵԼՅԱՆԸ։
Iravunk. com-ի մարզական թղթակիցը կապ է հաստատել ու բացառիկ զրույց ունեցել նրա հետ։
- Ողջույն, Սուրեն ։ Շնորհավորում ենք հաղթանակի առթիվ։
- Շնորհակալ եմ։ 90 կգ քաշային կարգում եմ հանդես եկել։ Հակառակորդներս Եգիպտոսից ու Արաբական երկրներից էին։ Ձգում վարժությունը 220 կգ, կքանիստը 170 կգ, սեղմում հենարանից 80 կգ եմ կատարել։ Ընդհանուր 470 կգ ։ Հաղթանակս նվիրում եմ մեր բոլոր զինվորներին ու մաղթում, որ խաղաղություն լինի մեր երկրում։ Ես ինքս մասնակցել եմ նաև Արցախյան 44-օրյա դաժան պատերազմին, ժամկետային ծառայող էի այդ ժամանակ, Մարտակերտում եմ եղել։ Փրկել եմ շուրջ 10 վիրավոր զինծառայողի, պարգևատրվել «Անդրանիկ Օզանյան» մեդալով։
- Սուրեն, երբ ես սկսել զբաղվել սպորտով։
- 8 տարեկանից եմ սկսել պարապել սկզբից ծանրամարտով, ապա ուժային եռամարտով։ Հայաստանի երկու ռեկորդ եմ գրանցել կքանիստ վարժությամբ։ Լավ կլիներ, որ այս մարզաձևն էլ լիներ Օլիմպիական։ Մատաղ սերնդին խորհուրդ կտամ զբաղվել սպորտով, ու կտրվեն հեռախոսային այդ վնասակար խաղերից, կարևոր է, որ լինենք ֆիզիկապես առողջ, ուժեղ, որպեսզի կարողանանք դիմակայել այս կյանքի ամեն մի դժվարություն։
Ցավոք, մեր հարևան երկրները թշնամական են, ու մենք պիտի լինենք ուժեղ, հզոր կամքի ուժ ունենանք։ Առիթից օգտվելով, շնորհակալություն եմ հայտնում Ոստիկանության զորքերի 1032 զորամասի հրամանատարությանը ինձ աջակցելու համար։
- Շնորհակալություն, Սուրեն, մեզ ժամանակ տրամադրելու համար։
- Ես էլ շատ զգացված եմ, անխափան գործունեություն Ձեր թերթին ։
Պատրաստեց ՀՈՎՀԱՆՆԵՍ ՍԱՐԳՍՅԱՆԸ