Սերդ ինձ տուր. Արթուր Բադասյան (Պրեմիերա)
Երգիչ ԱՐԹՈՒՐ ԲԱԴԱՍՅԱՆԸ հանրության դատին է հանձնել իր նոր «Սերդ ինձ տուր» երգի տեսահոլովակը: Նշենք, որ երգի խոսքերի հեղինակը Սիրա Գեւորգյանն է, երաժշտությունը՝ Տաջիկստանի ամենահայտնի երգչուհիներից Ֆարահնոզ Շարաֆովայի հայտնի հիթն է: Իսկ տեսահոլովակի ռեժիսորը Նարեկ Աբրահամյանն է: «Իրավունք»-ի հետ զրույցում երգիչն անդրադարձել է այս երգի ընտրությանը, խոսել՝ երաժշտական անցած ճանապարհի ու ծրագրերի մասին:
- «Ճերմակ ամպերի տակ», «Դու ինձ անծանոթ», «Սերդ ինձ տուր»… Ձեր գրեթե բոլոր երգերը սիրո մասին են: Սա խոսում է Արթուր Բադասյանի սիրահարված լինելո՞ւ մասին:
- Առհասարակ սիրո մասին երգերը մեծ պահանջարկ ունեն: Այդ իսկ պատճառով էլ սիրո մասին երգերը շատ են: Ինքս սիրահարված եմ կյանքին եւ իմ աշխատանքին ու սիրում եմ ստեղծագործել հենց սիրո մասին:
- Ձեր նախորդ տեսահոլովակի պրեմիերան գրեթե մեկ տարի առաջ էր, ինչո՞վ էր պայմանավորված այսպիսի մեծ դադարը:
- Մեծ դադարը պայմանավորված էր շատ բուռն եւ խիտ աշխատանքային գրաֆիկով ու ստեղծագործական աշխատանքներով: Նոր երգերի վրա էինք աշխատում, որոնք պարբերաբար կներկայացնենք մեր հանրությանը եւ իմ երկրպագուներին:
- «Սերդ ինձ տուր» երգի տաջիկերեն տարբերակը կատարել է ասիական փոփ երաժշտության ժանրում հանդես եկող երգչուհի Ֆարահնոզ Շարաֆովան: Ինչո՞ւ որոշեցիք անդրադառնալ հենց այս երգին:
- Անկեղծ ասած, ես լսել եմ պարսկերեն տարբերակը եւ հավանելով երաժշտությունը՝ ցանկություն առաջացավ փորձել կատարել եւ ներկայացնել իմ տարբերակը:
- Շատերը Ձեզ հիշում են դեռեւս «Ժողովրդական երգիչ» հեռուստատեսային նախագծից: Իրականում այս նախագծո՞վ եղավ Ձեր մուտքը շոու-բիզնես, թե՞ շատ ավելի վաղ եք սկսել երգել:
- Երգարվեստով զբաղվում եմ 10 տարեկանից, մասնակցել եմ տարբեր մրցույթների, նախագծերի, որոնցից ավելի հայտնի է «Ժողովրդական երգիչ-2» նախագիծը, ինչի շնորհիվ էլ մեծ հնարավորություններ եւ համագործակցության առաջարկներ ստացա, որից հետո ավելի հստակ ու մեծ քայլերով շարժվեցի դեպի մեծ բեմ եւ երգարվեստ:
- Ձեզ համարում եք ժողովրդակա՞ն երգիչ, էստրադայի՞ն, թե՞ ինչ-որ տեղ նաեւ դեմ չեք ռաբիս երգել:
- Ես երգում եւ ստեղծագործում եմ բոլոր ժանրերում՝ թե՛ ժողովրդական, թե՛ էստրադային, թե՛ ռաբիս, բայց ինձ շատ ավելի հոգեհարազատ է ժողովրդական, աշուղական երգերը:
- Արթուր, ի՞նչ ստեղծագործական նորություններ սպասի հանրությունն առաջիկայում Ձեզնից:
- Հանրությունը թող սպասի նոր երգերի, նոր տեսահոլավկների: Առիթից օգտվելով ուզում եմ շնորհակալություն հայտնել Iravunk. com-ին՝ այս անդրադարձի համար:
ՀՐԱՆՏ ՍԱՐԱՖՅԱՆ