Թող ես լինեմ այսպիսի առեղծվածային ավագանի. Նանա Սարգսյան
Տեսանյութեր«Իրավունք TV»-ի տաղավարում զրուցել ենք Երեւանի ավագանու «Հանրային Ձայն» խմբակցության անդամ ՆԱՆԱ (ԱՄԱԼՅԱ) ՍԱՐԳՍՅԱՆԻ հետ:
— Դուք օրեր առաջ հայտարարել էիք, որ առողջական խնդիրներով պայմանավորված` հնարավոր է վայր դնեք Ձեր մանդատը: Նախ թույլ տվեք հարցնել` ինչպե՞ս եք հիմա եւ ի՞նչ եք պատրաստվում անել:
— Հիմա բավականին լավ եմ: Եվ նաեւ իմ որոշումների մեջ ավելի հստակ եմ, որովհետեւ կար մի շրջան, որ, իսկապես, էմոցիոնալ իրավիճակում էի եւ որոշել էի մանդատս դնել: Սակայն դեռեւս չեմ դնի մանդատս, կաշխատեմ երեւանցու համար եւ Երեւանի, ինչպես արել եմ ամիսներ շարունակ: Չի գտնվի մի երեւանցի, ով կասի` ես դիմել եմ Նանա Սարգսյանին այսինչ խնդրով, եւ այն լուծում չի ստացել: Կարծում եմ` դեռեւս անելիք ունեմ եւ դեռ կմնամ` որպես ավագանի:
— Ձեր այս որոշման հետ կապ ուներ նոր ստեղծվոծ ԴՕԿ կուսակցության նախագահ Վարդան Ղուկասյանի հորդորները` Ձեր մանդատը վայր չդնելու հետ կապված, թե՞ այլ պատճառներ կան:
— Երբ ես պարոն Ղուկասյանին ասացի, որ որոշել եմ մանդատս վայր դնել, նա, իհարկե, հարգանքով մոտեցավ որոշմանս, այնուհետ խնդրեց վայր չդնել եւ շարունակել աշխատել: Ես ավելի սառը մտածելով` հասկացա, որ ճիշտ հորդոր էր, եւ թերես դեռ չեմ դնի մանդատս:
— Այդուհանդերձ, ի՞նչ է տալիս այդ մանդատը, Նանա Սարգսյանը կառչա՞ծ է այդ մանդատից:
— Բոլորովին կառչած չեմ, որովհետեւ ես մինչ այդ մանդատն արել եմ այն, ինչ անում եմ հիմա: Գուցե մի քիչ պակաս, որովհետեւ հիմա անում եմ պաշտոնապես եւ ավելի հեշտ է հարցեր լուծել, բայց երբեւէ կառչած չեմ ո՛չ մի պաշտոնից, ո՛չ մի աթոռից, ո՛չ մի մանդատից: Ինչ վերաբերում է, թե ինչ տվեց, ճիշտ հակառակը` վերցրեց ինձնից իմ ժամանակը, շատ մարդկանց հետ ունեցա կոնֆլիկտներ, նաեւ հիասթափություններ ունեցա: Այս ընթացքում շատ մարդկանց դիմակ բացահայտեցի ինձ համար, որն իսկապես հարված էր մեջքից:
— Կբացե՞ք փակագծերը, ի վերջո, ի՞նչ հարաբերություններ ունեք այս պահին «Հանրային Ձայն» կուսակցության եւ մասնավորապես կուսակցության նախագահ Արտակ Գալստյանի հետ:
— Ես երբեւէ կուսակցական չեմ եղել եւ չեմ էլ պատրաստվում լինել որեւէ կուսակցության անդամ: Կշարունակեմ իմ գործունեությունը քաղաքական դաշտում` որպես անկուսակցական: «Հանրային Ձայն» կուսակցության հետ կապ ունեմ զուտ այնքանով, որքանով հանրությունը տեսել է, դրանից ավել կամ պակաս չի եղել: Ինչ վերաբերում է Արտակ Գալստյանին, ես պաշտոնապես ասում եմ, որ այլեւս չեմ շարունակելու աշխատել Արտակ Գալստյանի հետ: Ես անձնական վիրավորանքները չեմ ներում երբեք: Թույլ տվեք չմանրամասնեմ: Ինչ եղել է, ես չեմ կարողանում ընդունել որեւէ կերպ: Ինձ համար կան կարմիր գծեր, սահմաններ, որոնք ոչ մի դեպքում չի կարելի անցնել: Ցանկանում եմ, որ Արտակ Գալստյանը շուտափույթ ազատության մեջ լինի, առողջ լինի եւ լինի իր ընտանիքի կողքին: Բայց աշխատել տվյալ անձի հետ, ես այլեւս չեմ պատկերացնում:
— Իսկ քաղաքական ճանապարհ Վարդան Ղուկասյանի հետ ունե՞ք անցնելու:
— Եթե Վարդան Ղուկասյանը կլինի այն անձը, ով կփրկի երկիրն այս քաոսային վիճակից, ապա ես կկանգնեմ նրա կողքին: Եթե կլինի Պողոս Պետրոսյանը, Մարտիրոս Մարտիրոսյանը այդ անձը, ես կկանգնեմ նրա կողքին: Այն իրավիճակը, որն այժմ տիրում է սահմանում եւ երկրի ներսում, պետք է շտկվի: Եվ իմ արդար մոտեցումներով կկանգնեմ այս իրավիճակը շտկողի կողքին:
ՀՐԱՆՏ ՍԱՐԱՖՅԱՆ
Հ.Գ.– Հարցազրույցն ամբողջությամբ դիտե՛ք տեսանյութում.